ខេត្តកំពង់ចាម ៖ រមណីយដ្ឋានទឹកឆា ស្ថិតនៅឃុំក្រូច ស្រុកព្រៃឈរ ត្រូវបានធ្វើការអភិវឌ្ឍកាន់តែមានសោភ័ណភាពសម្រាប់ទាក់ទាញភ្ញៀវជាតិនិងអន្តរជាតិទៅលេងកម្សាន្តព្រមទាំងបានថតផ្តិតយករូបភាពពីធម្មជាតិទុកជាអនុស្សាវរីយ៏គួរគយគន់ ពិសេសគឺទឹកហូរមិនចេះដាច់ ។ យ៉ាងណាមិញកាលពីព្រឹកថ្ងៃទី១៤ មេសា ២០១១ ក្នុងឱកាសពិធីបុណ្យចូលឆ្នាំថ្ងៃដំបូងលោក ហ៊ុន ណេង អភិបាលខេត្ត និងលោក លន់ លឹមថៃ អភិបាលរងខេត្ត និងសហការីបានអញ្ជើញទៅពិនិត្យមើលក្បាលហុង (ប្រភពទឹកចេញពីក្នុងដី) នៅតំបន់រមណីយ ដ្ឋានទឹកឆានិងបានទស្សនាការប្រណាំងទូកផ្កាចារជាការកម្សាន្តទៀតផង ។
តាមលោក ស៊ាន សុគុន ប្រធានមន្ទីរទេសចរណ៍ខេត្តប្រាប់កោះសន្តិភាពថា ដោយមានការយកចិត្តទុកដាក់ពីសំណាក់លោក ហ៊ុន ណេង អភិបាលខេត្តក្នុងការអភិវឌ្ឍនៅតំបន់រមណីយដ្ឋានទឹកឆាដើម្បីស្រូបយកកំណើនភ្ញៀវទេសចរមកពីគ្រប់ទិសទីនៅក្នុងឱកាសបុណ្យចូលឆ្នាំ ។ លោកប្រធានមន្ទីរទេសចរណ៏ខេត្តបន្តថា មន្ទីរអភិវឌ្ឍន៍និងជនបទខេត្តបានកសាងផ្លូវក្រាលក្រួសក្រហមចម្ងាយ៣,៥០គីឡូម៉ែត្រចូលទៅចំណុចក្បាលហុង ឯមន្ទីរធនធានទឹកនិងឧតុនិយមខេត្តកសាងរបងបេតុងបាំងសំណាញ់ដែកប្រវែង១២០ម៉ែត្រគុណ៤ រដ្ឋបាលព្រៃឈើខេត្តបានធ្វើខ្យុសចំនួន១០ដាក់នៅក្នុងអាងស្តុកទឹកឆានិងទូកផ្កាចារចំនួន១០គ្រឿងសម្រាប់ឱ្យភ្ញៀវជិះលេង ។ ចំណែកខាងមន្ទីរទេសចរណ៍ខេត្តវិញបានកសាងកាំជណ្តើរនិងបង្កាន់ដៃដើម្បីឱ្យមានភាពងាយស្រួលដល់ភ្ញៀវទេសចរណ៍ដែលបានមកកម្សាន្តសប្បាយ ព្រមទាំងការគ្រប់គ្រង ការលក់ដូរនៅក្នុងតំបន់ទេសចរណ៍ទឹកឆានេះថែមទៀត។
តាមការកត់សម្គាល់នៅក្នុងឱកាសបុណ្យចូលឆ្នាំខ្មែររយៈពេល៣ថ្ងៃនេះ នៅតំបន់រមណីយដ្ឋានទឹកឆាពិសេសនៅខាងក្បាលហុងដែលទើបនឹងបង្កើតថ្មី មានភ្ញៀវទេសចរទៅកម្សាន្តតលេងក្នុង១ថ្ងៃៗរហូតដល់ជាង១ម៉ឺននាក់ឯណោះស្ទើរតែស្ទះចរាចរណ៍។ លោក ស៊ាន សុគុន ប្រធានមន្ទីរទេសចរខេត្តបានបញ្ជាក់ថា នៅក្បាលហុងនេះទឹកចេញខួបប្រាំងនិងវស្សាតែនៅខែប្រាំងទឹកចេញច្រើនជាងខែវស្សាទៅទៀត ។ កាលពីមុនគ្រាន់តែក្នុង១វិនាទីទឹកបានចេញមកមានបរិមាណ៦ម៉ែត្រគូប ក្នុងពេលដែលសំបូរទៅដោយធនធានធម្មជាតិព្រៃឈើ ប៉ុន្តែសព្វថ្ងៃនេះ១វិនាទីទឹកចេញបានតែពាក់កណ្តាលប៉ុណ្ណោះ ។ ក្រោមការណែនាំរបស់លោកហ៊ុន ណេង អភិបាលខេត្ត បានផ្តល់អនុសាសន៍មួយចំនួនដោយឱ្យដាក់កម្លាំងនគរបាលប៉ុស្តិ៍ឃុំក្រូច នគរបាលទេសចរណ៍ខេត្ត មន្ត្រីអាវុធហត្ថ ការពារដល់ភ្ញៀវទេសចរដែលបានមកកម្សាន្តនៅរមណីយដ្ឋានទឹកឆានិងតំបន់ទេសចរណ៍ផ្សេងៗទៀតឱ្យបានល្អប្រសើរ ។
ជាក់ស្តែងនៅក្នុងរយៈពេល៣ថ្ងៃនាឱកាស បុណ្យចូលឆ្នាំថ្មីនៅតំបន់រមណីយដ្ឋានទឹកឆា រមណីយដ្ឋានភ្នំស្រីភ្នំប្រុស រមណីយដ្ឋាន ប្រាសាទនគរបាជ័យ រមណីយដ្ឋានហ្លួងព្រះ ស្តេចកន រមណីយដ្ឋានទឹកធ្លាក់ហោង រមណីយ ដ្ឋានភ្នំហាន់ជ័យ រមណីយដ្ឋានភ្នំជើងព្រៃ និងរមណីយដ្ឋានឆ្នេរខ្សាច់កោះប៉ែន មានភ្ញៀវជាតិមកកម្សាន្តលេងសរុបចំនួន៥៨៤.៣៣០នាក់និងភ្ញៀវបរទេសចំនួន១.៦០០នាក់ ឃើញថាមានការកើនឡើងចំនួន៦ភាគរយជាងឆ្នាំ២០១០កន្លងទៅ ៕
ចែករំលែកព័តមាននេះ