កំពូលកីឡាកររត់ប្រណាំងបន្សល់ទុកអនុស្សាវរីយ៍ជូរជត់ចុងក្រោយមុនចូលនិវត្តន៍
កំពូលកីឡាកររត់ប្រណាំងល្បឿនលឿនលំដាប់ពិភពលោក Usain Bolt
កំពូលកីឡាកររត់ប្រណាំងល្បឿនលឿនលំដាប់ពិភពលោក Usain Bolt
កំពូលកីឡាកររត់ប្រណាំងល្បឿនលឿនលំដាប់ពិភពលោក Usain Bolt បានបន្សល់ទុកនូវអនុស្សាវរីយ៍ជូរជត់ ជាមួយលទ្ធផលបរាជ័យក្នុងការប្រកួតរត់ចម្ងាយ១០០ម៉ែត្រ World Championship នៅទីក្រុងឡុង កាលពីរាត្រីថ្ងៃសៅរ៍កន្លងទៅ ក្រោមក្រសែភ្នែកទស្សនិកជនប្រមាណ៥៥.៩០០នាក់ ។
អ្នកគាំទ្រជាច្រើនរបស់អត្តពលិកសញ្ជាតិហ្សាម៉ាអុីក Usain Bolt បានរំពឹងថា នារាត្រីថ្ងៃសៅរ៍នោះ គឺជាថ្ងៃដែលពួកគេនឹងអបអរសាទរចុងក្រោយមុនពេល Usain Bolt ចូលនិវត្តន៍ ប៉ុន្តែជាក់ស្តែងវាបែរក្លាយជារាត្រីដ៏ជូរជត់ទៅវិញ បន្ទាប់ពីកីឡាករវ័យ៣០ឆ្នាំរូបនេះបានត្រឹមឈរចំណាត់ថ្នាក់លេខ៣ជាមួយនឹងមេដាយសំរឹទ្ធិប៉ុណ្ណោះ ដោយបានចំណាយពេល ៩.៩៥វិនាទី ។ ចំណែកតំណែងលេខ១ និងលេខ២ បានទៅលើកីឡាករមកពីអាមេរិក ដែលម្ចាស់មេដាយមាសកីឡាករJustin Gatlin ចំណាយពេលតែ៩.៩២វិនាទី ខណៈម្ចាស់មេដាយប្រាក់កីឡាករChristian Coleman ប្រើពេល៩.៩៤វិនាទី ។
ទោះបីយ៉ាងណា Usain Bolt នៅតែញញឹមដាក់អ្នកគាំទ្ររបស់ខ្លួន បើទោះជារូបគេមិនអាចដណ្តើមបានមេដាយមាសក្តី ។ ជាមួយគ្នានេះដែរ ក្រោយចប់ការប្រកួតគេសង្កេតឃើញថា កីឡាករ Justin Gatlin បានលត់ជង្គង់ចំពោះមុខកីឡាករ Usain Bolt ហាក់បង្ហាញពីការគោរពរាមច្បងជាចុងក្រោយ មុនពេលចូលនិវត្តន៍ ។
គួររំលឹកថា ម្ចាស់មេដាយមាស World Championship នៃការប្រកួតវគ្គផ្តាច់ព្រ័ត្ររត់ចម្ងាយ១០០ម៉ែត្រផ្នែកបុរស កីឡាករ Justin Gatlin ធ្លាប់ត្រូវពិន័យ ២ដងមកហើយពាក់ព័ន្ធនឹងការប្រើប្រាស់សារធាតុញៀនអំឡុងពេលប្រកួតនាពេលកន្លងមក ៕
ចែករំលែកព័តមាននេះ