ប្រទេសវៀតណាម ៖ ក្រុមអ្នកជំនាញបានជំរុញឱ្យទីភ្នាក់ងារគ្រប់គ្រងរដ្ឋចាត់វិធានការចាំបាច់ ដើម្បីជំរុញលំហូរសាច់ប្រាក់ដ៏ខ្លាំងក្លានាពេលបច្ចុប្បន្នក្នុងទីផ្សារអចលនទ្រព្យចេញពីទីផ្សារនេះ ដោយសារតម្លៃ
ប្រទេសវៀតណាម ៖ ក្រុមអ្នកជំនាញបានជំរុញឱ្យទីភ្នាក់ងារគ្រប់គ្រងរដ្ឋចាត់វិធានការចាំបាច់ ដើម្បីជំរុញលំហូរសាច់ប្រាក់ដ៏ខ្លាំងក្លានាពេលបច្ចុប្បន្នក្នុងទីផ្សារអចលនទ្រព្យចេញពីទីផ្សារនេះ ដោយសារតម្លៃកំពុងតែកើនឡើងខ្លាំង ធ្វើឲ្យអ្នកមានប្រាក់ចំណូលទាបគ្មានឱកាសធ្វើជាម្ចាស់ផ្ទះ ។
លោក Dinh Tuan Minh អ្នកជំនាញផ្នែកហិរញ្ញវត្ថុ បាននិយាយថា នៅប្រទេសវៀតណាម ក៏ដូចជាប្រទេសកំពុងអភិវឌ្ឍន៍ដទៃទៀតដែលស្ថិតនៅក្នុងដំណាក់កាលអន្តរកាល តម្លៃអចលនទ្រព្យកំពុងតែកើន ឡើង ។
ប្រជាជនមិនត្រឹមតែទិញផ្ទះនៅក្នុងប្រទេសវៀតណាមប៉ុណ្ណោះទេ ពួកគេថែមទាំងវិនិយោគថវិកាជាច្រើនទៅក្នុងអចលនទ្រព្យនៅក្រៅប្រទេស រួមទាំងសហរដ្ឋអាមេរិកផងដែរ ។ តាមរបាយការណ៍របស់សមាគមអ្នកលក់អចលនទ្រព្យជាតិ ហៅកាត់ថា NAR បង្ហាញថា នៅឆ្នាំ២០១៦ ជនជាតិវៀតណាមបានចំណាយប្រាក់ជាង៣ប៊ីលានដុល្លារដើម្បីទិញផ្ទះនៅក្នុងប្រទេសនេះ ។
លោក Tran Hung មកពី VFM ជាក្រុមហ៊ុនគ្រប់គ្រងមូលនិធិ ក៏បានលើកឡើងដែរថា អចលនទ្រព្យនៅតែជាបណ្តាញវិនិយោគជាទីពេញចិត្តរបស់វៀតណាមអស់រយៈពេលជាច្រើនឆ្នាំមកហើយ ។ ទីផ្សារអចលនទ្រព្យបានកើនឡើងរាល់ពេលដែលសេដ្ឋកិច្ចក្នុងប្រទេសនេះស្ទុះងើបឡើងវិញ ។
ទោះជាយ៉ាងណា លោកបានចង្អុលបង្ហាញថា ស្ថានភាពបែបនេះមិនល្អសម្រាប់សេដ្ឋកិច្ចជាតិទេ ដោយសារធនធានជាច្រើនត្រូវបានប្រមូលផ្ដុំទៅក្នុងវិស័យអចលនទ្រព្យ និងជំរុញឱ្យតម្លៃកើនឡើងខ្ពស់ ។
លោក Bui Trinh សេដ្ឋវិទូគួរឲ្យគោរពម្នាក់ក៏បានព្រមានដែរថា លំហូរសាច់ប្រាក់ទៅក្នុងវិស័យអចលនទ្រព្យ វាអាចនាំឱ្យមានបំណុលមិនល្អ និងហានិភ័យផ្សេងទៀត ។
លោកបន្តថា ៖« ផលលើសនៅក្នុងឧស្សា- ហកម្មសំណង់មានកម្រិតខ្ពស់ ដោយមានគម្លាត ដ៏ធំរវាងតម្លៃចំណាយ និងតម្លៃលក់ ។ អចលនទ្រព្យនៅប្រទេសវៀតណាម ត្រូវបានបង្កើតឡើងជាចម្បងពឹងផ្អែកលើទំនាក់ទំនង និងក្រុមដែលទទួលបានផលប្រយោជន៍ដោយខ្វះតម្លាភាព។ លំហូរសាច់ប្រាក់នៅទីនេះ មិនបានជួយឱ្យសេដ្ឋកិច្ចវៀតណាមមាននិរន្តរភាពទេ » ។
ការពិត មានបណ្តាញវិនិយោគជាច្រើននៅប្រទេសវៀតណាម ដោយមានក្រុមហ៊ុនមូលនិធិវិនិយោគមូលបត្រចំនួន៣០ ។ ទ្រព្យសកម្មសរុបរបស់មូលនិធិបើកទូលាយក្នុងស្រុក គិតត្រឹមថ្ងៃទី៣១ ឧសភា ២០១៧ បានឈានដល់ចំនួន៥ទ្រីលានដុង (២១៩លានដុល្លារ) ហើយកំណើនតម្លៃទ្រព្យសកម្មសុទ្ធរបស់ពួកគេភាគច្រើនមានស្ថិរភាព ជាមួយអត្រាកំណើនខ្ពស់ជាងអត្រាការប្រាក់បញ្ញើធនាគារ ។
លោក Hung បាននិយាយថា ៖« រដ្ឋាភិបាលកំពុងផ្តោតទៅលើការបង្កើនទំហំទីផ្សារហិរញ្ញវត្ថុ ។ ប្រសិនបើទីផ្សារមានទំហំធំគ្រប់គ្រាន់ ហើយមានទំនិញល្អ វានឹងអាចទាក់ទាញលំហូរសាច់ប្រាក់ដោយស្វ័យប្រវត្តិ » ។
របាយការណ៍ពីធនាគាររដ្ឋរបស់វៀតណាមបង្ហាញថា នៅក្នុងរយៈពេល៦ខែដំបូងឆ្នាំនេះ ការផ្តល់ប្រាក់កម្ចីបានកើនឡើង៩% ខណៈប្រាក់ការបង្វិលដើមទុនកើនឡើងត្រឹមតែ៥,៩%ប៉ុណ្ណោះ មានន័យថា កម្ចីមិនទាន់សងមានអត្រាកំណើនខ្ពស់ ។
តើប្រាក់ទាំងនេះបាត់ទៅណា ? យោងតាមលោក Hieu គឺប្រាក់ទាំងនេះត្រូវបានវិនិយោគទៅក្នុងភាគហ៊ុន និងអចលនទ្រព្យ ។ លោកព្រមានថា ប្រសិនបើរឿងនេះនៅតែបន្តកើតឡើង ធនាគារអាចជួបបញ្ហាក្នុងការទូទាត់សាច់ប្រាក់ ។
ស្ថាប័នហិរញ្ញវត្ថុអន្តរជាតិមួយចំនួន រួមទាំងធនាគារពិភពលោក និងមូលនិធិរូបិយវត្ថុអន្ដរជាតិ បានចេញការព្រមានអំពីអត្រាកំណើនឥណទានខ្ពស់ ៕
ចែករំលែកព័តមាននេះ