រាជធានីភ្នំពេញ ៖ វិស័យសំណង់នៅកម្ពុជាត្រូវបានរំពឹងថា នឹងបន្តមានកំណើនខ្ពស់ក្នុងអត្រាពីរខ្ទង់ (១៨,៦%) បើទោះបីជាមានល្បឿនយឺតបន្តិច បើធៀបនឹងឆ្នាំ២០១៦ (២០,៤%) ។ នេះបើតាមរបាយការណ៍ចេញដោយធនាគារជាតិនៃកម្ពុជា ។ ក្នុងនោះ របាយការណ៍ក៏បានកត់សម្គាល់ពីនិន្នាការថ្មីមួយនៅក្នុងទីផ្សារនេះដែលបាននិងកំពុងលេចឡើងផងដែរ គឺការវិនិយោគដោយផ្តោតលើសំណង់លំនៅឋានតម្លៃមធ្យម និងទាបជាងមុន ដែលនិន្នាការនេះនឹងរួមចំណែកគាំទ្រកំណើនតម្រូវការអចលនទ្រព្យ ។
របាយការណ៍ដដែលបញ្ជាក់ថា កំណើននេះ ដោយសារតែការកើនឡើងនៃតម្រូវការលំនៅឋានរបស់ប្រជាជនពេញវ័យ ស្របពេលដែលមានកំណើនក្រុមគ្រួសារថ្នាក់កណ្តាល និងគោលនយោបាយអំណោយផលដល់ការវិនិយោគបរទេសលើវិស័យអចលនទ្រព្យ នឹងបន្តជំរុញកំណើនលំហូរវិនិយោគបរទេស និងក្នុងស្រុកលើវិស័យនេះ។
អ្នកនាង អាន សុធីតា នាយិកាក្រុមហ៊ុន CBRE Cambodia ជាក្រុមហ៊ុនផ្ដល់សេវាអចលនទ្រព្យឈានមុខគេមួយ បានយល់ស្របនឹងទស្សនវិស័យនៃរបាយការណ៍នេះ ដោយបានលើកឡើងថា វិស័យអចលនទ្រព្យកម្ពុជាកំពុងមានសុខភាពល្អ ពិសេសវិស័យសំណង់ ដោយឆ្លុះបញ្ចាំងតាមរយៈគម្រោងអភិវឌ្ឍន៍នានា ។
ថ្លែងតាមទូរស័ព្ទកាលពីថ្ងៃទី៤ សីហា ម្សិលមិញ នាយិកាក្រុមហ៊ុនរូបនេះបានឲ្យដឹងថា ៖«វិស័យសំណង់នាពេលបច្ចុប្បន្ន គឺមានការរីកចម្រើន ហើយបានជួយឲ្យប្រទេសយើងប្រែមុខប្រែមាត់ ពិសេស បានប្រែក្លាយអគារចាស់ៗមកអភិវឌ្ឍន៍ជាខុនដូ អគារពាណិជ្ជកម្ម និងសំណង់លំនៅឋានថ្មីៗជាច្រើន » ។
ទោះបីជាវិស័យសំណង់មានការរីកចម្រើន តែបើមើលទីផ្សារខុនដូនៅឆ្នាំ២០១៧នេះវិញ ហាក់ដូចជានៅទ្រឹងបន្ដិច បើធៀបនឹងឆ្នាំ២០១៦ ។ ភាពនៅទ្រឹងនេះ អាចដោយសារតែការផ្គត់ផ្គង់លើសតម្រូវការ គួបផ្សំនឹងប្រជាពលរដ្ឋពុំទាន់ផ្លាស់ប្ដូរផ្នត់គំនិតពីការរស់នៅឯកកម្មសិទ្ធិ មករស់នៅសហកម្មសិទ្ធិ ជាដើម។ នេះបើតាមការអះអាងរបស់នាយិកាក្រុមហ៊ុន CBRE Cambodia ។
អ្នកនាងថ្លែងថា ៖« ប្រជាពលរដ្ឋមិនទាន់ផ្លាស់ប្ដូរផ្នត់គំនិតនៅឡើយ ដោយពួកគាត់ចង់រស់នៅផ្ទះកម្មសិទ្ធិផ្ទាល់ខ្លួននៅផ្ទាល់ដី ហើយគាត់គិតថា ការរស់នៅខុនដូចំណាយច្រើន ដែលកត្តានេះហើយធ្វើឲ្យវិស័យខុនដូពុំសូវមានសន្ទុះខ្លាំង » ។
យ៉ាងណាក៏ដោយ អ្នកនាងមានសុទិដ្ឋិនិយមថា ៖« នៅថ្ងៃខាងមុខ ខ្ញុំគិតថា ទីផ្សារមួយនេះនឹងរីកចម្រើនដូចប្រទេសជិតខាង ដោយសារតែការរីកចម្រើននៃប្រទេសជាតិ កំណើនប្រជាសាស្ត្រ នាំឲ្យមានការពង្រីកទីក្រុងកាន់តែធំ និងកាន់តែឆ្ងាយពីការងារ ហើយតម្លៃដីធ្លីក៏កើនឡើង ធ្វើឲ្យប្រជាជនងាកមករស់នៅខុនដូវិញ » ។
យោងតាមការសិក្សារបស់ក្រុមហ៊ុនប៊ុណ្ណារៀលធីគ្រុប បានរកឃើញថា ក្នុងឆមាសទី១ ឆ្នាំនេះ ចំនួនខុនដូបានកើនតែ៤គម្រោងប៉ុណ្ណោះ មកស្មើនឹង១២៥គម្រោង មានចំនួន៤៧.៧០៤យូនីត ខណៈឆមាសទី១ឆ្នាំមុន មានចំនួន១២១គម្រោង ស្មើនឹង៤៣.៦០៤យូនីត ។ ក្នុងនោះ៣គម្រោងនៅខេត្តព្រះសីហនុ និង១គម្រោងនៅរាជធានីភ្នំពេញ ។
មន្ត្រីជាន់ខ្ពស់ក្រសួងដែនដី នគរូបនីយកម្ម និងសំណង់ លោក ឡៅ ទិព្ធសីហា បានឲ្យដឹងថា ក្នុងរយៈពេល៦ខែឆ្នាំ២០១៧នេះ នៅទូទាំងប្រទេសបានផ្ដល់លិខិតអនុញ្ញាតសាងសង់មានចំនួន១.៥២៣គម្រោង ដែលមានតម្លៃប៉ាន់ស្មានសរុបជិត៥ពាន់លានដុល្លារអាមេរិក កើនឡើង២៧,៤៤% បើធៀបនឹងរយៈពេលដូចគ្នាក្នុងឆ្នាំ២០១៦ ។ ក្នុងរយៈពេលនេះដែរ សំណង់អគារខ្ពស់ចាប់ពី៥ជាន់ឡើងទៅមានចំនួន៤៣អគារ ដែលភាគច្រើនជាអគារស្នាក់នៅរួម អគារសហកម្មសិទ្ធិ អគារការិយាល័យ និងអគារមុខងារឧបនិស្ស័យខាងផ្នែកពាណិជ្ជកម្ម ខណៈដែលលំនៅឋានលក្ខណៈជាបុរីមានចំនួន១៤ទីតាំងនៅរាជធានីភ្នំពេញ ហើយភាគច្រើននៃគម្រោងអភិវឌ្ឍន៍នេះ គឺដោយអ្នកវិនិយោគទុនក្នុងស្រុក និងមួយផ្នែកទៀត ជាការវិនិយោគរួមគ្នារវាងអ្នកវិនិយោគទុនក្នុងស្រុក និងបរទេស ៕
ចែករំលែកព័តមាននេះ