រាជធានីភ្នំពេញ ៖ ជីវិតមិននៅមួយកន្លែងទេ ការរីកចម្រើននៃបច្ចេកវិទ្យា នឹងចូលរួមផ្លាស់ប្តូររបៀបនៃការរស់នៅ ដែលធ្វើឲ្យអគារសហកម្មសិទ្ធិនានានឹងទទួលបានផលប្រយោជន៍ពីបដិវត្តន៍ឧស្សាហកម្មនេះ ។
លោកឧកញ៉ា នួន រិទ្ធី អគ្គនាយកក្រុមហ៊ុនKhmer Foundation Appraisal បានមើលឃើញនិន្នាការនៃការរស់នៅតាមអគារសហកម្មសិទ្ធិកើនឡើង ហើយលោកបានវិនិយោគអាផាតមិន KFA បានថ្លែងតាមទូរស័ព្ទនាព្រឹកថ្ងៃទី៤ សីហាថា ការស្នាក់នៅតាមខុនដូ និងអាផាតមិន គឺជាការសន្សំសំចៃពេលវេលា និងការចំណាយលើការធ្វើដំណើរ ព្រោះនៅពេលទីក្រុងកាន់តែធំ មនុស្សរស់នៅកាន់តែច្រើន ចរាចរណ៍កាន់តែចង្អៀត កកស្ទះ មនុស្សនឹងផ្លាស់ប្តូរផ្នត់គំនិតរបស់ពួកគេ ជាមួយភាពកាន់តែមមាញឹកក្នុងជីវិត បច្ចេកវិទ្យានឹងជួយសម្រួលដល់ការរស់នៅ ។
លោកបន្តថា ៖« ខុនដូ ឬអាផាតមិន មានទីតាំងនៅជិតសាលារៀន មន្ទីរពេទ្យ ភោជនីយដ្ឋាន និងហាងកាហ្វេ ជាសេវាកម្មដែលផ្តល់ភាពងាយស្រួលសម្រាប់រស់នៅ » ។ លោកបន្តថា ៖« បដិវត្តន៍បច្ចេកវិទ្យា ក៏ជួយមនុស្សច្រើនផងដែរ ដោយពួកគេអាចកុម្មង់អាហារ ទំនិញ និងសេវាកម្មដទៃទៀតតាមរយៈទូរស័ព្ទដៃ » ។
វាជាអ្វីដែលគេហៅថា Express Service និងរីកចម្រើននៅប្រទេសជឿនលឿនដូចជា កូរ៉េ សិង្ហបុរី និងប្រទេសរីកចម្រើនដទៃទៀត ហើយកម្ពុជាបាននិងកំពុងដើរតាមលំអាននេះសម្រាប់ការរស់នៅដោយភ្ជាប់ជាមួយបច្ចេកវិទ្យា ដែលផ្តល់ឲ្យនូវគុណភាពជីវិតកាន់តែប្រសើរឡើង ។ នេះបើតាមលោកឧកញ៉ា នួន រិទ្ធី ។
លោក សុវណ្ណ ដារា នាយកគ្រប់គ្រងទូទៅនៃក្រុមហ៊ុន GO–X បានថ្លែងថា កាលពី៥ឬ១០ឆ្នាំមុន បច្ចេកវិទ្យាមិនទាន់រីកចម្រើននៅកម្ពុជាទេ ប៉ុន្តែពេលនេះ អ្វីៗទាំងនោះកំពុងដំណើរការ និងចូលមកក្នុងជីវិតប្រជាពលរដ្ឋកម្ពុជា ជាពិសេស យុវជនវ័យក្មេងដែលចូលចិត្តជីវិតបែបស៊ីវិល័យ ។ លោកបន្តថា បច្ចេកវិទ្យាអាចភ្ជាប់ជាមួយទូរស័ព្ទ ដែលផ្តល់ឲ្យអ្នកប្រើប្រាស់មានភាពងាយស្រួលទទួលបានជីវិតកាន់ប្រសើរឡើង និងបង្កើតការងារផងដែរ ។
លោកបន្តថា ៖« ឥឡូវនេះ ប្រជាជនអាចហៅម៉ូតូឌុប តុកៗ និងតាក់ស៊ីតាមទូរស័ព្ទដៃ គ្រាន់តែចូលកម្មវិធីណាមួយប៉ុណ្ណោះ » ។ លោកបន្តថា ៖« បច្ចេកវិទ្យាមិនត្រឹមតែជួយធ្វើឲ្យគុណភាពជីវិតប្រសើរឡើងនោះទេ តែក៏ចូលរួមបង្កើតការងារផងដែរ » ។
យោងតាមការសិក្សារបស់ក្រុមហ៊ុន Urban Living Solution បានរកឃើញថា ចំនួនប្រជាពលរដ្ឋរស់នៅរាជធានីភ្នំពេញ នឹងកើនដល់ជាង៤លាននាក់នៅឆ្នាំ២០៣០ ដែលពេលនោះបច្ចេកវិទ្យាកាន់តែរីកចម្រើន ការកកស្ទះចរាចរណ៍កាន់តែខ្លាំង មនុស្សនឹងផ្លាស់ប្តូរផ្នត់គំនិតរបស់ពួកគេ ជាពិសេស យុវជនសម័យថ្មីនឹងសម្រេចចិត្តរស់នៅខុនដូច្រើន ។
លោក ងួន ឆាយលាង អគ្គនាយកក្រុមហ៊ុនRatanaka Realty បានថ្លែងថា បច្ចេកវិទ្យាថ្មីៗកាន់តែរីកចម្រើននៅកម្ពុជា វានឹងផ្តល់ឲ្យមនុស្សរស់នៅកាន់តែប្រសើរតាមរយៈការប្រើប្រាស់សេវាកម្មនានា ដោយទាញយកផលប្រយោជន៍ពីបច្ចេកវិទ្យា ជាជាងប្រើប្រាស់សេវាកម្មតាមបែបប្រពៃណី ។ លោកបន្តថា នៅពេលបច្ចេកវិទ្យាកាន់តែរីកចម្រើន មនុស្សនឹងប្រមូលផ្តុំរស់នៅក្នុងទីក្រុង ដែលមានសេវាកម្មគ្រប់បែបយ៉ាង ជាជាងចេញទៅរស់នៅជាយក្រុង ដែលមិនទាន់មានហេដ្ឋារចនាសម្ព័ន្ធរីកចម្រើន ។
លោកបន្តថា ៖« បច្ចុប្បន្ន ជម្រើសយុវជនវ័យក្មេង គឺខុនដូ បន្ទាប់ពីរៀបការពួកគេទិញខុនដូរស់នៅក្នុងគ្រួសារតូចរបស់ពួកគេ ជាជាងរស់នៅជាមួយឪពុកម្តាយ ហើយវាមានទីតាំងនៅជិតកន្លែងការងារ » ។
វិនិយោគិនខុនដូ L Resident លោក ទុយ ប៊ុន ថ្លែងថា ខុនដូរបស់លោកបានផ្តោតលើអ្នកមានជីវភាពមធ្យម និងគ្រួសារថ្មីថ្មោង ។ ជាលទ្ធផល អ្នកទិញខុនដូក្នុងគម្រោងលំនៅឋានអុិលកម្ពុជា ភ្នំពេញ ភាគច្រើនមានអាយុពី៣៥ឆ្នាំឡើង ពួកគេជាគូភរិយាថ្មីថ្មោងផងដែរ ។
មហាសេដ្ឋី ជេក ម៉ា អគ្គនាយកក្រុមហ៊ុនAlibaba បានថ្លែងក្នុងកិច្ចសម្ភាសន៍ជាមួយទូរទស្សន៍អាមេរិក CNBC កាលពីពេលថ្មីៗថា វិស័យបច្ចេកវិទ្យាកាន់តែរីកចម្រើន នឹងធ្វើឲ្យមនុស្សធ្វើការតែ៤ម៉ោងប៉ុណ្ណោះក្នុង១ថ្ងៃ និងធ្វើការ៤ថ្ងៃប៉ុណ្ណោះក្នុង១សប្តាហ៍ ។
លោកបន្តថា ៖« បច្ចេកវិទ្យារីកចម្រើន វានឹងធ្វើឲ្យគុណភាពជីវិតប្រសើរឡើង ប៉ុន្តែវាក៏បំផ្លាញការងារផងដែរ ។ ហេតុនេះ រដ្ឋាភិបាលប្រទេសនីមួយៗក៏ត្រូវរៀបចំគោលនយោបាយ ដើម្បីឆ្លើយតបនឹងការប្រែប្រួលនេះ » ៕
ចែករំលែកព័តមាននេះ