ខេត្តតាកែវ ៖ យ៉ាងហោចណាស់ ក៏មានរថយន្តដឹកស្រូវពីខេត្តនានាឆ្លងកាត់ខេត្តតាកែវយកទៅលក់នៅស្រុកយួនប្រមាណពី២៧ទៅ៣០គ្រឿងដែរក្នុងមួយថ្ងៃ ហើយចំនួននេះបើប្រៀបធៀបទៅនឹងឆ្នាំមុនវាខុសគ្នាជិតពាក់កណ្តាល ធ្វើឱ្យប្រជាកសិករអ្នកធ្វើស្រែចំការមានទឹកចិត្តសប្បាយរីករាយជាពន់ពេកនៅពេលដែលផលស្រូវបង្កបង្កើនផលបានហើយមានទីផ្សារសំរាប់លក់ ។
មន្ត្រីមន្ទីរកសិកម្មខេត្តបានឱ្យដឹងថា ឆ្នាំនេះឈ្មួញវៀតណាមបានប្រមូលទិញស្រូវពីស្រុកយើងលើសឆ្នាំមុនៗ ហើយខេត្តតាកែវស្រូវដែលលក់ទៅឱ្យឈ្មួញវៀតណាមតិចតួចទេ តែភាគច្រើនឈ្មួញកណ្តាលប្រមូលទិញពីប្រជាកសិករតាមខេត្តផ្សេងយកមកលក់ឱ្យឈ្មួញវៀតណាមឆ្លងកាត់ខេត្តតាកែវ ។ ច្រកដែលស្រូវឆ្លងកាត់លក់ឱ្យឈ្មួញវៀតណាមរាល់ថ្ងៃនេះមានច្រកស្រុកអង្គរបុរី កំពង់ទូក កំពង់អំពិល ស្រុកបុរីជលសាដែលស្រុក២នេះស្រូវចុះទៅវៀតណាមតិចទេ តែសំរាប់ច្រកភ្នំដិនស្រុកគិរីវង់ អាជីវករកំពុងតែសំរុកដឹកយកទៅលក់ឱ្យឈ្មួញយ៉ាងខ្លាំងក្លាដោយសារច្រកនេះរថយន្តអាចដឹកចូលទៅដល់ដីវៀតណាមតែម្តង ។ លោកបានបន្តថា បើតាមការប៉ាន់ប្រមាណនោះស្រូវដែលលក់ឱ្យឈ្មួញវៀតណាមទាំង៣ស្រុកនេះមិនតិចជាង២ម៉ឺនតោនឡើយ ។
ក្រុមអាជីវករជាអ្នករកស៊ីប្រមូលទិញស្រូវដឹកយកទៅលក់ឱ្យឈ្មួញវៀតណាមតាមច្រកភ្នំដិន ស្រុកគិរីវង់ បានត្អូញត្អែរថា ពួកគាត់ដើរប្រមូលទិញស្រូវពីខេត្តកំពង់ធំ ពោធិ៍សាត់ កំពង់ឆ្នាំង យកមកលក់ តែតាមផ្លូវពិតជារំខានណាស់ ព្រោះត្រូវប្រឈមនឹងការបង់លុយដូចព្យុះ ហើយបើមិនព្រមបង់លុយឱ្យទេ សមត្ថកិច្ចតាមផ្លូវទាំងនោះមិនព្រមឱ្យរថយន្តដឹកស្រូវបើកចេញឡើយ ។ ពួកគាត់មានការសប្បាយរីករាយនៅពេលស្រូវនៅក្នុងស្រុកមានហាងឆេងលក់ឱ្យឈ្មួញ តែពួកគាត់អត់សប្បាយចិត្តនៅពេលឃើញសមត្ថកិច្ចដាក់កុងត្រូលជជុះចាំកាក់រថយន្តដឹកស្រូវយកលុយ ព្រោះពួកគាត់ទិញស្រូវក្នុងស្រុកលក់ទៅក្រៅស្រុកអត់ខុសច្បាប់ទេ ។ សំរែកបែបនេះបានលាន់ឮយូរមកហើយតែគ្មានតម្លាភាព ៕
ចែករំលែកព័តមាននេះ