រាជធានីភ្នំពេញ ៖ នៅរសៀលថ្ងៃសៅរ៍ទី៥ សីហា ស្អែកនេះ ប្រដាល់អន្តរជាតិរបស់ទូរទស្សន៍អាស៊ីអាគ្នេយ៍ នឹងនៅតែមានការប្រកួតអន្តរជាតិ ដោយប្រកាសបើករេញឲ្យកីឡាករកម្ពុជា២រូប និង
រាជធានីភ្នំពេញ ៖ នៅរសៀលថ្ងៃសៅរ៍ទី៥ សីហា ស្អែកនេះ ប្រដាល់អន្តរជាតិរបស់ទូរទស្សន៍អាស៊ីអាគ្នេយ៍ នឹងនៅតែមានការប្រកួតអន្តរជាតិ ដោយប្រកាសបើករេញឲ្យកីឡាករកម្ពុជា២រូប និងបរទេស២រូបប៉ះគ្នា បើទោះជាព្រឹត្តិការណ៍ដណ្ដើមខ្សែក្រវាត់អន្តរជាតិទើបបញ្ចប់ក្ដី ។ អ្វីដែលគេកត់សម្គាល់គឺការប្រកួតលើកនេះកីឡាករកម្ពុជាជើងចាស់ ប៉ះសុទ្ធតែជាមួយកីឡាករល្បីឈ្មោះកម្លាំងពេញ និងពោរពេញដោយបច្ចេកទេសមកពីប្រទេសថៃ។
ការប្រកួតដែលនឹងចាប់ផ្ដើមឡើងពីម៉ោង២រសៀលស្អែកនេះ មានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលថ្ងៃសម្រាក ដែលមនុស្សម្នាក្នុងក្រុងនិយមទៅទស្សនាដល់ស្ទីឌីយោ ។ ម្យា៉ង ក្នុងពេលមុននិងក្រោយម៉ោងប្រដាល់សុទ្ធតែជាការប្រគំតន្ត្រីផងទើបមិនខ្វះមនុស្សទស្សនាមិនខុសពីពេលការប្រកួតមួយនេះស្ថិតក្នុងដំណាក់កាលដណ្ដើមខ្សែក្រវាត់អន្តរជាតិ ។ ការប្រដាល់អន្តរជាតិជាលក្ខណៈមិត្តភាពកំដររេញដើម្បីរង់ចាំការប្រកួតដណ្ដើមខ្សែក្រវាត់លេចចេញជារូបរាងនេះ ត្រូវបានប្រកាសថា ពិតជាមានអ្នកមកទស្សនាកកកុញមិនខុសពីការប្រកួតក្នុងពេលដណ្ដើមខ្សែក្រវាត់នោះឡើយ ។
កីឡាករកម្ពុជា២រូប គឺជើងខ្លាំង ឃីម បូរ៉ា និងកីឡាករជើងចាស់ ចាន់ សំអាត នឹងក្លាយជាគូប្រកួតស៊ីសាច់ហុតឈាមជាមួយកីឡាករបរទេសនៅរសៀលស្អែក ។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចចិត្តដាក់ ឃីម បូរ៉ា ជាជើងខ្លាំងប្រចាំក្លិបរស្មីភូមិគាបខេត្តបន្ទាយមានជ័យ ឱ្យឡើងប៉ះប្រកួតជាមួយកីឡាកថៃឈ្មោះ Thing Phuothon ក្នុងនាមជាគូឯកអន្តរជាតិសម្រាប់ប្រដាល់អន្តរជាតិនៅរសៀលថ្ងៃសៅរ៍ស្អែក។
លោកថា ជំនួបរវាងពួកគេមិនមែនជារឿងចៃដន្យនោះទេ ដោយលោកគឺមានបំណងចង់ឱ្យគេប៉ះគ្នាតែម្ដងនៅក្នុងព្រឹត្តិការណ៍បើកឆាកខែសីហានេះ ។ លោកថា កីឡាករ ឃីម បូរ៉ា អាចចាត់ទុកជាជើងខ្លាំងម្នាក់នៅលើសង្វៀនប្រដាល់អន្តរជាតិមួយនេះ ដែលជាព្រឹត្តិការណ៍ចម្រុះតែកីឡាករខ្លាំងៗនៅក្នុងពិភពប្រដាល់។ លោកជឿជាក់ថា កីឡាកររូបនេះនឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ទើបលោកយល់ថា ជំនួបឃីម បូរ៉ា ជាមួយកីឡាករថៃ ពិតជាមិនធម្មតា ។ លោកថា កីឡាករកម្ពុជារូបនេះមានការឈានឡើងហើយការប្រកួតប៉ុន្មានលើកចុងក្រោយគឺមានការកើនសមត្ថភាព ទើបលោកសម្រេចចិត្តឱ្យគេឡើងប្រកួតជាមួយកីឡាករថៃខាងលើ បើទោះជាមុននេះបន្តិចគេវាយជាមួយថៃល្អខ្លះ មិនសូវល្អខ្លះនៅលើសង្វៀនអន្តរជាតិដូចគ្នាក្ដី។ លោកថា ឃីម បូរ៉ា នៅតែចាត់ទុកជាជើងខ្លាំងដែលនៅមានសមត្ថភាពបរិបូរណ៍នៅលើសង្វៀន ទើបលោករំពឹងខ្ពស់សម្រាប់ការប្រកួតថ្ងៃស្អែក។
លោកថា កីឡាករថៃធ្លាប់ប្រកួត៧៤លើក ឈ្នះ៦២លើក ចាញ់១២លើក និងមិនធ្លាប់ស្មើ ក្នុងពេលកីឡាករថៃធ្លាប់ប្រកួត៩៥លើក ឈ្នះ៧៦លើក ចាញ់១៧លើក និងស្មើ២លើក ។
សម្រាប់កីឡាករ ចាន់ សំអាត មកពីក្លិបអប់រំកាយ និងកីឡា ខេត្តឧត្តរមានជ័យ លោក ញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងមកពីប្រទេសថៃឈ្មោះ Reda ក្នុងនាមជាគូរងឯក ។ លោកថា ការប្រកួតរបស់ពួកគេនៅមិនទាន់ដឹងថាអ្នកណាល្អជាងអ្នកណានោះទេ ក្នុងពេលដែលចាន់ សំអាត ជាកីឡាករខ្លាំងតែមិនសូវមានឱកាសឡើងប្រកួតអន្តរជាតិនាពេលកន្លងមក ។ លោកថា កីឡាករថៃគឺជាកីឡាករជើងចាស់ និងល្បីឈ្មោះ តែមិនទាន់ប្រាកដថានឹងទទួលបានជ័យជម្នះសម្រាប់ការប្រកួតជាមួយជើងខ្លាំងកម្ពុជានោះទេ ក្នុងពេលដែលលោក និងអ្នកគាំទ្រនៅតែជឿជាក់ចំពោះជើងខ្លាំងកម្ពុជាជាធំដដែល ។ លោកថា កីឡាករថៃធ្លាប់ប្រកួតរហូតដល់១០៦លើក ឈ្នះ៩០លើក ចាញ់១៥លើក និងស្មើ១លើក រីឯកីឡាករកម្ពុជាទើបប្រកួតបាន៥៦លើក ឈ្នះ៤២លើក ចាញ់១៣លើក និងស្មើ២លើក ។ នៅក្នុងព្រឹត្តិការណ៍ប្រដាល់ពេលព្រឹកនៅលើសង្វៀនអាស៊ីអាគ្នេយ៍ថ្ងៃអាទិត្យនោះដែរ ក៏មានការប្រកួតអន្តរជាតិបែបនេះមិនខុសគ្នាផងដែរ ៕
ចែករំលែកព័តមាននេះ