រាជធានីភ្នំពេញ ៖ ក្រុមហ៊ុនជប៉ុនដ៏ធំមួយគ្រោងនឹងបង្កើតរោងចក្រនៅក្នុងប្រទេសកម្ពុជា ដើម្បីធ្វើការកែច្នៃគ្រាប់ស្វាយចន្ទីនាំទៅកាន់ទីផ្សារពិភពលោក និងកែច្នៃសម្បក ស្វាយចន្ទីទៅប្រេងឥន្ធនៈ។
គម្រោងបង្កើតរោងចក្រកែច្នៃគ្រាប់ និងសម្បកស្វាយចន្ទីនៅក្នុងប្រទេសកម្ពុជានេះត្រូវបានរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ប្រកាសស្វាគមន៍។
ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទកាលពីព្រឹកថ្ងៃទី០៧ ខែកុម្ភៈ ឆ្នាំ២០២៣ បានទទួលជួបជាមួយលោកអគ្គនាយកក្រុមហ៊ុន Top Planning Japan Co.,LTDនៅទីស្តីការក្រសួង។
ឯកឧត្តមរដ្ឋមន្ត្រីក្រសួងកសិកម្មបានបញ្ជាក់យ៉ាងដូច្នេះថា ៖«ខ្ញុំបានសម្ដែងការស្វាគមន៍ និងលើកទឹកចិត្តចំពោះការវិនិយោគរបស់ក្រុមហ៊ុនជប៉ុននៅកម្ពុជាដែលកន្លងមកបានកែច្នៃគ្រាប់ស្វាយចន្ទីនាំចេញទៅលក់លើទីផ្សារប្រទេសជប៉ុនក៏ដូចជា គម្រោងបង្កើតរោងចក្រធំ១នៅកម្ពុជា ដើម្បីនាំស្វាយចន្ទីកម្ពុជាទៅកាន់ទីផ្សារពិភពលោកទាំងផ លិតផលគ្រាប់ស្វាយចន្ទី និងច្នៃសម្បកស្វាយចន្ទីទៅជាប្រេងឥន្ធនៈ»។
ជាមួយគ្នានោះដែរ ឯកឧត្តមក៏បានលើកឡើងថា ដើម្បីទទួលបានតម្លៃបន្ថែមច្រើនជាងនេះខ្ញុំបានណែនាំឱ្យក្រុមហ៊ុនគោរពតាមគោលការណ៍បរិស្ថាន បង្កើនការផ្សព្វផ្សាយ និងកែច្នៃការវេចខ្ចប់ឱ្យបានស្អាតល្អ ឈានទៅទទួលបានការគាំទ្រនៅលើទីផ្សារប្រទេសជប៉ុន និងពិភ ពលោក។
ដោយឡែក ការកែច្នៃសម្បកចន្ទីទៅជាឥន្ធនៈ គឺជារឿងល្អមួយ ប៉ុន្តែក្រុមហ៊ុន គួរសិក្សាស្រាវជ្រាវបន្ថែមទៀតពីលទ្ធភាពកែច្នៃទៅជាផលិតផលម្ហូបអាហារ ឬជីកសិកម្មវិញខណៈដែលកម្ពុជាកំពុងត្រូវការជី។
ឯកឧត្តមបានស្នើសុំឱ្យមានកិច្ចសហប្រតិបត្តិការតាមរយៈអង្គការ JICA ដើម្បីទទួលបានពូជអង្ករ Japonica របស់ជប៉ុនមកដាំដុះនៅកម្ពុជាសម្រាប់ការនាំចេញផងដែរ។ឯកឧត្តមបន្ថែមថា ទាក់ទងនឹងប្រព័ន្ធគាំទ្រលើផលិតកម្មដំណាំស្រូវក្រសួងត្រូវធ្វើការងារជាមួយនឹងអន្តរក្រសួងដូចជា ក្រសួងធនធានទឹកលើប្រព័ន្ធធារាសាស្ត្រ និងក្រ សួងសាធារណៈការលើប្រព័ន្ធនៃការដឹកជញ្ជូនជាដើម។
ឯកឧត្តម ក៏បានលើកឡើងអំពីការប្រើប្រាស់នូវថាមពលល្អ និងចំណាយតិចសម្រាប់កសិកម្មដោយស្នើឱ្យធ្វើការសិក្សាលើការប្រើប្រព័ន្ធបង្ហូរទឹកសម្រាប់ការស្រោចស្រព(Water Tank) និងអាចប្រើថាមពលបន្ថែមដូចជា ការប្រើភ្លើងបូមទឹកពេលយប់ដែលមានតម្លៃទាប និងប្រើថាមពលព្រះអាទិត្យ(Solar) សម្រាប់បូមទឹកពេលថ្ងៃជាដើម។ ហើយបើប្រព័ន្ធនេះ ទទួលបានជោគជ័យនោះនឹងអនុវត្តនៅទូទាំងប្រទេសតែម្តង។
សូមជម្រាបជូនផងដែរថា គោលបំណងនៃជំនួបនេះ គឺដើម្បីពង្រឹងកិច្ចសហប្រតិបត្តិការបន្តរវាងក្រុមហ៊ុន និងក្រសួង ដើម្បីបង្កើតរោងចក្រកែច្នៃចន្ទីនៅកម្ពុជា និងផលិតទៅទីផ្សារពិភពលោក និងការកែច្នៃប្រេងឥន្ធនៈពីសំបកចន្ទីក្នុងប្រទេសកម្ពុជា។
ក្រុមហ៊ុន Top Planning Japan (TPJ) និងសិប្បកម្មកែច្នៃគ្រាប់ស្វាយចន្ទីជ័យសំបូរ មានកិច្ចសហប្រតិបត្តិការពាណិជ្ជកម្មដែលត្រូវបានធ្វើឡើង ដើម្បីសាងសង់រោងចក្រកែច្នៃគ្រាប់ស្វាយចន្ទីខ្នាតតូចជាការសាកល្បង ដែលមានទីតាំងស្ថិតនៅភូមិត្រពាំងអារក្ស ឃុំជ័យ ស្រុកកំពង់ស្វាយ ខេត្តកំពង់ធំ។
គ្រាប់ស្វាយចន្ទីកែច្នៃ គឺជាកសិផលនាំចេញដែលមានសក្តានុពលនៅ លើទីផ្សារប្រទេសជប៉ុន ហើយគិតពីឆ្នាំ២០១៩ ដល់២០២២ នេះ គ្រាប់ស្វាយចន្ទីកែច្នៃបាននាំចេញទៅប្រទេសជប៉ុនប្រមាណ ១៨៤.៩០តោន ក្នុងនោះឆ្នាំ២០២២ មាន១២៦.៤៤តោន៕
ចែករំលែកព័តមាននេះ