រាជធានីភ្នំពេញ ៖ មកទល់បច្ចុប្បន្ន គេនៅតែកត់សម្គាល់ថា សកម្មភាពហាត់ប្រាណតាមចង្វាក់ភ្លេងនៅតាមសួនច្បារ និងទីសាធារណៈនានាក្នុងក្រុងនៅតែមានសកម្មភាពខ្លាំង បើទោះជា
រាជធានីភ្នំពេញ ៖ មកទល់បច្ចុប្បន្ន គេនៅតែកត់សម្គាល់ថា សកម្មភាពហាត់ប្រាណតាមចង្វាក់ភ្លេងនៅតាមសួនច្បារ និងទីសាធារណៈនានាក្នុងក្រុងនៅតែមានសកម្មភាពខ្លាំង បើទោះជាសកម្មភាពមួយនេះមិនមានកម្រិតគគ្រឹកគគ្រេងដូចអំឡុងពេលជាងមួយឆ្នាំមុនក្ដី ដោយសារតែវត្តមានក្លិបហាត់ប្រាណកាន់តែកើតឡើងច្រើននាពេលចុងក្រោយ ។ អ្នកជំនាញ និងអ្នកចូលចិត្តហាត់ប្រាណជាច្រើនរូបសុទ្ធតែបានបង្ហាញពីភាពខុសគ្នាជុំវិញការហាត់ប្រាណតាមក្លិបដែលមានឧបករណ៍ និងការហាត់ប្រាណរបៀបរាំតាមចង្វាក់ភ្លេងនៅលើសួនច្បារឬទីសាធារណៈដែលសុទ្ធតែជាសកម្មភាពខ្លាំងនៅរាជធានីភ្នំពេញ ក៏ដូចជានៅតាមបណ្ដាខេត្តមួយចំនួនទៀតនៅក្នុងប្រទេសកម្ពុជា។
ជាក់ស្ដែង បើគេក្រឡេកទៅមើលបរិវេណស្ដាតអូឡាំពិក សួនច្បារមុខវត្តបទុម សួនច្បារមុខវាំង សួនច្បារម្ដុំវត្តភ្នំ សួនច្បារមុខទីស្ដីការគណៈរដ្ឋមន្ត្រីជាដើម គេនៅតែឃើញមនុស្សប្រុសស្រីទៅផ្ដុំគ្នាហាត់ប្រាណតាមចង្វាក់ភ្លេងទាំងពេលព្រឹក និងពេលល្ងាច ដោយម្នាក់ៗត្រូវទៅបង្ហាញមុខជាប្រចាំសឹងក្លាយជាទម្លាប់ទៅហើយ រហូតពួកគាត់ស្គាល់គ្នាក្លាយជាមិត្តជិតស្និទ្ធនៅពេលបានចូលរួមរាំហាត់ប្រាណជុំគ្នាបែបនេះ។ ភាគច្រើនអ្នកមានចំណូលចិត្តបែបនោះច្រើនតែជាចាស់ៗ និងអ្នកមិនសូវចូលចិត្តហាត់ប្រាណក្នុងក្លិបដែលតម្រូវឱ្យពួកគេប្រើកម្លាំងលើកដុំដែក ឬប្រើកម្លាំងជាមួយឧបករណ៍ផ្សេងៗដែលនាំឱ្យឈឺសរសៃសសូង ។ អ្នកហាត់ប្រាណដោយមធ្យោបាយរាំរែកតាមសួន បានអះអាងថា ការហាត់ប្រាណតាមក្លិបមិនមែនជាចំណូលចិត្តរបស់ខ្លួននោះទេ ដោយសារទី១ក្លិបហាត់ប្រាណមានចម្ងាយឆ្ងាយពីផ្ទះ និងទី២ការហាត់ប្រាណតាមក្លិបមិនធ្វើឱ្យមានបរិយាកាសសប្បាយរីករាយដូចគ្នានឹងការហាត់ប្រាណដោយរាំជុំគ្នាទេ ។
អ្នកបង្ហាញខ្លួនក្នុងវង់រាំហាត់ប្រាណបានអះអាងថា ក្នុងមួយថ្ងៃដ្បិតថាចំណាយឱ្យគ្រូបង្វឹកក្នុងម្នាក់ពី១០០០រៀល ទៅ១៥០០រៀលមិនខុសគ្នាពីការហាត់ប្រាណក្នុងក្លិបក៏ពិតមែន ប៉ុន្តែសម្រាប់បរិយាកាសគឺមិនដូចគ្នាទេ ។ ម្នាក់ៗយល់ថា ការហាត់ប្រាណដោយការរាំធ្វើឱ្យយើងមានអារម្មណ៍ស្រស់ស្រាយ ហើយនៅពេលរាំច្រើនគឺបែកញើសខ្លាំងមានសុខភាពល្អមិនខុសគ្នានឹងការហាត់ក្នុងក្លិបប៉ុន្មានទេ ។ ស្ត្រីវ័យកណ្ដាល និងវ័យចំណាស់បន្តិចភាគច្រើនសុទ្ធតែអះអាងថា ការហាត់ប្រាណតាមចង្វាក់ភ្លេងនៅលើសួនច្បារបែបនេះ ក្រៅពីធ្វើឱ្យរាងកាយបានបញ្ចេញញើសដោយមិនពិបាក ថែមទាំងធ្វើឱ្យពួកគាត់បានស្គាល់គ្នា និងមានទំនាក់ទំនងជាមួយមនុស្សច្រើនឡើងនៅពេលហាត់ក្នុងរយៈពេលយូរ ។ ក្នុងនោះក៏បានស្រែកហ៊ោកញ្ជ្រៀវជាលក្ខណៈមនុស្សចាស់ និងអ្នកស្គាល់គ្នាជិតស្និទ្ធ ដោយមិនពិបាករៀបឫកពាដូចការហាត់ប្រាណក្នុងក្លិបដែលមានលក្ខណៈដោយឡែកៗពីគ្នានោះ ។
នៅតាមសួនសំខាន់ៗដែលមានសកម្មភាពហាត់ប្រាណតាមរបៀបរាំរែកបែបនេះ កម្រណាស់ដែលគេមិនឃើញអ្នកចូលរួមមិនសើចសប្បាយ និងប្រឹងរាំពត់ពែនមិនខុសពីរាំក្នុងកម្មវិធីផ្សេងៗដោយមិនខ្មាសក្រសែភ្នែកអ្នកឈរទស្សនានោះផង ។ ជារៀងរាល់ព្រឹក និងរាល់ល្ងាច សកម្មភាពបែបនេះមិនត្រឹមតែជួយឱ្យគ្រូបង្វឹកទទួលបានប្រាក់ចំណូល និងជួយឱ្យអ្នកហាត់មានសុខភាពល្អប៉ុណ្ណោះទេ ប៉ុន្តែក៏ក្លាយជាចំណីអារម្មណ៍ប្លែកដែលអាចទាក់ទាញអ្នកទេសចរ និងអ្នកធ្វើដំណើរឆ្លងកាត់ជារៀងរាល់ថ្ងៃផងដែរ ។ ជាក់ស្ដែង នៅតាមទីតាំងដែលមានអ្នកហាត់ប្រាណជុំគ្នារាំរែក គឺកម្រមិនមានអ្នកអង្គុយមើលខ្លាំងណាស់ ដោយភាពជាក់ស្ដែងគឺអ្នកអង្គុយមើលទាំងនោះក៏ចូលរាំដែរនៅពេលឃើញសកម្មភាពរាំរែកមានភាពស្រុះគ្នា ហើយរស់រវើក ។
អ្នកចំណាយពេលហាត់ប្រាណទម្រង់នេះ ទទួលបានផលចំណេញមួយទៀត គឺចេះក្បាច់រាំប្លែកៗ ហើយរាំបានស្រុះគ្នាល្អផង ទើបធ្វើឱ្យការហាត់ប្រាណតាមសួននៅតែមានសកម្មភាពខ្លាំងដដែល បើទោះជាមានវត្តមានក្លិបហាត់ប្រាណក្បែរផ្ទះច្រើនឡើងនាពេលចុងក្រោយក្ដី ។ អ្នកមានទម្លាប់ហាត់ប្រាណរបៀបនេះ រមែងចាំម៉ោងចាំពេល ហើយប្រមូលផ្ដុំគ្នាជាក្រុមធំៗដោយការតាំងចិត្តនោះផង ។ ជាក់ស្ដែងក្រុមអ្នកហាត់ប្រាណនៅត្រង់បរិវេណស្ដាតអូឡាំពិក ដែលមានរហូតដល់រាប់រយនាក់ មិនមែនមានតែអ្នករស់នៅជុំវិញស្ដាតប៉ុណ្ណោះទេ គឺអ្នកចម្ងាយក៏មានដែរ ដោយអ្នកទាំងនោះបានអះអាងថា ហេតុផលដែលបន្តស្កាត់មកហាត់ដល់ទីនោះគឺដោយសារតែស្គាល់គ្នាច្រើនហើយ និងចង់ជួបជុំគ្នាផង ។ ម្នាក់ៗសុទ្ធតែនិយាយថាការហាត់ប្រាណដោយរាំរែកធ្វើឱ្យរាងកាយមានសុខភាពល្អ មិនខុសគ្នានឹងការហាត់ប្រាណក្នុងក្លិប ក្នុងពេលដែលអ្នកជំនាញទទួលស្គាល់ថានោះជាការពិត ប៉ុន្តែសម្រាប់លទ្ធផលនៅតែខុសគ្នាដាច់ឆ្ងាយពីការហាត់ប្រាណក្នុងក្លិប ។
លោក រស់ សោភ័ណ្ឌ ជាគ្រូបង្វឹកហាត់ប្រាណក្នុងសណ្ឋាគារធំៗ និងជាតារាសម្ដែងផងបានអះអាងថា ការហាត់ប្រាណដោយរាំតាមសួន និងហាត់ប្រាណក្នុងក្លិបមិនដូចគ្នានោះទេ ហើយវារឹតតែខុសគ្នាទៅទៀតបើការហាត់ប្រាណក្នុងក្លិបមានគ្រូបង្វឹកច្បាស់លាស់ ។ លោកថា ការហាត់ប្រាណក្នុងក្លិបនឹងលេចលទ្ធផលតាមការចង់បានរបស់អ្នកប្រឹងប្រែងដូចជាការចង់សម្រកក្បាលពោះត្រូវហាត់ជាមួយឧបករណ៍ណា ចង់សម្រកខ្លាញ់កំភួនជើងត្រូវហ្វឹកហាត់ជាមួយឧបករណ៍ណា និងត្រូវហ្វឹកហាត់យ៉ាងម៉េចឱ្យល្អជាដើម ។ លោកថាអ្នកចង់ហាត់ប្រាណគ្រាន់តែឱ្យបែកញើស គឺពិតជាឱ្យតម្លៃលើការហាត់ប្រាណតាមសួន តែបើចង់បានរាងកាយស្អាត និងចង់បានសាច់ដុំ ឬសម្រកសាច់ខ្លាញ់ត្រង់ចំណុចណាមួយ គឺមិនមានអ្វីប្រសើរជាងការហាត់ប្រាណក្នុងក្លិបនោះទេ ។
លោកថា បើទោះអ្នកហាត់ប្រាណតាមសួននៅតែមានចំនួនច្រើន ប៉ុន្តែអ្នកហាត់ប្រាណក្នុងក្លិបក៏មានច្រើនដូចគ្នាដែរ ដោយក្នុងមួយថ្ងៃៗលោកសឹងមិនមានពេលបង្វឹកបច្ចេកទេសដល់អ្នកចង់បានសាច់ស្អាត និងចង់មានសុខភាពល្អផង។ លោកថា ការហាត់ប្រាណក្នុងក្លិបគេមានទម្រង់ និងបច្ចេកទេសរបស់គេច្បាស់លាស់ ហើយក្រោយការព្យាយាមគឺអ្នកហាត់នឹងទទួលបានលទ្ធផលច្បាស់លាស់ ដែលផ្ទុយពីការហាត់ប្រាណដោយរាំតាមសួន គឺបានត្រឹមតែបែកញើសតែមិនច្បាស់ថា បានផ្នែកណាមួយតាមការពេញចិត្តនោះទេ ។ លោកថា ការហាត់ប្រាណតាមក្លិបគឺអ្នកហាត់នឹងមានសាច់ណែន រឹងមាំ ហើយបើនិយាយពីរាងកាយគឺមានការប្រែប្រួល ដោយផ្ដល់អត្ថប្រយោជន៍ច្រើនឡើងនៅពេលអ្នកហាត់កាន់តែបន្តហាត់ឱ្យបានច្រើន ។ ក្នុងនោះ បើនិយាយពីសុវត្ថិភាពក៏ខុសគ្នាណាស់ដែរ ដោយសារតែការហាត់ប្រាណក្នុងក្លិបមិនភ័យរឿងចោរឆក់ចោរប្លន់ ដោយសារតែកត់សម្គាល់នោះទេ ។
ទោះបីយ៉ាងណា លោកទទួលស្គាល់ថា ការហាត់ប្រាណក្នុងក្លិបគឺពិតជាតម្រូវឱ្យអ្នកចង់ហាត់ចំណាយពេលច្រើន និងពិបាកក្នុងការធ្វើដំណើរច្រើនមែន ដែលផ្ទុយពីការហាត់ប្រាណដោយរាំតាមសួន គឺឃើញកន្លែងណាអាចចូលហាត់កន្លែងហ្នឹងបាន ។ លោកថា ការហាត់ប្រាណក្នុងក្លិបបើត្រូវហាត់ប្រាណក្នុងក្លិបល្អៗ ហើយមានគ្រូបង្វឹកជំនាញទៀត គឺរឹតតែត្រូវចំណាយដល់ខ្ទង់រយដុល្លារក្នុងមួយឆ្នាំ ក្នុងពេលដែលការហ្វឹកហាត់នោះក៏មានពីរបៀបតមអាហារ និងថែសុខភាពច្បាស់លាស់ផងដែរ ។
លោក ខេវិន ជាអ្នកចូលចិត្តហាត់ប្រាណតាមសួនកាលពីមុនបានអះអាងថា ក្រោយការបង់លុយហ្វឹកហាត់ក្នុងក្លិបលោកយល់ថា ការហាត់ប្រាណក្នុងក្លិបទទួលបានអត្ថប្រយោជន៍ច្រើនជាង បើទោះជាបរិយាកាសគឺមិនសប្បាយក្ដី ។ លោកថា ក្នុងពេលចំណាយពេលហាត់រាំតាមសួនគឺបានត្រឹមតែបែកញើស និងមានសុខភាពល្អតែប៉ុណ្ណោះ ប៉ុន្តែនៅពេលលោកប្ដូរមកហាត់ប្រាណក្នុងក្លិបវិញ គឺមានការប្រែប្រួលជាងមុន ជាពិសេសគឺដឹងពីរបៀបហាត់យករាង ហាត់យកសាច់ស្មា ហាត់យកសាច់ដុំដៃ ហាត់យកក្បាលពោះ និងហាត់យកសាច់ដុំផ្នែកផ្សេងៗ ដោយលោកបញ្ជាក់ថា ក្រោយការប្រឹងប្រែងគឺឃើញរាងរបស់ខ្លួនចាប់ផ្ដើមស្រឡាញ់ជាងមុន ។ យ៉ាងណាមិញ លោកថាការហាត់ប្រាណក្នុងក្លិបគឺត្រូវប្រើការអត់ធ្មត់ និងភាពតស៊ូ ដោយសារតែឧបករណ៍ដែលតម្រូវឱ្យហ្វឹកហាត់ជាមួយ សុទ្ធតែបណ្ដាលឱ្យឈឺខ្លួនខ្លាំងក្នុងប៉ុន្មានថ្ងៃដំបូង ជាពិសេសសម្រាប់អ្នកមកហាត់ឈប់ៗមិនជាប់លាប់ គឺរឹតតែពិបាក។ ប៉ុន្តែបើធៀបនឹងការហាត់ប្រាណតាមសួន លោកថាសប្បាយជាង និងស្រស់ស្រាយជាង
ដោយសារតែបរិយាកាស គឺមិនតែឯងៗដូចការហាត់ប្រាណក្នុងក្លិប ហើយបើនិយាយពីការចំណាយថវិកាវិញ ក៏តិចជាងការហាត់ប្រាណក្នុងក្លិបដែរ ៕
ចែករំលែកព័តមាននេះ