ខេត្តកំពង់ស្ពឺ ៖ គ្រាន់តែជាដុំថ្មសោះ តែអាចយកមកកែច្នៃធ្វើជាគ្រឿងអលង្ការលម្អរបានយ៉ាងស្រស់ស្អាត និងមានក្បាច់យ៉ាងប្រណិត គួរជាទីទាក់ចិត្តមនុស្សគ្រប់គ្នា។ យើងធ្លាប់តែឃើញគេយកថ្មធំៗមកឆ្លាក់ជាចម្លាក់ ឬរូបបដិមាផ្សេងៗ ចុះតើគេយកមកកែច្នៃជាគ្រឿងអលង្ការដោយរបៀបណា? លោក…
ខេត្តកំពង់ស្ពឺ ៖ គ្រាន់តែជាដុំថ្មសោះ តែអាចយកមកកែច្នៃធ្វើជាគ្រឿងអលង្ការលម្អរបានយ៉ាងស្រស់ស្អាត និងមានក្បាច់យ៉ាងប្រណិត គួរជាទីទាក់ចិត្តមនុស្សគ្រប់គ្នា។ យើងធ្លាប់តែឃើញគេយកថ្មធំៗមកឆ្លាក់ជាចម្លាក់ ឬរូបបដិមាផ្សេងៗ ចុះតើគេយកមកកែច្នៃជាគ្រឿងអលង្ការដោយរបៀបណា?
លោក សយ បញ្ញា ដែលមហាជននិយមប្រើប្រាស់បណ្តាញសង្គមហ្វេកប៊ុក Tik tok ក៏ដូចជា Youtube ជាដើមស្គាល់ថា ឈ្មោះ ឆាដ រាជ (ជាឈ្មោះក្រៅរបស់លោក)ពិតជាធ្លាប់បានឃើញស្នាដៃរបស់បុរសម្នាក់នេះ ក្នុងការច្នៃដុំថ្មធម្មតាឱ្យក្លាយជារបស់មានតម្លៃ។
ក្នុងវ័យ២៧ឆ្នាំ លោក សយ បញ្ញា ដែលបច្ចុប្បន្នរស់នៅភូមិត្រពាំងខ្ទម្ភ ឃុំវល្លិ៍ស ស្រុកសំរោងទង ខេត្តកំពង់ស្ពឺ បានទម្លាយឱ្យដឹងថា លោកធ្លាប់ធ្វើការឱ្យគេបានប្រាក់ចំណូលច្រើនគ្រាន់បើ តែលោកបានសម្រេចចិត្តលាឈប់ពីការងារដោយមាននិស្ស័យស្រលាញ់ចូលចិត្តការច្នៃវត្ថុផ្សេងៗ។
លោកបន្តថា ដោយសម្លឹងឃើញពីធនធាន និងវត្ថុធាតុដើមដែលជាប្រភេទថ្មក្នុងស្រុកអាចកែច្នៃទៅជាគ្រឿងអលង្ការដែលយើងគ្រប់គ្នាធ្លាប់តែឃើញគេកែច្នៃគ្រឿងលម្អរាងកាយធ្វើចេញពីមាស ប្រាក់ ផ្លាកទីន លោហៈ ស្ពាន់ ឬដើមរុក្ខជាតិផ្សេងៗ ដូច្នេះក៏មានគំនិតក្នុងការយកដុំថ្មច្នៃវិញម្តង។
ម្យ៉ាងវិញទៀត លោក សយ បញ្ញា ឬហៅថា លោកឆាដ រាជ ចង់បង្ហាញអោយបងប្អូនទាំងក្នុង និងក្រៅស្រុកដឹងថា ត្បូងថ្មក្នុងស្រុកយើងក៏អាចកែច្នៃបានផងដែរ ហើយធាតុផ្សំទាំងអស់នេះក៏ក្នុងស្រុកយើងមានស្រាប់ មិនចាញ់ស្រុកគេប៉ុន្មានទេ ដូច្នេះយើងមានធនធាន មានចំណេះអាចកែខៃបាន គឺពិតល្អណាស់ ជាជាងបើមានការបាត់បង់វាគួរអោយស្តាយ។
គួបផ្សំជាមួយនឹងចិត្តស្រឡាញ់ទៅលើប្រភេទថ្ម រ៉ែ ត្បូងផង យុវជនរូបនេះបានបោះបង់ការងារដែលមានតួនាទី និងទទួលបានប្រាក់ខែច្រើនផងនោះងាកមកប្រកបអាជីពធ្វើខ្សែដៃអង្កាំរាសីប្រភេទត្បូងដែលច្នៃចេញពីត្បូងថ្មវិញ បើទោះបីជាមិនទាន់មានគេស្គាល់ទូលំទូលាយក៏ដោយ។
លោក ឆាដ រាជ បានចាប់ផ្តើមប្រឡូកក្នុងអាជីពរបស់ខ្លួនអស់រយៈពេលជាង៤ឆ្នាំមកហើយ រហូតមកទល់ពេលនេះដោយលោកចាប់ផ្តើមយកថ្មមកបំបែក ឬអង្កន់ថ្មតូចៗល្មមដែលមានទំហំប៉ុនៗគ្នា ច្នៃចេញជាខ្សែដៃដែលមានទម្រង់ ពណ៌ចម្រុះ និងមានចម្លាក់ប្លែកៗគ្នាគួរអោយទាក់ទាញដោយពីដំបូងឡើយ លោកគិតថា គ្រាន់តែធ្វើលេងៗតែប៉ុណ្តោះ តែក្រោយពីការច្នៃចេញជារូបរាង និងមានការផ្សព្វផ្សាយនៅលើបណ្តាញសង្គមហើយ មានការគាំទ្រពីសំណាក់មហាជនទាំងក្នុងនិងក្រៅស្រុក កាន់តែជំរុញទឹកចិត្តអោយលោកបន្តធ្វើរហូតមក។
បើទោះជាត្រូវចំណាយពេលក្នុងការធ្វើយូរបន្តិចមែន តែគ្រប់គ្រាប់ថ្ម គ្រប់ត្បូងដែលលោករចនាច្នៃចេញជារូបរាងមក គឺមានការផ្ចិតផ្ចង់ និងយកចិត្តទុកដាក់ជាមួយ និងចំណង់ចំណូលចិត្តដែលមិនធ្វើអោយអថិតិជនខកបំណងឡើយ។
លោក ឆាដ រាជ បានបញ្ជាក់ផងដែរថា «ចំពោះការធ្វើខ្សែដៃអង្កាមរាសីនេះ មានការលំបាកច្រើនព្រោះវាទាមទារខ្លាំងបំផុតនោះ គឺការអត់ធ្មត់ពីព្រោះប្រភេទថ្មខុសពីប្រភេទឈើ វាមានភាពស្មុគស្មាញជាង ដូច្នេះទាមទារអោយយើងមានសមត្ថភាពជំនាញច្បាស់លាស់ ហើយនិងការប្រុងប្រយ័ត្ន បើមិនដូច្នោះទេវាអាចបង្កអោយមានគ្រោះថ្នាក់ដែលអាចចូលដៃជាមួយដុំតែង ម៉ូទ័រ ឬក៏ផ្លែចោះ សឹកក្រយ៉ៅដៃ ដាច់ក្រចកជាដើម ដែលរឿងទាំងនេះរូបលោកផ្ទាល់ជួបប្រទះជារឿយៗ ទើបយើងត្រូវមានការប្រុងប្រយ័ត្នខ្ពស់»។
ជាដំបូងត្រូវយកត្បូងថ្មមកបំបែកឬ អង្កន់សាច់ត្បូងថ្មទាំងនោះអោយមានទំហំប៉ុនៗគ្នា និងឆាបអោយមានទម្រង់ជារាងមូលទើបយើងយកវាទៅតែងរាងគ្រាប់អង្កាំនីមួយៗជាមួយ និងដុំតែងដើម្បីអោយមានផ្លែតូចចម្រុះផ្សេងៗ បន្ទាប់ពីយើងតេងហើយមើលទៅថាវាមូលល្អហើយ ទើបយកវាទៅចោះរុន។ ចំពោះការចោះរុននេះ គឺតម្រូវអោយមានការប្រុងប្រយ័ត្នដែរ ព្រោះបើយើងចោះមិនស្មើនោះទេ អាចធ្វើអោយប៉ែល ក្រងមិនស្អាតឡើយ ក្រោយចោះរួចនៅមិនទាន់សម្រេចទេ គឺយើងត្រូវយកអង្កាំដែលចោះហើយនោះទៅខាត់ច្រើនដងទៀតទើបធ្វើអោយអង្កាំភ្លឺ រលោងស្អាត ដូច្នេះទម្រាំសម្រេចបាននូវខ្សែដៃមួយខ្សែដ៏ស្រស់ស្អាត គឺចំណាយពេលវេលាយូរ និងផ្ចិតផ្ចង់ខ្លាំងទៅលើគ្រាប់អង្កាំនីមួយៗ។
ងាកមកតម្លៃខ្សែដៃនេះវិញ លោកឆាដ រាជ បានឲ្យដឹងថា មានតម្លៃចាប់ពី៦០ដុល្លារឡើងទៅ ទៅតាមប្រភេទគុណភាពត្បូងថ្ម ឬទំហំធំ តូចនៃខ្សែដៃ ហើយក៏មានការចាប់អារម្មណ៍ និងការកម្មង់ទិញពីបងប្អូនក្នុង និងក្រៅស្រុកដោយពួកគាត់ពាក់ជាគ្រឿងលម្អ ហើយអ្នកខ្លះយល់ថា ជាគ្រឿងលើករាសីជាដើម ទើបមានការគាំទ្រជាហូរហែរ។
ចំពោះតម្លៃលោកឆាដ រាជ ក៏បានបញ្ជាក់ផងដែរថា មានបងប្អូន ក៏ដូចជាមហាជនខ្លះអាចយល់ឃើញថា រៀងមានតម្លៃថ្លៃជាងគេបន្តិច បើធៀបទៅ និងរបស់គេផ្សេង ប៉ុន្តែលោកមិនបានដឹងពីគុណភាពត្បូងថ្មរបស់អ្នកផ្សេងយ៉ាងណានោះទេ លោកក៏មិនចង់វា.យតម្លៃថារបស់គេបែបណានោះដែរ អ្វីដែលសំខាន់ គឺលោកស្គាល់ពីគុណភាពត្បូងថ្មរបស់លោក ដែលធ្វើឡើងយ៉ាងសម្រិតសម្រាងដោយផ្ទាល់ដៃ ដូច្នេះសង្ឃឹមថាបងប្អូនអាចធ្វើការថ្លឹងថ្លែងបាន និងជួយគាំទ្រផលិតផលក្នុងស្រុកយើងផង៕ ដោយ ៖ សាទ ស្រីណែត
ចែករំលែកព័តមាននេះ