«Mirror»របស់អង់គ្លេស កាលពីពេល ថ្មីៗកន្លងមកផ្សាយថា មានហេតុការណ៍គួរឲ្យរន្ធត់មួយនៅពេលលោកStuart Moorat អាយុ២៧ឆ្នាំ និងនាងGeorgina Le Prevost អាយុ២៥ឆ្នាំ ជាប្តីប្រពន្ធជនជាតិអង់គ្លេសជួបគ្រោះថ្នាក់ចរាចរណ៍ស្លាប់បាត់បង់ជីវិតពេលត្រឡប់ពីពិធីជប់លៀងអាពាហ៍ពិពាហ៍របស់មិត្តភក្តិ ។
ហេតុការណ៍កើតឡើងនៅលើផ្លូវមួយ ក្នុងប្រជុំកោះChannelប្រទេសអង់គ្លេស ។ អាជ្ញាធរផ្នែកស៊ើបអង្កេតបញ្ជាក់ថា រថយន្តរបស់ជនរងគ្រោះបានចាកចេញពីផ្លូវក្នុងតំបន់«សង់សាវីយ៉ា» ហើយជ្រុលចង្កូតទៅបុកផ្ទាំងថ្មនៅតំបន់ឆ្នេរ កាលពីវេលាម៉ោង១១យប់ថ្ងៃទី២១ កក្កដា ២០១៧ ។
ការស្លាប់របស់អ្នកទាំង២ធ្វើឱ្យភ្ញៀវដែលចូលរួមក្នុងពិធីមង្គលការមានអារម្មណ៍សោកស្តាយ ខណៈពេលស្ត្រីម្នាក់បង្ហោះអត្ថបទមួយសម្តែងការសោកស្តាយតាមហ្វេសប៊ុក ដោយបញ្ជាក់ថា Georginaជានារីម្នាក់គួរឱ្យស្រឡាញ់រាប់អាន ហើយក៏បានផ្ញើក្តីនឹករលឹកដល់ក្រុមគ្រួសាររបស់អ្នកទាំង២ផង ។
ចំណែកអ្នកលេងអីុនធើរណេតផ្សេងទៀតបញ្ជាក់ថា«ពួកគេទាំង២គឺជាទេពអប្សរនៅឋានសួគ៌ ការស្លាប់របស់ពួកគេទាំងនៅក្មេងវ័យ និងសុំផ្ញើក្តីអាឡោះអាល័យដល់ក្រុមគ្រួសាររបស់ពួកគេ» ៕
ចែករំលែកព័តមាននេះ