រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបញ្ជាក់ជាថ្មីម្តងទៀត សម្តេចមិនអនុញ្ញាតឲ្យ សភាពការណ៍រញ៉ៃរញ៉ៃនៃការតវ៉ាអនាធិបតេយ្យតាមដងផ្លូវប្រឆាំងលទ្ធផលបោះឆ្នោតឆ្នាំ២០១៣ កើតមានជាថ្មីទៀតនោះទេ។
សម្តេចតេជោមានប្រសាសន៍សង្កត់ធ្ងន់ថា៖ «អ្វីដែលខ្ញុំណែនាំ គឺការគ្រប់គ្រងស្ថេរភាពនយោបាយ និងស្ថេរភាពម៉ាក្រូសេដ្ឋកិច្ច។ មិនអនុញ្ញាតឲ្យជំងឺ២០១៣ កើតឡើងទៀតទេ»។ សម្តេចបានបញ្ជាក់ថា សម្តេចបានណែនាំថា គឺមិនអាចឲ្យមានសភាពការណ៍មិនល្អប៉ះពាល់ដល់សន្តិសុខសង្គមផ្ទុះឡើងដូចឆ្នាំ២០១៣ ដែលបក្សប្រឆាំង ហេតុតែចង់បានតំណែងអនុប្រធានរដ្ឋសភា បើជាដឹកនាំបាតុកម្មហិង្សា ដូចនេះគឺត្រូវ «ដាក់ហើយ កុំផ្តេសផ្តាស់» បើអ្នកណាម្នាក់ អ្នកនយោបាយណាមួយចង់ដឹកនាំបាតុកម្មហិង្សាជាថ្នូរនឹងមុខតំណែងគឺប្រាកដជា «ត្រូវហើយ គ្មានទុកទេ»។
សម្តេចតេជោ ហ៊ុន សែន ថ្លែងក្នុងជួបសំណេះសំណាលជាមួយប្រតិភូ កីឡាករ កីឡាការិនី មុនចេញទៅប្រកួតកីឡា SEA Games នៅម៉ាឡេស៊ី នៅវិមានសន្តិភាពព្រឹក ថ្ងៃទី០៣ ខែសីហា ឆ្នាំ២០១៧ បានបញ្ជាក់ថា៖ «ចង់បានស្អី អ្នកឯងអាងធ្វើបាតុកម្ម ចុះគណបក្សដែលឈ្នះឆ្នោតគ្មានសិទ្ធិធ្វើបាតុកម្មទេអី? សុំព្រមានទុកឲ្យហើយ កុំអាងអីធ្វើបាតុកម្ម គេក៏មានសិទ្ធដែរ»។ ហើយបើសិនជាតដៃ ប្រាកដជាប៉ះគ្នា សូម្បីតែអាមេរិក ក៏កើតមានចលាចលដែរ បាតុកម្ម បាញ់នេះបាញ់នោះពេញប្រទេសអាមេរិកហ្នឹង។
សម្តេចក៏ប្រតិកម្មតបនឹងនាយករងប្រចាំអាស៊ី នៃអង្គការឃ្លាំមើលសិទ្ធិមនុស្សអន្តរជាតិ លោក ភីល រ៉ូបឺតសុន ត្រូវបានស្រង់សម្តីដោយសារព័ត៌មានមួយចំនួនថា លោកបានបញ្ចេញប្រតិកម្មទៅនឹងលោក វង សូត រដ្ឋមន្ត្រីក្រសួងសង្គមកិច្ច ដោយទាមទារឲ្យដកចេញពីតំណែងសម្រាប់ការចោទប្រកាន់ថា បានធ្វើសារព្រមានដ៏ឃោរឃៅសម្រាប់ការរារាំងមិនឲ្យសភាពការណ៍ ២០១៣ កើតឡើងម្តងទៀត។
សម្តេចបានមានប្រសាសន៍ថា អ្នកដែលទាមទារឲ្យដកលោក វង្ស សូត្រ ចេញពីតំណែងនោះ គឺជាជនជាតិអាមេរិកាំង ដូច្នេះជនបរទេសនោះគួរតែយកចិត្តទុកដាក់សភាពការណ៍នៅប្រទេសខ្លួនដែលកំពុងតែរញ៉េរញ៉ៃ តិចៗផ្ទុះការបាញ់បោះ ហើយ «កុំនាំអាណាធិបតេយ្យមកប្រទេសខ្ញុំ»។
សម្តេចក៏បានផ្ញើសារទៅអង្គការសង្គមស៊ីវិល ភ្នាក់ងារបរទេសដែលស៊ីលុយបរទេស និងបក្សនយោបាយនានាថា ត្រូវតែគោរពច្បាប់ និងអនុវត្តតាមច្បាប់ កុំប្រព្រឹត្តអ្វីដែលខុសនឹងច្បាប់ ព្រោះអង្គការរបស់គេ និងបក្សនយោយបាយនោះអាចនឹង «ត្រូវរំលាយ»៕
ចែករំលែកព័តមាននេះ