សេវាបង់រំលស់ទូរស័ព្ទកំពុងប្រកួតប្រជែង
រាជធានីភ្នំពេញ ៖ ខណៈដែលទីផ្សារស្មាតហ្វូននៅកម្ពុជាកំពុងរីកចម្រើន គ្រឹះស្ថានមីក្រូហិរញ្ញវត្ថុមួយចំនួនក៏បានចាប់ផ្ដើមពង្រីកសេវារបស់ខ្លួន ដោយសហការជាមួយហាងលក់ទូរស័ព្ទ ដើម្បី
រាជធានីភ្នំពេញ ៖ ខណៈដែលទីផ្សារស្មាតហ្វូននៅកម្ពុជាកំពុងរីកចម្រើន គ្រឹះស្ថានមីក្រូហិរញ្ញវត្ថុមួយចំនួនក៏បានចាប់ផ្ដើមពង្រីកសេវារបស់ខ្លួន ដោយសហការជាមួយហាងលក់ទូរស័ព្ទ ដើម្បីផ្ដល់សេវាបង់រំលស់ដល់អតិថិជនដែលមានតម្រូវការ ហើយសេវាកម្មនេះក៏បានជំរុញការលក់ទូរស័ព្ទឲ្យមានកំណើនផងដែរ ។
បើតាមស្ដ្រីម្ចាស់ហាងលក់ទូរស័ព្ទទំនើបយីហោ លីឃាង បានឱ្យដឹងថា ប៉ុន្មានឆ្នាំមុន អតិថិជនដែលជ្រើសរើសសេវាទិញទូរស័ព្ទបង់រំលស់មានច្រើន ដោយក្នុង១ថ្ងៃ មានអ្នកទិញមិនក្រោម១០នាក់នោះទេ ប៉ុន្ដែបច្ចុប្បន្ន កំណើនអ្នកលក់កើនឡើង ហើយសេវាមួយនេះក៏ប្រកួតប្រជែងខ្លាំង ធ្វើឲ្យអ្នកស្រីបាត់ចំណែកទីផ្សារមួយចំនួន ។
អ្នកស្រីថា ៖« បច្ចុប្បន្ន មានស្ថាប័នមីក្រូហិរញ្ញវត្ថុ និងក្រុមហ៊ុនមួយចំនួនបានចាប់ផ្ដើមផ្ដល់សេវាកម្មនេះដែរ ខណៈកាលពីមុនមានតែគ្រឹះស្ថានមីក្រូហិរញ្ញវត្ថុមួយប៉ុណ្ណោះ ហើយអតិថិជនដែលមកទិញទូរស័ព្ទនៅហាងខ្ញុំ ដែលជ្រើសរើសយកសេវាបង់រំលស់ ភាគច្រើនជាអ្នកមានការងារធ្វើ » ។
បើតាមបុគ្គលិកបម្រើការនៅក្រុមហ៊ុនឯកជនមួយ សុំមិនបញ្ចេញឈ្មោះបានឱ្យដឹងថា ការដែលកញ្ញាជ្រើសរើសសេវាបង់រំលស់លើទូរស័ព្ទដៃ វាជាការផ្តល់ជម្រើសល្អមួយសម្រាប់អ្នកមិនសូវមានលទ្ធភាព ហើយចង់បានទូរស័ព្ទប្រើប្រាស់ ។ ម្យ៉ាងទៀត ការប្រើសេវាបង់រំលស់ វាមិនបានធ្វើឱ្យប៉ះពាល់ដល់ការចំណាយសម្រាប់គ្រួសារទេ ដោយសារគេមានជម្រើសច្រើនឱ្យអតិថិជនជ្រើសរើសទៅតាមលទ្ធភាព ។
លោក រិទ្ធី វ័យ៣៧ឆ្នាំ ដែលមានបទពិសោធន៍ខ្ចីប្រាក់ទិញទូរស័ព្ទស្មាតហ្វូន និយាយថា ការទទួលបានប្រាក់កម្ចី (Credit) ពីស្ថាប័នមីក្រូហិរញ្ញវត្ថុ ដើម្បីទិញទូរស័ព្ទទំនើប មិនមែនជាការលំបាកទេ តែវាទាមទារឲ្យអ្នកទៅខ្ចីគេ ដឹងច្បាស់ថា មានលទ្ធភាពសងវិញបាន ។
លោក រិទ្ធី និយាយថា ៖« ពេលខ្ញុំសម្រេចចិត្តខ្ចីលុយទិញទូរស័ព្ទស្មាតហ្វូនហ្នឹង គឺតម្លៃ៥០០ដុល្លារ តែខ្ញុំត្រូវបង់សងដល់ទៅ៦០០ ដុល្លារក្នុងរយៈពេល១ឆ្នាំ ។ អីចឹង បើធៀបនឹងការចំណាយលុយគ្រប់ចំនួន វាល្អជាងចងការគេខ្ចីទិញអីវ៉ាន់ និងវត្ថុទំនើប » ។
លោកបន្តទៀតថា ៖« ដូច្នេះ តាមយោបល់ខ្ញុំ គឺថាចាំមានការងារធ្វើ ចំណូលសមល្មមសិន សឹមពិចារណាទិញគ្រឿងបច្ចេកវិទ្យា ឬទូរស័ព្ទទំនើបតាមរយៈការបង់រំលស់ ។ ខ្ញុំមិនលើកទឹកចិត្តឲ្យយុវវ័យដែលទទួលបានបៀវត្សតិចតួច ទៅជាប់បំណុលគេមិនដាច់នោះទេ » ។
លោក រុន សារ័ត្ន មន្ត្រីឥណទាននៃធនាគារឯកទេសអីុអន បានឱ្យដឹងដែរថា ការបង់រំលស់លើទូរស័ព្ទនៅតាមហាងនៅតែមានច្រើន ដោយក្នុង១ថ្ងៃ គិតជាមធ្យម លោកបំពេញឯកសារជូនអតិថិជនពី៣ ទៅ៥នាក់ ។
មន្ត្រីឥណទានរូបនេះបន្ដថា ៖« សព្វថ្ងៃនេះ ដោយសារតែក្រុមហ៊ុនផ្តល់សេវាបង់រំលស់មានច្រើន ធ្វើឱ្យការផ្តល់សេវារបស់ស្ថាប័នលោកធ្លាក់ចុះតិចតួច តាមរយៈការប្រកួតប្រជែងខុសពីពេលមុនៗ » ៕
ចែករំលែកព័តមាននេះ