ភ្នំពេញ៖ គ.ជ.ប បានប្រកាសពីលទ្ធផលនៃការចាប់ឆ្នោត កំណត់លេខរៀងគណបក្សនយោបាយ នៅលើសន្លឹកឆ្នោត សម្រាប់ការបោះឆ្នោត លើកទី១ ដើម្បីជ្រើសរើសក្រុមប្រឹក្សាក្រុង ស្រុក ដែលទើបបំបែក និងបង្កើតថ្មី ឬការបោះឆ្នោតឡើងវិញ ឆ្នាំ២០២៣។ មានគណបក្ស ៣ បានចុះឈ្មោះ និងដាក់បេក្ខជនប្រកួតប្រជែងការបោះឆ្នោតនេះ គឺគណបក្សប្រជាជនកម្ពុជា គណបក្សហ៊្វុនស៊ិនប៉ិច និងគណបក្សភ្លើងទៀន។
សេចក្តីប្រកាស បង្ហាញថា នៅខេត្តកណ្តាល គឺក្រុងអរិយក្សត្រ គណបក្សហ៊្វុនស៊ិនប៉ិច ស្ថិតនៅលេខរៀងទី១ គណបក្សប្រជាជនកម្ពុជា លេខរៀងទី២ និងគណបក្សភ្លើងទៀន នៅលេខរៀងទី៣។
ក្រុងសំពៅពូន៖ គណបក្សហ៊្វុនស៊ិនប៉ិច ទទួលបានលេខរៀងទី១ គណបក្សភ្លើងទៀន លេខរៀងទី២ និងគណបក្សប្រជាជនកម្ពុជា នៅលេខរៀងទី៣។
ខេត្តកំពង់ស្ពឺ៖ ក្រុងឧដុង្គម៉ែជ័យ គឺគណបក្សភ្លើងទៀន ទទួលបានលេខរៀងទី១ គណបក្សហ៊្វុនស៊ិនប៉ិច ទទួលបានលេខរៀងទី២ និងគណបក្សប្រជាជនកម្ពុជា ទទួលបានលេខរៀងទី៣។
ចំណែកស្រុកសាមគ្គីមុនីជ័យ ក្នុងខេត្តកំពង់ស្ពឺ គឺគណបក្សហ៊្វុនស៊ិនប៉ិច ទទួលបានលេខរៀងទី១ គណបក្សភ្លើងទៀន ទទួលបានលេខរៀងទី២ និងគណបក្សប្រជាជនកម្ពុជា ទទួលបានលេខរៀងទី៣។
ដោយឡែក នៅខេត្តក្រចេះ ស្រុកអូរគ្រៀងសែនជ័យ គណបក្សភ្លើងទៀន ទទួលបានលេខរៀងទី១ គណបក្សប្រជាជនកម្ពុជា ទទួលបានលេខរៀងទី២ និងគណបក្សហ៊្វុនស៊ិនប៉ិច ទទួលបានលេខរៀងទី៣។
សូមបញ្ជាក់ថា ការបោះឆ្នោតជ្រើសរើសក្រុមប្រឹក្សាក្រុងអរិយក្សត្រ ក្រុងសំពៅពូន ក្នុងខេត្តកណ្តាល ក្រុងឧដុង្គម៉ែជ័យ ស្រុកសាមគ្គីមុនីជ័យ ក្នុងខេត្តកំពង់ស្ពឺ និងស្រុកអូរគ្រៀងសែនជ័យ ក្នុងខេត្តក្រចេះ ត្រូវប្រព្រឹត្តទៅនៅថ្ងៃអាទិត្យ ទី៩ ខែមេសា ឆ្នាំ២០២៣។ ការបោះឆ្នោតនេះ មានតែក្រុមប្រឹក្សាឃុំសង្កាត់ ក្នុងស្រុកក្រុង និងអ្នកតំណាងរាស្ត្រ ក្នុងខេត្តនោះប៉ុណ្ណោះ ជាអ្នកបោះឆ្នោតជ្រើសរើសក្រុមប្រឹក្សាក្រុងស្រុក ដែលទើបបំបែក និងបង្កើតថ្មីទាំង ៥នេះ៕
ចែករំលែកព័តមាននេះ