រាជធានីភ្នំពេញ ៖ យោងតាមការប្រកាសព័ត៌មានរបស់អង្គការ WWF ដែលកោះសន្តិភាពទទួលបានថ្ងៃទី២០ មេសា ឱ្យដឹងថា កិច្ចប្រជុំអន្តររដ្ឋាភិបាលនៃគណៈកម្មការទន្លេមេគង្គបានដាក់សេចក្តីសម្រេចចិត្តលើការសាងសង់ទំនប់វារីអគ្គិសនី សាយ៉ាបូរី នៅក្នុងប្រទេសឡាវ ជូនថ្នាក់រដ្ឋមន្ត្រី បន្ទាប់ពីបានស្តាប់កិច្ចពិភាក្សារវាងកម្ពុជា ថៃ និងវៀតណាម ដែលលើកឡើងពីក្តីបារម្ភនានា ជាពិសេសហេតុប៉ះពាល់អវិជ្ជមានដែលអាចកើតមានឡើង ។ ការសម្រេចចិត្តត្រូវបានធ្វើឡើងដោយផ្អែកលើភស្តុតាងជាច្រើនដែលគេបានដាក់ជូនគណៈកម្មការ ហើយដែលបង្ហាញពីហានិភ័យនានាចំពោះជីវចម្រុះ ជលផល និងការចិញ្ចឹមជីវិតរបស់ប្រជាជនរាប់លាននាក់ដែលរស់នៅក្នុងតំបន់នៃអាងទន្លេមេគង្គ ជាពិសេសគឺជលផល ព្រមទាំងតំបន់ដីសណ្តទន្លេមេគង្គដែលងាយទទួលរងគ្រោះថ្នាក់ ។
លទ្ធផលចេញពីការពិនិត្យមើលសាឡើងវិញធ្វើឡើងដោយ WWF ចំពោះគម្រោងសាងសង់ទំនប់វារីអគ្គិសនីសាយ៉ាបូរី បានបង្ហាញថា ការវាយតម្លៃហេតុប៉ះពាល់ផ្នែកបរិស្ថាន ព្រមទាំងការសិក្សាពីលទ្ធផលសាងសង់ទំនប់ដែលគេបានស្នើឡើងនេះ គ្មានលក្ខណៈគ្រប់ជ្រុងជ្រោយ ហើយមានកម្រិតទាបជាងបទដ្ឋានស្តង់ដាអន្តរជាតិតម្រូវសម្រាប់ការសិក្សាបែបនេះ ។ បម្រែបម្រួលរបបទឹក ដីល្បាប់ ជីវៈ និងសារធាតុចិញ្ចឹមក្នុងទឹក ត្រូវការឱ្យមានការសិក្សាស៊ីជម្រៅបន្ថែមទៀត ។
លោកបណ្ឌិត Jian-hua Meng ជាអ្នកឯកទេសផ្នែកនិរន្តរភាពនៃវារីអគ្គិសនីនិយាយថា៖«សេចក្តីសម្រេចចិត្តយ៉ាងណានោះ នឹងបង្កផលលំបាកផ្សេងៗដល់កូនចៅជំនាន់ក្រោយ» ។ លោកបន្តថា៖ «វាច្បាស់ណាស់ថា រដ្ឋាភិបាលនៃប្រទេសកម្ពុជា ថៃ និងវៀតណាម កំពុងទទួលស្គាល់កង្វះខាតនៃព័ត៌មាន និងចំណេះដឹងពាក់ព័ន្ធនឹងហេតុប៉ះពាល់ដែលនឹងកើតមានឡើងចេញពីទំនប់វារីអគ្គិសនីនេះ» ។ កិច្ចប្រជុំមួយនៅទីក្រុងវៀងចន្ទន៍ ក្នុងឆ្នាំ២០០៨ រវាងក្រុមអ្នកជំនាញដើម្បីពិនិត្យមើលសាឡើងវិញ នូវហេតុប៉ះពាល់ចេញពីទំនប់វារីអគ្គិសនីនានានៅក្នុងដងទន្លេចំពោះការធ្វើចរាចររបស់ត្រីបានសន្និដ្ឋានថា វិធីសាស្ត្រកាត់បន្ថយការប៉ះពាល់ដែលគេបានប្រើចំពោះប្រភេទត្រី Salmon នៅអឺរ៉ុប និងអាមេរិកខាងជើង មិនអាចអនុវត្តចំពោះទំហំ ព្រមទាំងការធ្វើចរាចរនៃពពួកប្រភេទត្រីដែលកំពុងរស់នៅក្នុងតំបន់ដងទន្លេមេគង្គបានឡើយ។ អង្គការ WWF ជឿថា គេមិនត្រូវយកតំបន់មេគង្គធ្វើជាករណីសិក្សាសម្រាប់អនុវត្តនូវបច្ចេកវិជ្ជាដែលកំណត់ចរាចរសម្រាប់ត្រីនោះទេ ។
អង្គការ WWF គាំទ្រឱ្យមានការពន្យាររយៈពេល១០ឆ្នាំ ដល់រាល់ការធ្វើការសម្រេចចិត្តចំពោះការសាងសង់ទំនប់វារីអគ្គិសនីនានានៅលើដងទន្លេមេគង្គប៉ែកខាងក្រោម ក្នុងនោះមានគម្រោងទំនប់សាយ៉ាបូរីផងដែរ ដើម្បីអាចធានាថា មានការសិក្សាឱ្យបានល្អិតល្អន់ និងគ្រប់ជ្រុងជ្រោយលើគ្រប់ទិដ្ឋភាពនៃហេតុប៉ះពាល់ផ្នែកបរិស្ថាន និងផ្នែកផ្សេងៗទៀតដែលនឹងកើតចេញពីការសាងសង់ និងប្រតិបត្តិការទំនប់ ។ សម្រាប់តម្រូវការបន្ទាន់ចំពោះមុខ គេអាចឆ្លើយតបបានតាមរយៈការងាកទៅរកដំណោះស្រាយដែលផ្តោតលើការទាញយកប្រយោជន៍ពីការសាងសង់ទំនប់នៅលើដៃនៃទន្លេមេគង្គ ។
លោកបណ្ឌិត Jian-hua Meng និយាយថា៖ «គណៈកម្មការទន្លេមេគង្គបានបោះជំហានមួយយ៉ាងមានសារសំខាន់ឆ្ពោះទៅកាន់ការសម្រេចចិត្តប្រកបដោយការទទួលខុសត្រូវ ហើយកំពុងមើលឱ្យបានច្បាស់លាស់លើហេតុប៉ះពាល់ដែលអាចកើតមានចេញពីទំនប់វារីអគ្គិសនីសាយ៉ាបូរី ដែលអាចបង្កផលអវិជ្ជមានដល់មនុស្សរាប់លាននាក់ដែលរស់នៅក្នុងតំបន់នៃអាងទន្លេមេគង្គ» ។ លោកបន្តថា៖ «ប្រទេសឡាវ ត្រូវផ្អែកលើព័ត៌មាន និងចំណេះដឹងដែលគេផ្តល់ឱ្យខ្លួនក្នុងការអភិវឌ្ឍវិស័យវារីអគ្គិសនីដែលមាននិរន្តរភាពសម្រាប់តំបន់មេគង្គទាំងមូល ព្រមទាំងត្រូវដើរតាមគំរូមុនៗដូចជាទំនប់វារីអគ្គិសនីឈ្មោះណាំធឿន២» ៕
ចែករំលែកព័តមាននេះ