រាជធានីភ្នំពេញ ៖ កំលាំងគណៈបញ្ជាការឯកភាពខណ្ឌដង្កោដឹកនាំដោយលោកគិត សុផា អភិបាលខណ្ឌបានស្ទាក់ចាប់រថយន្តធុនធំដឹកទំនិញគ្រប់ប្រភេទ និងរថយន្តកុងតឺន័រត្រួតពិនិត្យមើលគុណភាព ជាពិសេសរថយន្តចាស់ៗ និងប្រើប្រាស់សំបកកង់ចាស់ៗ និងរថយន្តអត់ស្លាកលេខ ឬគ្មានឯកសារគ្រប់គ្រាន់។
ប្រតិបត្តិការនេះធ្វើឡើងកាលពីវេលាម៉ោង៦ល្ងាច ថ្ងៃទី១៧ មីនានៅលើផ្លូវជាតិលេខ៤កែងផ្លូវអូដឹមកប់ស្រូវក្នុងភូមិព្រៃស្វាយ សង្កាត់ចោមចៅ ខណ្ឌដង្កោ រាជធានីភ្នំពេញ។ ក្នុងពេលនោះ កំលាំងគណៈបញ្ជាការឯកភាពខណ្ឌស្ទាក់ចាប់បានរថយន្តធុនធំដែលមានលក្ខណៈមិនគ្រប់គ្រាន់ ចាស់ៗ ជាពិសេសកង់ត្រងោល អស់ក្រឡាដែលងាយនឹងបែកក្រឡាប់ ឬបង្កគ្រោះថ្នាក់ដល់អ្នកដទៃ។ ក្រៅពីនេះមានរថយន្តខ្លះកែភ្លៅគ្មានប្រព័ន្ធហ្វ្រាំងត្រឹមត្រូវ ហើយត្រូវកំលាំងស្ទាក់ចាប់បានចំនួន២០គ្រឿង ក្នុងនោះរថយន្តចំនួន១៣គ្រឿងត្រូវឃាត់ទុកម្តុំរង់ចាំគោលការណ៍របស់លោកអភិបាលរាជធានីភ្នំពេញ និងរថយន្តចំនួន៧គ្រឿងទៀតអប់រំណែនាំរួចទើបលែងឱ្យទៅវិញ។
មន្ត្រីមួយរូបនិយាយថា នៅពេលកំពុងធ្វើការនោះមានរថយន្តដឹកជ្រូក១គ្រឿងចេញពីមណ្ឌលផ្គត់ផ្គង់សត្វត្រពាំងក្រសាំងបើកទៅដល់ ហើយរថយន្តនោះដឹកជ្រូកពេញកំពស់ប្រមាណ៤ម៉ែត្រ និងមានមនុស្សជិះពីលើទៀតផង។ មិនតែប៉ុណ្ណោះរថយន្តនោះអត់ពាក់ស្លាកលេខខាងក្រោយទេ គឺមានតែស្លាកលេខមុខប៉ុណ្ណោះ។ ពេលនោះកំលាំងបានចាប់ ហើយមួយសន្ទុះប៉ុណ្ណោះមានអន្តរាគមន៍ពីឧកញ៉ាដែលជាថៅកែដោយខ្លាចសមត្ថកិច្ចឃាត់រថយន្តនោះទុកយូរ។ តាមពិតរថយន្តនោះមានស្លាកលេខក្រោយដែរ ប៉ុន្តែស្លាកលេខនោះធ្វើយូរហើយមិនព្រមពាក់ គឺទុកនៅក្នុងកាប៊ីន សូម្បីតែចោះរន្ធក៏មិនចោះផង ។ បន្ទាប់ពីកំលាំងជំនាញអប់រំរួចក៏ឱ្យត្រឡប់ទៅវិញ។
មន្ត្រីដដែលបន្តទៀតថា រថយន្តខ្លះចាស់ៗបើកអត់ចង់ទៅមុខទេ រីឯកង់វិញសឹកអស់ក្រឡាឡើងត្រងោលដូចជាក្បាលទំពែកចេញអំបោះ ចេញលួស រង់ចាំតែថ្ងៃផ្ទុះប៉ុណ្ណោះ ឯប្រព័ន្ធហ្វ្រាំងក៏មិនល្អដែរ ប៉ុន្តែម្ចាស់ក្រុមហ៊ុនដឹកជញ្ជូនមិនព្រមផ្លាស់ប្តូរ ឬរៀបចំឱ្យបានស្រួលបួលទេ ។ ពេលកងកំលាំងឃាត់ត្រួតពិនិត្យគេចេញមុខសុំអន្តរាគមន៍ដោះលែងគួរឱ្យធុញទ្រាន់បំផុត។ លោកគិត សុផា អភិបាលខណ្ឌដង្កោថ្លែងថា ការចាប់រថយន្តគឺដើម្បីត្រួតពិនិត្យគុណភាពអនុវត្តតាមអនុសាសន៍របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលកន្លងមកសម្តេចតែងមានប្រសាសន៍ដាស់តឿនដល់ក្រុមហ៊ុនដឹកជញ្ជូនទាំងអស់ឱ្យត្រួតពិនិត្យពីគុណភាពរថយន្តរបស់ខ្លួនឱ្យបានត្រឹមត្រូវ ព្រោះមានក្រុមហ៊ុនដឹកជញ្ជូនខ្លះប្រើរថយន្តចាស់ៗបង្កគ្រោះថ្នាក់ជាញឹកញាប់។
លោកអភិបាលខណ្ឌបន្តទៀតថា ទោះបីជាបែបនេះក្តី គឺនៅមានក្រុមហ៊ុនដឹកជញ្ជូនខ្លះមិនគោរព និងអនុវត្តតាមឡើយនៅតែប្រើរថយន្តចាស់ៗ ជាពិសេសសំបកកង់ចាស់ៗដែលងាយនឹងផ្ទុះបង្កគ្រោះថ្នាក់ដល់អាយុជីវិតប្រជាពលរដ្ឋ ឬសម្បត្តិសាធារណៈគ្រប់ពេលវេលា។ ដើម្បីអនុវត្តតាមប្រសាសន៍របស់សម្តេចនោះគណៈបញ្ជាការឯកភាព ខណ្ឌដង្កោឃាត់រថយន្តបានជាច្រើនគ្រឿង ក្នុងនោះ១៣គ្រឿងចាប់ទុកម្តុំរង់ចាំការសំរេចរបស់លោកអភិបាលរាជធានីភ្នំពេញ ។ រថយន្តទាំងនោះជារថយន្តចាស់ៗប្រើសំបកកង់ចាស់ៗ លើសម៉ែត្រ គ្មានឯកសារគ្រប់គ្រាន់ ។ ដោយឡែករថយន្ត៧គ្រឿងទៀតមានលក្ខណៈគ្រប់គ្រាន់ហើយ ប៉ុន្តែផ្ទុកទំនិញខ្ពស់ ហើយមានមនុស្សជិះនៅលើនោះទៀតត្រូវអប់រំរួចដោះលែងវិញ។ លោកអភិបាលខណ្ឌបញ្ជាក់ថា ប្រតិបត្តិការនេះ គឺធ្វើតាមរបៀបភ្លៀងរលឹម មិនមែនធ្វើម្តងនេះហើយឈប់នោះឡើយ ៕
ចែករំលែកព័តមាននេះ