រាជធានីភ្នំពេញ ៖ ស្របពេលប្រជាពលរដ្ឋកម្ពុជាកាន់តែមានកម្រិតជីវភាពប្រសើរឡើងជាងមុន វិនិយោគិនក្នុងស្រុកមួយចំនួនបានសហការជាមួយវិនិយោគិនបរទេស នាំយកនូវស្តង់ដាផ្សារទំនើបល្បីៗមកកាន់
រាជធានីភ្នំពេញ ៖ ស្របពេលប្រជាពលរដ្ឋកម្ពុជាកាន់តែមានកម្រិតជីវភាពប្រសើរឡើងជាងមុន វិនិយោគិនក្នុងស្រុកមួយចំនួនបានសហការជាមួយវិនិយោគិនបរទេស នាំយកនូវស្តង់ដាផ្សារទំនើបល្បីៗមកកាន់កម្ពុជា ។ ការនាំយកស្តង់ដាពីប្រទេសក្រៅនេះ ក៏បានធ្វើឱ្យផ្សារទំនើបរបស់កម្ពុជា ដែលកាលពីមុនមានភាពពេញនិយម កំពុងស្ងប់ស្ងាត់ ហើយប្រឈមនឹងការបាត់ចំណែកទីផ្សារផងដែរ ដោយសារយុវវ័យ និងប្រជាពលរដ្ឋក្នុងរាជធានីភ្នំពេញ បានងាកទៅរកផ្សារទំនើបបរទេសវិញ ក្នុងនោះក៏មានអាជីវករមួយចំនួនផងដែរ ។
កាលពីពេលថ្មីៗនេះ លោកឧកញ៉ា លី យ៉ុងផាត់ បានសហការជាមួយវិនិយោគិនថៃ នាំយកផ្សារទំនើបបោះដុំដ៏ធំរបស់ថៃមកកាន់ប្រទេសកម្ពុជា គឺផ្សារទំនើបម៉ាក្រូ ដែលមានលក់ទំនិញថៃគ្រប់ប្រភេទ ។ ការនាំយកផ្សារទំនើបនេះមកកាន់កម្ពុជា នឹងធ្វើប្រជាពលរដ្ឋមួយចំនួន ដែលកន្លងមកធ្លាប់ទៅប្រទេសថៃ ដើម្បីយកទំនិញមកចែកចាយក្នុងស្រុក អាចនឹងកាត់បន្ថយការធ្វើដំណើរទៅកាន់ប្រទេសថៃ ដោយគ្រាន់តែមករាជធានីភ្នំពេញ និងយកទំនិញទៅចែកចាយបន្តតាមខេត្តប្រតិបត្តិរបស់ខ្លួន ។
ដោយឡែក កាលពីចុងខែកក្កដានេះដែរ អ្នកឧកញ៉ា គិត ម៉េង ក៏បានចុះកិច្ចព្រមព្រៀង លើការបង្កើតផ្សារទំនើបមួយមកពីប្រទេសកូរ៉េ នៅកម្ពុជាផងដែរ ។ ដូចនេះ តាមរយៈកិច្ចព្រមព្រៀងនេះដែរ កម្ពុជានឹងមានផ្សារទំនើបមួយទៀតនៅពេលខាងមុខឆាប់នេះ ស្របពេលផ្សារទំនើបរបស់ម៉ាឡេស៊ី (ផាកសុន) និងផ្សារទំនើបអុីអន២ នឹងបើកដំណើរការនៅពេលឆាប់ៗខាងមុខ ។
លោកស្រី ជា សុខហៀក នាយកប្រតិបត្តិក្រុមហ៊ុន Sorya Center Point ដែលគ្រប់គ្រងផ្សារទំនើបសុវណ្ណា និងផ្សារទំនើបសូរិយា បានឱ្យដឹងថា ជាការពិត នៅពេលដែលមានផ្សារទំនើបបរទេសចូលមកក្នុងស្រុក ចំនួនអតិថិជនគាំទ្រផ្សារទំនើបក្នុងស្រុកបានធ្លាក់ចុះបន្តិចមែន តែវាមិនជាការបារម្ភទេ ។ ដោយសារតែកត្តាទាំងអស់នេះហើយ ទើបផ្សារទំនើបសូរិយា និងសុវណ្ណា បានកែលម្អសោភ័ណភាពផ្នែកខាងក្នុងមួយចំនួនដើម្បីទាក់ទាញអតិថិជនត្រឡប់មកវិញ ។
លោកស្រីបន្តថា ៖« ការប្រកួតប្រជែងវាពិតជាមាន នៅពេលវត្តមានផ្សារទំនើបពីបរទេសចូលមកក្នុងស្រុកយើង ក៏ប៉ុន្តែក្នុងសេដ្ឋកិច្ចទីផ្សារសកល យើងមិនអាចហាមគេ (ផ្សារបរទេស) មិនឱ្យមកវិនិយោគនៅក្នុងស្រុកយើងបានទេ ។ គេមកនេះ គឺមានន័យថា ស្រុកយើងរីកចម្រើនជាងមុន កម្រិតជីវភាពពលរដ្ឋល្អជាងមុន ។ ម្យ៉ាងទៀត ការមកដល់នៃផ្សារទំនើបធំៗនៅក្នុងព្រះរាជាណាចក្រកម្ពុជា ក៏វាបង្ហាញពីកំណើនការវិនិយោគនៅក្នុងប្រទេសយើងផងដែរ » ។
លោកស្រីបញ្ជាក់ថា ចំពោះផ្សារទំនើបសូរិយា និងសុវណ្ណា ដែលកំពុងជួសជុលកែលម្អ នៅពេលរួចរាល់ហើយសង្ឃឹមថា នឹងអាចទាក់ទាញភ្ញៀវជាតិ និងអន្តរជាតិកាន់តែច្រើនឡើងវិញ បើទោះបីជាចំនួនភ្ញៀវចូលផ្សារមិនច្រើនដូចកាលពី១០ឆ្នាំមុនក្តី ប៉ុន្តែយ៉ាងណា ក៏នឹងល្អប្រសើរជាងពេលបច្ចុប្បន្ន ។ អ្វីដែលផ្សារក្នុងស្រុកត្រូវរៀបចំការប្រកួតប្រជែងជាមួយផ្សារទំនើបបរទេស គឺត្រូវពង្រឹងសេវាកម្ម និងសោភ័ណភាពឱ្យល្អ នៅពេលនោះ នឹងមានអ្នកចាប់អារម្មណ៍ត្រឡប់មកវិញ ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងការអភិវឌ្ឍរបស់ក្រុមហ៊ុន Emerging Markets Consulting បានឱ្យដឹងថា សម្រាប់ពេលបច្ចុប្បន្ននេះ ការយកផ្សារទំនើបបរទេសមកកាន់កម្ពុជា គឺជារឿងល្អ ព្រោះវានឹងផ្ដល់បទពិសោធន៍ល្អៗលើវិស័យផ្សារទំនើប ពីរបៀបគ្រប់គ្រង និងប្រតិបត្តិការផ្សារទំនើបទាំងនោះ ។ លោកនិយាយថា ៖« ការយកផ្សារទំនើបពីខាងក្រៅមកក្នុងប្រទេសយើង នឹងជួយបង្រៀនធនធានមនុស្សរបស់កម្ពុជាពីការគ្រប់គ្រង និងដំណើរការផ្សារទំនើបដើម្បីឱ្យបានបទពិសោធន៍សម្រាប់ពេលអនាគត » ។
លោកបន្តថា ការមកដល់របស់ផ្សារទំនើបធំៗទាំងនោះ គឺស្របពេលប្រជាពលរដ្ឋកម្ពុជាមួយចំនួនពេញនិយមលើសម្ភារ និងផលិតផលមានម៉ាកយីហោល្បីៗ ឬគេហៅថា ខ្មែរចូលចិត្តស៊ីប្រែន ។ បើតាមយោបល់លោកផ្ទាល់ ការបង្កើតផ្សារក្នុងស្រុក និងយកពីក្រៅ លោកថា គួរយកពីខាងក្រៅសិន ដើម្បីបានបទពិសោធន៍ហើយចាំបើកខ្លួនឯង ក៏មិនទាន់ហួសពេលដែរ ។
ពលរដ្ឋរស់នៅរាជធានីភ្នំពេញ លោកផល សម្បត្តិ បានឱ្យដឹងថា ការកើនឡើងនៃផ្សារទំនើបបច្ចុប្បន្ន កំពុងបង្ហាញពីការរីកចម្រើន និងការអភិវឌ្ឍ ជាពិសេសជីវភាពប្រជាពលរដ្ឋកាន់តែប្រសើរឡើង ហើយក៏ឆ្លុះបញ្ចាំងពីសន្ដិភាព និងស្ថិរភាពនៃប្រទេសកម្ពុជាផងដែរ ។
លោកថា ៖« វាជារឿងមួយល្អដែលកម្ពុជាមានផ្សារទំនើបលំដាប់អន្តរជាតិច្រើន ហើយពលរដ្ឋដែលផ្សារទំនើបភាគច្រើនគឺដើម្បីលំហែកាយ និងកម្សាន្តអារម្មណ៍ ដូចជា មើលកុន ពិសាអាហារបែបទំនើបៗ និងទិញទំនិញម៉ាកល្បីៗជាដើម ។ ចំណែកផ្សារទំនើបក្នុងស្រុក ប្រសិនបើមិនរៀបចំកែលម្អ និងមានអ្វីប្លែកទេ ថ្ងៃក្រោយអាចបាត់ចំណែកទីផ្សារច្រើន ព្រោះសម័យឥឡូវគេត្រូវការទំនើបកម្ម » ។
យោងតាមការសិក្សារបស់ក្រុមហ៊ុនប៊ុណ្ណារៀលធីគ្រុប ដែលបានបញ្ចប់កាលពីពេលថ្មីៗ នេះរកឃើញថា តម្រូវការប្រើប្រាស់ផ្សារទំនើបនៅរាជធានីភ្នំពេញ បានកើនឡើងពី៧៩ដល់៨២%នៅដំណាច់ត្រីមាសទី១ឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន ៕
ចែករំលែកព័តមាននេះ