Manchester City គ្រោងធ្វើដំណើរមកប្រទេសជប៉ុន និងថៃ នៅរដូវក្តៅខាងមុខនេះ
អង់គ្លេស៖ ក្លិបជើងឯកអង់គ្លេស Manchester City គ្រោងនឹងធ្វើដំណើរមកប្រទេសជប៉ុន និងថៃ
អង់គ្លេស៖ ក្លិបជើងឯកអង់គ្លេស Manchester City គ្រោងនឹងធ្វើដំណើរមកប្រទេសជប៉ុន និងថៃ Pre-Season Tour មុនរដូវកាលរដូវក្តៅ នេះបើតាមការចេញផ្សាយរបស់កាសែតអង់គ្លេស Daily Mail ចុះផ្សាយនៅថ្ងៃទី០៣ ខែមករា ឆ្នាំ២០២៣នេះ។
Manchester City គ្រោងនឹងធ្វើដំណើរទៅទស្សនកិច្ចនៅអាស៊ី ដើម្បីជាផ្នែកមួយ នៃការត្រៀមលក្ខណៈរបស់ពួកគេសម្រាប់រដូវកាលក្រោយ ដែលក្រុមរបស់អ្នកចាត់ការ Pep Guardiola នឹងធ្វើដំណើរទៅកាន់តំបន់អាស៊ីចុងបូព៌ា ជាលើកដំបូងចាប់តាំងពីឆ្នាំ២០១៩ ពោលគឺមុនពេលជំងឺរាតត្បាតសាកល។
Daily Mail ចុះផ្សាយថាម្ចាស់ជើងឯក Premier League គ្រោងនឹងធ្វើដំណើរទាំងក្នុងប្រទេសជប៉ុន និងប្រទេសថៃ សម្រាប់ដំណើរទេសចរណ៍រដូវក្តៅរបស់ពួកគេនៅពាក់កណ្តាលខែកក្កដា។ City ស្ថិតនៅក្នុងប្រទេសជប៉ុនជាលើកចុងក្រោយ ដែលពួកគេបានទៅអាស៊ីក្នុងឆ្នាំ 2019 ដោយប្រឈមមុខនឹងក្លិបបុត្រសម្ព័ន្ធ City Football Group គឺសមាជិកលីគកំពូលជប៉ុន Yokohama F. Marinos នៅក្នុងការប្រកួតមិត្តភាពនាកីឡដ្ឋាន Nissan នៃទីក្រុង Yokohama ប្រទេសជប៉ុន។
យ៉ាងណាក្ដី City មិនទាន់បញ្ជាក់គម្រោងនៅឡើយទេ បើទោះបីជាគេរំពឹងថានឹងចំណាយពេលយូរជាងនេះនៅប្រទេសជប៉ុន និងប្រកួតនៅប្រទេសថៃ បន្ថែមទៀត។ ដំណើរកម្សាន្តឆ្លងទ្វីបទៅកាន់ផ្នែកមួយទៀតនៃពិភពលោកនោះ គឺជាកម្មវិធី សម្រាប់ក្លិបយក្សអង់គ្លេស ដែលអាចទាញយកប្រយោជន៍ពីភាពទាក់ទាញរបស់ពួកគេនៅក្នុងតំបន់នោះ។
មុនពេលចាប់ផ្ដើមរដូវកាលនេះ ក្រុមរបស់លោក Guardiola បានធ្លាប់បានធ្វើដំណើរប្រកួតទេសចរណ៍នៅអាមេរិក ដែល ពួកគេប្រឈមមុខនឹងក្លិបដូចជា Club America និង Bayern Munich ជាដើម៕ (ដោយ៖ ភឿង ភារៈ)
ចែករំលែកព័តមាននេះ