រាជធានីភ្នំពេញ ៖ ក្នុងជំនួបប៉ះគ្នាលើកទី១ កីឡាករកម្ពុជា មឿន សុខហ៊ុច ធ្វើបានល្អយ៉ាងខ្លាំងក្នុងការវាយបំបាក់កីឡាករថៃដែលក្មេងពេញកម្លាំង និងមានបច្ចេកទេសខ្ពស់ឱ្យបោះបង់
រាជធានីភ្នំពេញ ៖ ក្នុងជំនួបប៉ះគ្នាលើកទី១ កីឡាករកម្ពុជា មឿន សុខហ៊ុច ធ្វើបានល្អយ៉ាងខ្លាំងក្នុងការវាយបំបាក់កីឡាករថៃដែលក្មេងពេញកម្លាំង និងមានបច្ចេកទេសខ្ពស់ឱ្យបោះបង់ការប្រកួតនៅក្នុងទឹកទី២ ។ ទោះបីយ៉ាងណា កីឡាករថៃបានបង្ហាញអារម្មណ៍មិនអស់ចិត្តឡើយ ដោយបានប្រកាសថានឹងត្រឡប់មកសងសឹកឱ្យបានដាច់ខាត ខណៈកីឡាករកម្ពុជាឆ្លើយតបវិញថារង់ចាំស្វាគមន៍ដោយរីករាយ។
មឿន សុខហ៊ុច និយាយថា ជ័យជម្នះនៅលើសង្វៀនទូរទស្សន៍អាស៊ីអាគ្នេយ៍កាលពីថ្ងៃអាទិត្យទី៣០ កក្កដា លើកីឡាករថៃឈ្មោះ Khun Korngthap បើទោះជាមានអ្នកគាំទ្រភាគច្រើនយល់ថាគឺជារឿងភ្លាត់ស្នៀតរបស់កីឡាករថៃ តែលោកនៅតែចាត់ទុកថា នោះគឺជាជ័យជម្នះដែលលោកធ្វើបានតាមរយៈការប្រើបច្ចេកទេស និងការបញ្ចេញអស់សមត្ថភាព ក្នុងពេលកីឡាករថៃក៏មានសមត្ថភាពមិនធម្មតានៅលើរេញ ។ ក្នុងទឹកទី១លោកថា វាយកីឡាករមិនចុះនោះទេ ដោយសារតែគេល្អកែង និងម៉ាត់ ហើយបើនិយាយពីកម្លាំងក៏ខ្លាំងណាស់ដែរ ដោយឱ្យតែលោកចូលកៀកគឺត្រូវដួលភីងព្រោះតែត្រូវកីឡាករថៃចាប់បោកផ្ដួលនោះផង ។ លោកបង្ហាញអារម្មណ៍ទ័លច្រកម្ដងៗ ជាពិសេសពេលលោកប្រើពេលពេញ៣នាទីក្នុងទឹកទី១ទៅហើយនៅតែរកចំណុចវាយចូលគូប្រកួតមិនបានទៀត ។ គាប់ចួន លោកចង់បានប្រាក់សុទ្ធ១លានរៀលប្រសិនបើផ្ដួលគូប្រកួតឱ្យសន្លប់ ឬឱ្យបោះបង់ការប្រកួតមុនទឹកទី៣នោះ ទើបលោកតែងតែប្រឹងរុលទៅមុខ ។ យ៉ាងណាមិញ អ្នកទស្សនាសុទ្ធតែឃើញគ្រប់គ្នាថា លោករុលចូលច្រើនប៉ុនណា គឺត្រូវកីឡាករថៃវាយកែង និងម៉ាត់ចូលច្រើនប៉ុនហ្នឹង ធ្វើឱ្យអ្នកគាំទ្រអស់សង្ឃឹមថាលោកនឹងអាចទទួលបានទឹកប្រាក់១លានរៀល ។ កីឡាករ មឿន សុខហ៊ុច និយាយថា ក្នុងពេលដាក់កែងក៏មិនចូល ដាក់ម៉ាត់ក៏មិនចូល លោកក៏ប្រើបច្ចេកទេសចុងក្រោយ គឺទាត់ជើងក្រោមដោយក្នុងពេលនោះមិនបានដឹងថាកីឡាករថៃអន់ចន្ទល់នោះឡើយ ។ លោកសារភាពថា កីឡាករថៃឱ្យតែហ៊ានចូលកៀកគឺលោកចាញ់ប្រៀបគេទាំងកែង ម៉ាត់ និងកម្លាំងវាយផ្ដួល ជាក់ស្ដែងក្នុងទឹកទី១ពេលលោកសម្រុកចូលត្រូវកីឡាករថៃវាយត្រូវខ្ចប់ៗចង់ដាច់ផ្ញារ និងដួលច្រងាប់ច្រងិលម្ដងហើយម្ដងទៀត ។ លោកបង្ហាញពីអារម្មណ៍សប្បាយចិត្តដែលការសាកល្បងទាត់ការពារខ្លួនកុំឱ្យកីឡាករថៃមានឱកាសវាយកែង និងចូលកៀកបែរជាហុចផ្លែផ្កាបង្ហាញថានោះជាចំណុចខ្សោយដែលលោកមិនបានដឹងសម្រាប់ជើងខ្លាំងវ័យក្មេងរូបនេះ ។ លោកបានបន្តប្រើជើងទាត់តម្រង់កន្លែងដដែល បន្ទាប់ពីឃើញកីឡាករថៃស្រាប់តែមានអាការរាថយ ព្រោះតែខ្លាចសកម្មភាពទាត់របស់លោក ទើបលោកបន្តទាត់ចូលហើយទាត់កាន់តែខ្លាំងបណ្ដាលឱ្យចន្ទល់ក្រោមរបស់កីឡាករថៃបាក់កណ្ដាលទីមិនអាចបន្តការប្រកួតទៀតបាន ។
កីឡាករថៃ Khun Krongthap បានបង្ហាញអារម្មណ៍មិនអស់ចិត្តបន្ទាប់ត្រូវកីឡាករមឿន សុខហ៊ុច ទាត់ត្រូវចំណុចខ្សោយបណ្ដាលឱ្យបាក់ជំហរក្រោមទាំងមិននឹកស្មាន ។ កីឡាកររូបនេះក៏បានប្រកាសសុំខ្លួនប្រកួតជាថ្មីដោយអះអាងថានឹងការពារជំហរក្រោមឱ្យបានល្អនិងយកឈ្នះឱ្យបានដាច់ខាតសម្រាប់ការប្រកួតលើកក្រោយ ។ លោក ថៃ អ៊ូ អ្នកដឹកនាំកីឡាករថៃឱ្យមកប្រកួតបានអះអាងថា កីឡាកររបស់លោកអត់អស់ចិត្តទេក្នុងពេលដែលគេមានថ្វីដៃល្អហើយមិននឹកស្មានថាកីឡាករកម្ពុជាឆ្លាតរកឃើញចំណុចខ្សោយក្នុងពេលប្រកួតគ្នាបែបនោះ ។
លោកថា កូនសិស្សរបស់លោកនឹងសុំសងសឹក តែលោកមិនទាន់ច្បាស់ថានឹងដាក់ថ្ងៃណានោះទេក្នុងពេលដែលកីឡាកររបស់លោកក៏សុំពេលហ្វឹកហាត់មួយរយៈទៀតសិនមុននឹងទទួលយកការផ្គូផ្គង ។ លោកថា កូនសិស្សរបស់លោកដែលបានចាញ់ទាំងមិនអស់ចិត្តក្រោមដៃមឿន សុខហ៊ុច គឺជាកីឡាករជើងខ្លាំង ប៉ុន្តែមកពីគេប្រហែសរឿងឱ្យកីឡាករកម្ពុជាទាត់ត្រូវផ្ទួនៗទើបបណ្ដាលឱ្យឈឺជើងទប់ខ្លួនលែងជាប់ ។ លោកប៉ាន់ស្មានថា បើមានជំនួបប៉ះគ្នាលើកក្រោយ កីឡាកររបស់លោកនឹងទទួលជោគជ័យដោយលោកជឿថាឱ្យតែទប់កម្លាំងទាត់ផ្នែកខាងក្រោមរបស់កីឡាករមឿន សុខហ៊ុចបាន គឺកីឡាករថៃនឹងអាចមានប្រៀបដោយសារតែកែង និងបច្ចេកទេសម៉ាត់ចេញរបស់គេខ្លាំង ហើយបើនិយាយពីកម្លាំងឱ្យតែហ៊ានចូលកៀកគឺដឹងតែអាចវាយបោក និងរុញច្រានកីឡាករកម្ពុជាបាន ។
លោក ញាណ សុធី អ្នករៀបចំការប្រកួតប្រចាំសង្វៀនទូរទស្សន៍អាស៊ីអាគ្នេយ៍ បានហៅការប្រកួតរបស់កីឡាករទាំងពីរខាងលើថាមានចំណុចទាក់ទាញ ប៉ុន្តែមានរយៈពេលខ្លីពេក ដោយសារតែកីឡាករថៃស្រាប់តែបែកកង់ក្រោមកណ្ដាលទីក្រោយពេលជើងខ្លាំងកម្ពុជារកឃើញចំណុចខ្សោយ ។ លោកមានគម្រោងឱ្យកីឡាករទាំង២ប៉ះគ្នាជាថ្មី ប៉ុន្តែត្រូវពិភាក្សាជាមួយគណៈកម្មការប្រដាល់ និងរង់ចាំរហូតទាល់តែគ្រូបង្វឹកកីឡាករម្ខាងៗប្រាប់ថាពេលណានឹងអាចទទួលឱ្យប៉ះគ្នាជាថ្មីកើតសិន គឺមិនអាចគ្រាន់តែលោកនឹកចង់ហើយអាចកំណត់បានទេ៕
ចែករំលែកព័តមាននេះ