ប៉ូឡូញ ៖ ៤០ប្រទេសអាចធ្វើពហិការកីឡាអូឡាំពិកឆ្នាំ២០២៤ បើរុស្ស៊ី-បេឡារុសមានសិទ្ធិចូលរួម
ប៉ូឡូញ ៖ លោក Kamil Bortniczuk រដ្ឋមន្ត្រីកីឡា និងទេសចរណ៍ប្រទេសប៉ូឡូញ បាននិយាយថា រហូត
ប៉ូឡូញ ៖ លោក Kamil Bortniczuk រដ្ឋមន្ត្រីកីឡា និងទេសចរណ៍ប្រទេសប៉ូឡូញ បាននិយាយថា រហូតដល់៤០ប្រទេស អាចធ្វើពហិការចូលរួមប្រកួតព្រឹត្តិការណ៍កីឡាអូឡាំពិកទីក្រុងប៉ារីស ប្រទេសបារាំង ឆ្នាំ២០២៤ ក្រោយទទួលដំណឹងអំពីគំនិតផ្តួចផ្តើមរបស់គណៈកម្មាធិការអូឡាំពិកអន្តរជាតិ ដើម្បីអនុញ្ញាតឱ្យអត្តពលិករុស្ស៊ី និងបេឡារុស មានសិទ្ធិចូលរួមប្រកួត។ នេះបើយោងតាមប្រភពពីសារព័ត៌មាន BBC ចេញផ្សាយកាលពីថ្ងៃទី០២ ខែកុម្ភៈ ឆ្នាំ២០២៣។ គួររំលឹកថា អូឡាំពិក ២០២៤ ៖ អ៊ុយក្រែនព្រមានធ្វើពហិការ បើអត្តពលិករុស្ស៊ី-បេឡារុសបានសិទ្ធិចូលរួម
ការអត្ថាធិប្បាយរបស់លោក Bortniczuk កើតឡើង បន្ទាប់ពីប្រទេសប៉ូឡូញ លីទុយអានី អេស្តូនី និងឡាតវី (Latvia) បានច្រានចោលផែនការរបស់គណៈកម្មាធិការអូឡាំពិកអន្តរជាតិ ដែលហៅកាត់ថា IOC ដើម្បីអនុញ្ញាតឱ្យជនជាតិរុស្ស៊ី និងបេឡារុស មានសិទ្ធិចូលរួមប្រកួតនៅព្រឹត្តិការណ៍ឆ្នាំ ២០២៤ ។
លើសពីនេះ ប្រទេសអ៊ុយក្រែន ក៏បានគំរា.មធ្វើពហិការផងដែរ ប្រសិនបើមានរឿងនោះកើតឡើងមែន។ ប៉ុន្តែទោះយ៉ាងណា កាលពីថ្ងៃទី០២ ខែកុម្ភៈ IOC បានលើកឡើងថា ការធ្វើពហិការណាមួយ នឹងក្លាយជាការដាក់ទណ្ឌកម្មលើអត្តពលិកតែប៉ុណ្ណោះ។
លោក Bortniczuk ជឿជាក់ថា វាអាចទៅរួចក្នុងការកសាងសម្ព័ន្ធភាពនៃប្រទេសចំនួន៤០ រួមទាំងចក្រភពអង់គ្លេស សហរដ្ឋអាមេរិក និងកាណាដា ដើម្បីគាំទ្រលើការបិទផែនការរបស់ IOC មុនកិច្ចប្រជុំនៅថ្ងៃទី១០ ខែកុម្ភៈ កើតឡើង។ លោកបន្ថែមថា «ដោយគិតពីរឿងនេះ ខ្ញុំមិនគិតថា យើងនឹងប្រឈមមុខនឹងការសម្រេចចិត្តដ៏តឹងតែងមុនព្រឹត្តិការណ៍អូឡាំពិកចាប់ផ្តើម ហើយប្រសិនបើយើងធ្វើពហិការការប្រកួត នោះសម្ព័ន្ធដែលជាផ្នែកតែមួយ នឹងមានលក្ខណៈទូលំទូលាយគ្រប់គ្រាន់ ដើម្បីធ្វើឱ្យការប្រកួតគ្មានន័យ»។
គួររំលឹកថា IOC កាលពីសប្តាហ៍មុន បានប្រកាសថា ខ្លួននឹងរុករកផ្លូវមួយ ដើម្បីអនុញ្ញាតឱ្យអត្តពលិករុស្ស៊ី និងបេឡារុស ចូលរួមប្រកួតព្រឹត្តិការណ៍នៅទីក្រុងប៉ារីស ក្រោមទង់ជាតិអព្យាក្រឹត ដែលទង្វើនេះ បានជំរុញឱ្យមានការថ្កោលទោសយ៉ាងខ្លាំង ដោយរដ្ឋាភិបាលចក្រភពអង់គ្លេស ខណៈបច្ចប្បន្នអ៊ុយក្រែន នៅតែរងគ្រោះយ៉ាងធ្ងន់ធ្ងរ ដោយសារតែសកម្មភាពឈ្លានពានរបស់រុស្ស៊ី ដែលចាប់ផ្តើមដំបូង តាំងពីខែចុងខែកុម្ភៈ ឆ្នាំ២០២២ មកម្ល៉េះ៕
ចែករំលែកព័តមាននេះ