នរណាមិនភ័យ…បើចុចកណ្ដឹងផង គោះទ្វារផងយ៉ាងនេះ(មានវីដេអូ)
រាជធានីភ្នំពេញ ៖ កម្លាំងនគរបាលប៉ុស្ដិ៍ចោមចៅសហការណ៏ជាមួយកម្លាំងនគរបាលខណ្ឌពោធិ៍សែនជ័យបានចុះទៅកាន់ផ្ទះល្វែងមួយកន្លែងដើម្បីអន្តរាគមន៏ភ្លាមៗ
រាជធានីភ្នំពេញ ៖ កម្លាំងនគរបាលប៉ុស្ដិ៍ចោមចៅសហការណ៏ជាមួយកម្លាំងនគរបាលខណ្ឌពោធិ៍សែនជ័យបានចុះទៅកាន់ផ្ទះល្វែងមួយកន្លែងដើម្បីអន្តរាគមន៏ភ្លាមៗ បន្ទាប់ពីមានសេចក្ដីរាយការណ៏មកថា ផ្ទះខាងលើនោះមានតែក្មេងៗចំនួន៣នាក់កំពុងស្ថិតនៅក្នុងនោះ ចំណែកឪពុកម្ដាយរបស់ពួកគេមិននៅព្រោះជាប់រវល់ទៅលក់នំបុ័ង ។ ខណៈនោះស្រាប់តែមានជនមិនស្គាល់មុខម្នាក់បានទៅចុចកណ្ដឹងផង និងគោះទ្វារផង ប៉ុន្តែក្មេងៗទាំងនោះមិនហ៊ានបើកទ្វារឡើយ បាននាំគ្នាសម្ងំនៅក្នុងផ្ទះទាំងការភ័យខ្លាចបំផុតរួចបាននាំគ្នាទូរស័ព្ទទៅប្រាប់ឪពុកម្ដាយ ។ ហេតុការណ៏នោះបានកើតឡើងកាលពីវេលាម៉ោង៣និង៣០នាទី រសៀលថ្ងៃទី៣១ ខែកក្កដា ឆ្នាំ២០១៧ នៅចំណុចផ្ទះលេខ២៤ បុរីជីបម៉ុង ស្ថិតនៅក្នុងភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មានបានឲ្យដឹងថា ម្ចាស់ផ្ទះខាងលើនោះប្ដីឈ្មោះ គឹម សុប៊ែល អាយុ៣៣ឆ្នាំ និងប្រពន្ធឈ្មោះ គឹម សុភ័ណ្ឌ អាយុ៣២ឆ្នាំ ពួកគាត់មានមុខរបរលក់នំបុ័ងដាក់សាច់ ចំណែកកូនរបស់គាត់ដែលស្ថិតនៅក្នុងផ្ទះបីនាក់បងប្អូន ហើយទទួលរងនូវការភិតភ័យនោះទី១-ឈ្មោះ គឹម សុភ័ក្រ ភេទប្រុស អាយុ១២ឆ្នាំ, ទី២-ឈ្មោះ គឹម សុខា ភេទស្រី អាយុ៩ឆ្នាំ និងទី៣-ឈ្មោះ គឹម សុផល ភេទប្រុស អាយុ៣ឆ្នាំ ។
ប្រភពដដែលបានបន្តទៀតថា នៅមុនពេលកើតហេតុម្ចាស់ផ្ទះទាំងពីរនាក់ប្ដីប្រពន្ធនោះបាននាំគ្នាទៅលក់នំបុ័ងដាក់សាច់ដោយបានឲ្យកូនប្រុសស្រីរបស់ពួកគាត់ទាំងបីនាក់នោះនៅផ្ទះហើយមុនពេលចេញទៅពួកគាត់បានផ្ដាំផ្ញើរកូនមិនឲ្យចេញក្រៅផ្ទះឡើយ គឺឲ្យពួកគេស្ថិតនៅតែក្នុងផ្ទះប៉ុណ្ណោះ ដោយបានបិទ្វារខ្ទាស់គន្លឹះពីខាងក្នុង ។ មិនតែប៉ុណ្ណោះពួកគាត់បានប្រាប់កូនថា បើមានមនុស្សប្លែកទៅហៅឬគោះទ្វារហៅឲ្យចេញក្រៅហាមមិនឲ្យចេញដាច់ខាត បន្ទាប់មកទើបគាត់នាំគ្នាចាកចេញទៅលក់ដូរ នៅតាមបណ្ដាមុខរោងចក្រកាត់ដេរនានានៅក្នុងភូមិសាស្ត្រសង្កាត់ចោមចៅនោះ ។ លុះដល់ពេលកើតហេតុខណៈដែលកូនរបស់ពួកគាត់កំពុងស្ថិតនៅក្នុងផ្ទះបីនាក់បងប្អូននោះ ស្រាប់តែមានបុរសមិនស្គាល់មុខ និងអត្តសញ្ញាណម្នាក់បានទៅចុចកណ្ដឹង និងស្រែកហៅព្រមទាំងគោះទ្វារ ប៉ុន្តែកូនៗរបស់ពួកគាត់មិនបើកទ្វារនោះឡើយហើយពួកគេមានការភ័យខ្លាចយ៉ាងខ្លាំង ។ ពួកគេបាននាំគ្នាសម្ងំនៅក្នុងផ្ទះមិនហ៊ានមាត់តបវិញទេ ក្រោយមកបានទូរស័ព្ទប្រាប់ឪពុកម្ដាយបានដឹងទើបពួកគាត់ត្រឡប់ទៅផ្ទះវិញបន្ទាប់មកម្ចាស់ផ្ទះខាងលើបានរាយការណ៏តាមដំណើររឿងជូននគរបាលឲ្យជួយអន្តរាគមន៏បង្កឲ្យមានការភ្ញាក់ផ្អើលទាំងថ្ងៃ ដោយពួកគាត់បានផ្តោតសំខាន់ទៅលើជនមិនស្គាល់មុខចង់ចាប់កូនគាត់តែម្ដង ព្រោះពេលនេះកំពុងមានពាក្យចចាមអារ៉ាមពីរឿងចាប់ក្មេងនេះស្ទើរគ្រប់កន្លែងដែលជនអគតិមួយចំនួនតូចតែងតែប្រឌិតឡើងស្រាប់ផង ។
ប្រភពខាងលើនោះបានបន្តថា ក្រោយពេលមានការរាយការណ៏គួរឲ្យមានការភ្ញាក់ផ្អើលបែបនេះកម្លាំងនគរបាលប៉ុស្ដិ៍ចោមចៅសហការណ៏ជាមួយកម្លាំងនគរបាលខណ្ឌពោធិ៍សែនជ័យបានចុះទៅកាន់ផ្ទះល្វែងមួយកន្លែងនោះដើម្បីអន្តរាគមន៏ភ្លាមៗ ។ ប៉ុន្តែពេលទៅដល់មិនឃើញជនសង្ស័យនោះទេ ។ នគរបាលក៏មិនទាន់បានសន្និដ្ឋានថាជាករណីពិតប្រាកដនៅឡើយដោយគ្រាន់តែទទួលពាក្យបណ្ដឹងសរសេររបាយការណ៏ទៅតាមអ្វីដែលបានកើតឡើងជាក់ស្ដែងតែប៉ុណ្ណោះ និងរង់ចាំការស្រាវជ្រាវបន្តទៀត ៕
ចែករំលែកព័តមាននេះ