ខេត្តត្បូងឃ្មុំ ៖ លំនៅឋានរបស់ប្រជាពលរដ្ឋរាប់រយខ្នងនៅស្រុកត្បូងឃ្មុំ និងស្រុកក្រុចឆ្មារ ត្រូវបានទឹកទន្លេមេគង្គឡើងមកជន់លិចដល់ក្រោមផ្ទះ ថែមទាំងហូរឡើងត្របា.ញ់ថែមទៀត។ ក្នុងនោះមានផ្ទះខ្លះ
ខេត្តត្បូងឃ្មុំ ៖ លំនៅឋានរបស់ប្រជាពលរដ្ឋរាប់រយខ្នងនៅស្រុកត្បូងឃ្មុំ និងស្រុកក្រុចឆ្មារ ត្រូវបានទឹកទន្លេមេគង្គឡើងមកជន់លិចដល់ក្រោមផ្ទះ ថែមទាំងហូរឡើងត្របាញ់ថែមទៀត។ ក្នុងនោះមានផ្ទះខ្លះត្រូវបានបង្ខំចិត្តរុះរើ និងខ្លះទៀតបិទទ្វារផ្ទះចាក់សោទៅរស់នៅទីទួលសុវត្ថិភាពជាបណ្តោះអាសន្ន ដោយសារតែខ្លាចត្រូវទឹកកួចរលំផ្ទះ បណ្តាលឲ្យគ្រោះថ្នាក់ដល់ជីវិត។
បុរសឈ្មោះ ណូ កៃ អាយុ៤៨ឆ្នាំ នៅភូមិព្រែកតូច ឃុំជីរោទ៏ទី១ ស្រុកត្បូងឃ្មុំ ប្រាប់ឲ្យដឹងនៅរសៀលថ្ងៃទី២៩ កក្កដាថា ផ្ទះឈើរបស់គាត់មានទំហំ៤ម៉ែត្របួនជ្រុងប្រក់ស័ង្កសី នៅតាមជួរដងទន្លេត្រូវទឹកឡើងមកលិចចំនួន២ថ្ងៃហើយមិនអាចឲ្យអ្នកណាម្នាក់ហ៊ាននៅលើផ្ទះតទៅទៀតនោះទេ ព្រោះតែទឹកលិចដល់ក្រោមផ្ទះ ថែមទាំងហូរឡើងត្របាញ់ថែមទៀត ហើយក៏ជញ្ជូនរបស់ទ្រព្យដឹកតាមរ៉ឺម៉កម៉ូតូយកទៅដាក់នៅទីទួលសុវត្ថិភាពនៅឃុំទន្លេបិទ។
ស្ត្រីមេម៉ាយកូន៣នាក់ ឈ្មោះ ស្នាស់ សៃណុប អាយុ៥៤ឆ្នាំ នៅភូមិព្រែកតូច ប្រាប់ថា ផ្ទះរបស់គាត់ត្រូវទឹកទន្លេមេគង្គឡើងមកលិច៣ថ្ងៃដោយមិនអាចនៅកើតនោះទេ នៅរសៀលថ្ងៃទី២៩ គាត់ត្រូវដើរមកមើលទួលសុវត្ថិភាព ដើម្បីរកទីតាំងសម្រាប់ធ្វើរោងនៅជាបណ្តោះអាសន្ន ។ ជាមួយគ្នានោះគាត់ព្រួយបារម្ភកៅស៊ូតង់ប្រក់ទាប ហើយក្តៅអាចនឹងធ្វើឲ្យកូនតូចៗរបស់គាត់ប្រឈមនឹងជំងឺផ្សេងៗ ហើយមិនមានទឹកស្អាតសម្រាប់ប្រើនោះទេ ថែមទាំងមិនមានទាន់មានបង្គន់អនាម័យសម្រាប់បត់ជើង និងការលក់ដូរក៏មិនបានរកស៊ីទៀត ធ្វើឲ្យជីវភាពគាត់ត្រូវជួបនឹងកង្វះខាត។
លោកវរសេនីយ៍ទោ សាំ ហេង បានឲ្យដឹងថា ដោយមានការណែនាំពីលោកឧត្តមសេនីយ៍ទោ បែន រ័ត្ន ស្នងការនគរបាលខេត្ត កម្លាំងអធិការដ្ឋាននគរបាលស្រុកបានសហការជាមួយនឹងប៉ុស្តិ៍រដ្ឋបាលស្វាយឃ្លាំង ប៉ុស្តិ៍រដ្ឋបាលក្រូចឆ្មារ ចុះជួយរុះរើលំនៅឋានប្រជាពលរដ្ឋចំនួន៦ផ្ទះដែលប្រឈមនឹងបាក់ធ្លាក់ចូលទន្លេ ទៅកាន់កន្លែងសុវត្ថិភាពឆ្ងាយពីច្រាំងទន្លេ ។
លោកកូប ឡេស អាយុ៥៦ឆ្នាំ មេភូមិព្រែកតូច មានប្រសាសន៍ថា គ្រាន់តែប្រជាពលរដ្ឋនៅភូមិរបស់គាត់ត្រូវនាំគ្នាមករស់នៅទីទួលសុវត្ថិភាពរបស់ឧកញ៉ាសេតក្នុងឃុំទន្លេបិទ ដែលគិតត្រឹមរសៀលថ្ងៃទី២៩ កក្កដា មានចំនួន៨១គ្រួសារ រួមនឹងភូមិចំនួន៣ទៀតនៅឃុំទន្លេបិទ ឃុំជីរោទ៏ទី១ មានរហូតដល់ទៅរាប់រយគ្រួសារ កំពុងតែស្ថិតនៅលើទួលសុវត្ថិភាព៣កន្លែង ក្នុងនោះមាន ១-ទួលឧកញ៉ាឌី ២-ទួលឧកញ៉ាសេត ៣-ទួលខ្សាច់ឃុំទន្លេបិទ។ រូបលោកកំពុងតែស្រង់យកទិន្នន័យ ដើម្បីសុំអំណោយចែកជូនពលដ្ឋ ហើយលោកព្រួយបារម្ភមិនមានទឹកស្អាតសម្រាប់ប្រើប្រាស់នោះទេ សូមឲ្យអង្គភាពពាក់ព័ន្ធមេត្តាជួយដល់ពលរដ្ឋផង ។
ចែករំលែកព័តមាននេះ