រថយន្តសង្គ្រោះបន្ទាន់បុករថយន្តក្រសួងការពារជាតិចូលភោជនីយដ្ឋាន
រាជធានីភ្នំពេញ ៖ រថយន្តសង្គ្រោះបន្ទាន់របស់មន្ទីរពហុព្យាបាល និងសម្ភព
រាជធានីភ្នំពេញ ៖ រថយន្តសង្គ្រោះបន្ទាន់របស់មន្ទីរពហុព្យាបាល និងសម្ភពសុខ លាភ មេត្រី ប្រញាប់ទៅដឹកអ្នករបួសករណីគ្រោះថ្នាក់ចរាចរណ៍បើកលឿនពេលមកដល់ផ្លូវបំបែកជា៤ចាប់ហ្វ្រាំងមិនទាន់ជ្រុលទៅបុករថយន្តឡិចស៊ីសជារថយន្តរបស់ក្រសួងការពារជាតិខ្ទាតទៅបុកចូលភោជនីយដ្ឋាន មយ៉ូរា ៣៦០ ចំណែករថយន្តក្រឡាប់រងរបួសស្រាលអ្នកបើកបរ ដែលគ្រោះថ្នាក់ចរាចរណ៍នេះកើតឡើងនៅវេលាម៉ោង២និង៥០នាទីរំលងអធ្រាត្រឈានចូលថ្ងៃទី៣០ ខែកក្កដា ឆ្នាំ២០១៧ នៅចំណុចមុខភោជនីយដ្ឋាន មយូរ៉ា ៣៦០ តាមផ្លូវ៣៦០កែងផ្លូវ១០៥ ស្ថិតនៅភូមិ៧ សង្កាត់បឹងកេងកងទី៣ ខណ្ឌចំការមន ។
ប្រភពព័ត៌មានពីអ្នកឃើញហេតុការណ៍បានប្រាប់អ្នកយកព័ត៌មានថា មុនកើតហេតុមានរថយន្តសង្គ្រោះមន្ទីរពហុព្យាបាល និងសម្ភព សុខ លាភមេត្រី បើកបរក្នុងល្បឿនយ៉ាងលឿនតាមផ្លូវ៣៦០ក្នុងទិសដៅពីកើតទៅលិច ចំណែករថយន្តឡិចស៊ីស RX400 ពណ៌ត្រេអ៊ី ពាក់ស្លាកលេខ ខេមរភូមិន្ទ01 2-8024 ជារថយន្តរបស់ក្រសួងការពារជាតិ បើកបរដោយបុរសម្នាក់តាមផ្លូវ១០៥ក្នុងទិសដៅពីត្បូងទៅជើង មកដល់ចំណុចកើតហេតុបានបើកឆ្លងកាត់ទទឹងផ្លូវបានពាក់កណ្ដាល ស្រាប់តែរថយន្តសង្គ្រោះប្រញាប់ទៅដឹកអ្នករបួសករណីគ្រោះថ្នាក់ចរាចរណ៍បើកលឿនពេកចាប់ហ្វ្រាំងមិនទាន់ជ្រុលទៅបុករថយន្តឡិចស៊ីសពេញ ទំហឹងធ្វើឲ្យរថយន្តឡិចស៊ីសរេចង្កូតចូលទៅបុកស្លាកភោជនីយដ្ឋាន មយ៉ូរា ៣៦០ បាក់រាន ទេវតា បាក់ទ្វារហាង និងបាក់ខូចខាតសម្ភារមួយចំនួនទៀត ចំណែករថយន្តបង្កក្រឡាប់ផ្ងារជើងធ្វើឲ្យអ្នកបើករថយន្តសង្គ្រោះរបួសបែកចិញ្ចើមបន្តិចឡើងម៉ូតូឌុបទៅមន្ទីរពេទ្យដោយខ្លួនឯង ។
ក្រោយកើតហេតុភាគីទាំងសងខាងមិនអាចចរចាគ្នាបានសមត្ថកិច្ចបានចុះទៅវាស់វែងយក រថយន្តទាំងពីរគ្រឿងទៅរក្សាទុកនៅការិយាល័យនគរបាលចរាចរណ៍ផ្លូវគោករង់ចាំធ្វើការដោះស្រាយតាមផ្លូវច្បាប់ ៕
ចែករំលែកព័តមាននេះ