អាល្លឺម៉ង់-ម៉ាលី ៖ អ.ស.ប និងអាល្លឺម៉ង់រាយការណ៍ថា ទាហានមួកខៀវជនជាតិអាល្លឺម៉ង់២នាក់ស្លាប់កាលពីថ្ងៃទី២៦ កក្កដា ដោយសារការធ្លាក់ឧទ្ធម្ភាគចក្រពួកគេនៅភាគខាងជើងប្រទេសម៉ាលី ខណៈការប៉ះទង្គិចគ្នាថ្មីៗផ្ទុះឡើងក្នុងប្រទេសនេះដែលមានអស្ថេរភាពបំផុត ។
ឧទ្ធម្ភាគចក្រជួបគ្រោះថ្នាក់នេះជារបស់កងឯកភាពអាល្លឺម៉ង់ស្ថិតក្នុងបេសកកម្ម អ.ស.ប នៅម៉ាលី MINUSMA ។
ក្នុងសេចក្តីប្រកាសខ្លីមួយ កាលពីល្ងាចថ្ងៃទី២៦ កក្កដា នៅក្រុងប៊ែរឡាំង លោកស្រី URSULA VON DER LEYEN រដ្ឋមន្ត្រីការពារប្រទេសអាល្លឺម៉ង់ថ្លែងថា យើងទទួលព័ត៌មានច្បាស់ ដែលថា ទាហានរបស់យើង២នាក់ស្លាប់នៅម៉ាលី ។
មុននេះក្នុងសេចក្តីប្រកាសមួយ MINUSMA និយាយថា ឧទ្ធម្ភាគចក្រមួយរបស់បេសកកម្ម អ.ស.ប បានធ្លាក់នៅភាគខាងត្បូងក្រុង TABANKORT ក្នុងតំបន់ GAO ។ មានទាហានមួកខៀវ២នាក់ ដែលជាសមាជិកក្រុមយានិកជិះក្នុងឧទ្ធម្ភាគចក្រនេះ ហើយគួរឱ្យសោកស្តាយពួកគេត្រូវស្លាប់ទាំងអស់ ។
ព័ត៌មានដំបូងៗរៀបរាប់ពីបញ្ហាបច្ចេកទេសរួចការស៊ើបអង្កេតនឹងកំណត់ពីមូលហេតុពិតប្រាកដនៃការធ្លាក់ឧទ្ធម្ភាគចក្រនេះ ។
កាលពីខែមីនា ឆ្នាំ២០១៥ ទាហានហូឡង់២នាក់របស់ MINUSMA បានត្រូវស្លាប់ក្នុងគ្រោះថ្នាក់ឧទ្ធម្ភាគចក្រមួយជិតតំបន់ GAO ម៉ាលី ។
ភាគខាងជើងប្រទេសម៉ាលី កាលពីខែមីនាមក មេសា ឆ្នាំ២០១២ ធ្លាក់ក្នុងដៃបណ្តាក្រុមជីហាដមានទំនាក់ទំនងជាមួយអាល់កៃដា ហើយពួកនោះត្រូវបានវាយបណ្តេញចេញពីផ្នែកមួយធំ ដោយសារប្រតិបត្តិការយោធាអន្តរជាតិនាខែមករា ឆ្នាំ២០១៣ តាមការផ្តួចផ្តើមគំនិតរបស់បារាំងរួចប្រតិបត្តិការនេះនៅបន្ត ៕
ចែករំលែកព័តមាននេះ