ខេត្តកណ្តាល ៖ ទោះបីជាគេមិនទាន់អាចប៉ាន់ស្មានបាននូវចំនួនភ្ញៀវទេសចរចូលទៅកម្សាន្តតាមបណ្តារមណីយដ្ឋានក្នុងស្រុកកៀនស្វាយ តែលោកអភិបាលស្រុកបានអះអាងថា ភ្ញៀវទេសចរឆ្នាំនេះមានការកើនឡើង សំខាន់ភ្ញៀវទេសចរជាតិ និងអន្តរជាតិ អញ្ជើញចូលមកលំហែកាយ និងកម្សាន្តជាលក្ខណៈគ្រួសារនៅរមណីយ ដ្ឋានវត្តកៀនស្វាយក្រៅ ស្ថិតក្នុងឃុំភូមិធំ ។
លោកហេង ធៀម អភិបាលស្រុកកៀនស្វាយ បានមានប្រសាសន៍ថា ទិដ្ឋភាពនៃការកម្សាន្តសប្បាយរបស់ប្រជាពលរដ្ឋទូទាំងស្រុកឆ្នាំនេះមានភាពអធិកអធមជាងបណ្តាឆ្នាំកន្លងទៅ ហើយគ្រោះថ្នាក់ផ្សេងៗក៏មានការថយចុះគួរឱ្យកត់សម្គាល់ផងដែរ ។ អ្វីជាការចាប់អារម្មណ៍បំផុតនោះគឺចំនួនភ្ញៀវទេសចរនៅតាមរមណីយ ដ្ឋានហាក់មានការកើនឡើង សំខាន់រមណីយដ្ឋានធម្មជាតិវត្តកៀនស្វាយក្រៅតែម្តង ។
លោកបញ្ជាក់ថា អ្វីដែលធ្វើឱ្យចំនួនភ្ញៀវទេសចរកើនឡើងខ្ពស់នោះគឺ មកពីកត្តាជាច្រើនក្នុងនោះរួមមានប្រទេសជាតិទទួលបានសុខសន្តិភាពគ្រប់គ្រាន់ ការការពារសន្តិសុខបានល្អ និងមានសណ្តាប់ធ្នាប់ គ្រប់ផ្លូវអាចធ្វើចរាចរណ៍ដោយងាយស្រួល ការគ្រប់គ្រងបាននូវតម្លៃម្ហូបអាហារ សុវត្ថិភាពគ្រប់គ្រាន់សម្រាប់ភ្ញៀវ រួមទាំងការថែរក្សាអនាម័យក៏បានល្អផងដែរ ។ លោកអភិបាលស្រុកបានសម្តែងនូវមោទនភាពថា ទាំងអស់នោះគឺបានមកពីការដឹកនាំដ៏ត្រឹមត្រូវឈ្លាសវៃ និងប្រកបដោយគតិបណ្ឌិតរបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
ភ្ញៀវទេសចរដែលបានទៅកម្សាន្តនៅរមណីយដ្ឋានវត្តកៀនស្វាយក្រៅបាននិយាយថា ឆ្នាំនេះហាក់ដូចជាមានការខុសប្លែកពីបណ្តាឆ្នាំមុនៗ អំពីចំនួនភ្ញៀវដែលមកកាន់ទីនេះ ព្រោះរយៈពេលប៉ុន្មានថ្ងៃចូលឆ្នាំនេះ មានភ្ញៀវទេសចរខ្លះត្រូវវិលត្រឡប់ទៅវិញ ដោយសារតែគ្មានកន្លែងចំណតរថយន្ត ព្រោះទីធ្លាសម្រាប់ចំណតរថយន្តពេញអស់ទៅហើយ ។ ម្យ៉ាងទៀតបើតាមការពិនិត្យជាទូទៅគេមើលឃើញថា ឆ្នាំនេះអាជ្ញាធរមានការរៀបចំបានល្អទាំងសន្តិសុខសណ្តាប់ធ្នាប់ និងការបង្កលក្ខណៈឱ្យមានការកម្សាន្តសប្បាយ ។ ទន្ទឹមនោះអ្វីដែលជាការព្រួយបារម្ភរបស់ភ្ញៀវអំពីតម្លៃនៃម្ហូបអាហារដែលតែងតែឡើងថ្លៃហួសហេតុុនោះក៏ដូចជាមិនមានដែរ ក្នុងរយៈពេលចូលឆ្នាំនេះ។
ទោះបីជាយ៉ាងនេះក្តី ភ្ញៀវទេសចរសុទ្ធតែលើកជាសំណូមពរឱ្យអាជ្ញាធរទីនោះមានការកែលម្អឱ្យកាន់តែប្រណីតបន្ថែមទៀតក្នុងរមណីយដ្ឋានដ៏ចំណាស់មួយនេះ ។
គួររំឭកថា ស្រុកកៀនស្វាយមានរមណីយដ្ឋានសំខាន់ៗជាច្រើនដែលភ្ញៀវទេសចរចូលចិត្តទៅកម្សាន្តនៅទីនោះដូចជា រមណីយដ្ឋានវត្តកៀនស្វាយក្រៅ វត្តពុទ្ធមណ្ឌល វត្តអង្គរជ័យ វត្តទួលប្រាសាទប្រាំ និងរមណីយដ្ឋានទួលដំបូកខ្មៅ ដំបៅជ្រុំជាដើម ។ នាប៉ុន្មានឆ្នាំចុងក្រោយនេះរមណីយដ្ឋានក្នុងស្រុកកៀនស្វាយហាក់ស្រូបយកភ្ញៀវទេសចរកាន់តែច្រើនឡើង ខណៈពេលដែលរមណីយដ្ឋាននីមួយៗបានធ្វើការកែលម្អទាំងសោភ័ណភាព និងការថែ-រក្សាសុវត្ថិភាព រួមជាមួយហេដ្ឋារចនាសម្ព័ន្ធផ្លូវថ្នល់ផងដែរ ។
លោកអភិបាលស្រុកកៀនស្វាយបានសន្យាថា នាពេលខាងមុខនេះរមណីយដ្ឋានទាំងអស់ក្នុងស្រុក នឹងធ្វើការអភិរក្ស ដើម្បីឈានឡើងកម្រិតស្តង់ដាដូចបណ្តារមណីយដ្ឋានដទៃទៀតក្នុងព្រះរាជាណាចក្រកម្ពុជា ។ លោកអំពាវនាវផងដែរ ដល់ប្រជាពលរដ្ឋតាមមូលដ្ឋានចូលរួមកាន់តែសកម្មថែមទៀតក្នុងគោលនយោបាយទេសចរណ៍របស់រាជរដ្ឋាភិបាលកម្ពុជាដើម្បីទាក់ទាញភ្ញៀវទេសចរជាតិ និងអន្តរជាតិ សំដៅធ្វើឱ្យវិស័យទេសចរណ៍ក្លាយជាឧស្សាហកម្មទេសចរណ៍ដូចបណ្តាប្រទេសលើសាកលលោក ៕
ចែករំលែកព័តមាននេះ