ខេត្តកំពត ៖ លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បានមានប្រសាសន៍ប្រាប់សមាជិក សមាជិកាកាកបាទក្រហម ទាំងអស់ ត្រូវត្រៀមខ្លួនជាស្រេច មុនពេលគ្រោះមហន្តរាយមកដល់ ដើម្បីកាត់បន្ថយផលប៉ះពាល់ឲ្យបានតិចបំផុត និងធ្វើឲ្យប្រជាពលរដ្ឋធន់នឹងគ្រោះមហន្តរាយ ជួយពង្រឹងជីវភាព និងការអភិវឌ្ឍន៍ក្នុងមូលដ្ឋាន ។
ការលើកឡើងខាងលើនៅក្នុងឱកាសអញ្ជើញចូលរួមជាអធិបតី ក្នុងសិក្ខាសាលាផ្សព្វផ្សាយពីច្បាប់គ្រប់គ្រងគ្រោះមហន្តរាយ ដែលបានធ្វើឡើងនៅសណ្ឋាគារកំពតឌីយ៉ាម៉ង ស្ថិតក្នុងក្រុងកំពត នៅព្រឹកថ្ងៃទី២៦ ខែកក្កដា ឆ្នាំ២០១៧ ។
លោកជំទាវ ពុំ ចន្ទីនី បានបន្តថា ៖ យើងទាំងអស់គ្នា មិនត្រូវរងចាំគ្រោះមហន្តរាយកើតឡើងទេ តែត្រូវមកអង្គុយជជែកគ្នាមុន តើយើងត្រូវធ្វើអ្វីខ្លះ0x017d7 ទោះវាកើត ក៏មានផលប៉ះពាល់តិចតួចដែរ តែបើយើងមិនគិតទុកមុនទេ ពេលគ្រោះមហន្តរាយមកដល់ ផលប៉ះពាល់មានច្រើន ដូចជាការបំផ្លាញហេដ្ឋារចនាសម័ន្ព ទ្រព្យសម្បត្តិ លំនៅដ្ឋាន សត្វចិញ្ចឹម ដំណាំកសិកម្មផ្សេងៗជាដើម ។
លោកជំទាវបញ្ជាក់ថា ៖ ការចំណាយលុយ ១ដុល្លារ នៅមុនពេលកើតគ្រោះមហន្តរាយកើតឡើង យើងនឹងចំណេញ១០០ដុល្លារ ប្រសិនបើគ្រោះមហន្តរាយកើតឡើងមែន ហើយផលប៉ះពាល់ក៏តិច ព្រោះការគ្រប់គ្រង់គ្រោះមហន្តរាយរបស់យើងបានល្អ មានន័យថា ប្រជាពលរដ្ឋក្នុងមូលដ្ឋានប្រឈមនឹងគ្រោះមហន្តរាយ អាចធន់នឹងការរស់នៅក្នុងតំបន់នោះ ក្នុងបរិបទ នៃមុខសញ្ញាគ្រោះថ្នាក់ ដែលពួកគេកំពុងតែប្រឈមមុខ ។ ការត្រៀមខ្លួនជាស្រេច និងការគិតទុកជាមុន នៅមុនពេលគ្រោះហន្តរាយមកដល់ វាជួយកាត់បន្ថយការប៉ះពាល់ ជួយពង្រឹងជីវភាពប្រជាពលរដ្ឋយើង មិនឲ្យធ្លាក់ចុះ ជួយពង្រឹងការអភិវឌ្ឍន៍ក្នុងមូលដ្ឋាន ។
លោកជំទាវបន្ថែមទៀតថា ៖ ក្នុងប្រទេសយើងបច្ចុប្បន្ន ទោះមិនទាន់មានគ្រោះមហន្តរាយធម្មជាតិធ្ងន់ធ្ងរក៏ពិតមែន ប៉ុន្តែគ្រោះថ្នាក់ចរាចរ និងការប្រើប្រាស់គ្រឿងញៀន កំពុងតែលុកលុយសង្គមយ៉ាងខ្លាំង ហើយក្រៅពីអ្នកបាត់បង់ជីវិត វាបន្សល់ទុក នូវជនពិការ (កាយវិកល ចិត្តវិកល) ក្មេងកំព្រាជាដើម ដែលពួកគេត្រូវការជំនួយពីកាកបាទក្រហមកម្ពុជា ។
ឆ្លៀតក្នុងឱកាសនោះដែរ ក្រោយពេលបញ្ចប់ការបើកសិក្ខាសាលានេះទៅ លោកជំទាវ បានអញ្ជើញទៅចែកអំណោយជួនដល់ស្ត្រីទើបសម្រាលកូនជាច្រើននាក់នៅក្នុងមន្ទីរពេទ្យបង្អែកខេត្តកំពត ដែលអំណោយទាំងនោះ បានមកពីទឹកចិត្តអាណិតស្រលាញ់របស់ សម្តេចកិត្តិព្រឹទ្ធបណ្ឌិត ប៊ុនរានី ហ៊ុនសែន ។
សូមបញ្ជាក់ថា ៖ សិក្ខាសាលាផ្សព្វផ្សាយច្បាប់គ្រោះមហន្តរាយនេះ រៀបចំឡើងក្នុងគោលបំណងលើកកម្ពស់ការយល់ដឹងជាសាធារណៈ អំពីច្បាប់គ្រប់គ្រងគ្រោះមហន្តរាយ និងកិច្ចសហការណ៍ល្អក្នុងការអនុវត្តច្បាប់ ព្រមទាំងសមាសធាតុសំខាន់ៗ ដែលមាននៅក្នុងច្បាប់ រួមមានការកាត់បន្ថយហានិភ័យ (ស្របតាមផែនការយុទ្ធសាស្ត្រអភិវឌ្ឍន៍ជាតិសម្រាប់ការងារ កាត់បន្ថយហានិភ័យគ្រោះមហន្តរាយ) ការត្រៀមឆ្លើយតប ការស្តាឡើងវិញ និងការយល់ដឹងពីការបន្សាំទៅនឹងការប្រែប្រួលអាកាសធាតុផងដែរ ៕
ចែករំលែកព័តមាននេះ