ការថែទាំពណ៌រថយន្តឲ្យថ្មីជាប្រចាំ គឺជារឿងសំខាន់សម្រាប់មនុស្សភាគច្រើន ។ យើងគួរតែដឹងពីវិធីត្រឹមត្រូវក្នុងការថែទាំ ព្រោះបើសិនជាមិនថែទាំរថយន្តទេ វាប្រៀបដូចជាដែកសំណល់ខូចខាតដែរ ប៉ុន្តែនៅពេលអ្នកយកចិត្តទុកដាក់ជាមួយវា វាគឺជាទ្រព្យសម្បត្តិដែលស្រស់ស្អាតក្នុងក្រសែភ្នែកអ្នក និងអ្នកដទៃ ។ តើគួរធ្វើដូចម្តេចខ្លះដើម្បីឲ្យរថយន្តមានពណ៌ថ្មីជាប្រចាំ ?
១-ការចតរថយន្ត ក៏សំខាន់ ៖
មនុស្សភាគច្រើនចតរថយន្តបែបងាយៗ គឺចតទីណាក៏បាន មិនចាប់អារម្មណ៍ សុំឲ្យតែបានចត ប៉ុន្តែតើដឹងឬទេថា ពន្លឺព្រះអាទិត្យនៅពេលថ្ងៃដ៏សែនក្តៅ នឹងធ្វើឲ្យពណ៌រថយន្តរបស់លោកអ្នកកាន់តែយ៉ាប់យឺន និងផុតកំណត់ការប្រើប្រាស់លឿនជាងធម្មតា ។ យើងអាចសង្កេតបានពីភាពស្លេកនៃពណ៌ ហើយពេលយប់ មិនគួរចតហាលទឹកសន្សើមទេ ព្រោះទឹកសន្សើមជាមូលហេតុមួយទៀតដែលធ្វើឲ្យពណ៌រថយន្តមានស្នាមបាន ។
២-ភាពកខ្វក់នៅជាមួយរថយន្ត ៖
ប្រសិនបើមានធូលី ឬភក់មកជាប់រថយន្តរបស់អ្នក សូមចាំទុកថា វានឹងបន្ថយភាពស្រស់ថ្លាបានដោយងាយ និងជាមូលហេតុធ្វើឲ្យស្បែករថយន្តអន់ថយ និងបន្ថយស្រមោល។ បើសិនជាធូលីមិនច្រើនពេក គួរប្រើអំបោសស្លាបមាន់បោសស្រាលៗ ប៉ុន្តែបើសិនជាអំបោសស្លាបមាន់មិនអាចសម្អាតបានទេ បន្ទាប់ពីជាប់ធូលី ឬភក់នោះ គឺអាចប្រើក្រណាត់ស្តើងជ្រលក់ទឹកយ៉ាងប្រុងប្រយ័ត្ន ហើយជូតស្រាលៗ ព្រោះបើជូតខ្លាំងវានឹងធ្វើឲ្យពណ៌ក្លាយជាស្នាមតូចៗបានដោយងាយ ។
៣-ការលាងរថយន្តដោយទឹកទទេ ៖
ការលាងរថយន្តដោយទឹកទទេ គឺមិនខុសទេ ប៉ុន្តែការលាងរថយន្តដោយទឹកក្តៅ ឬក្តៅអុនៗ វានឹងធ្វើឲ្យពណ៌រថយន្តរបស់អ្នកស្លេកស្លាំង។ ម្យ៉ាងទៀត មិនគួរលាងរថយន្តដោយម្សៅសាប៊ូជាដាច់ខាត វានឹងធ្វើឲ្យរថយន្តបាត់បង់ភាពស្រស់ស្អាត ។
៤-ត្រួតពិនិត្យបន្ទាប់ពីលាង ៖
នៅពេលលាងរថយន្តរួចគ្រប់ពេល អ្វីដែលត្រូវធ្វើ គឺពិនិត្យភាពស្អាតជាលើកចុងក្រោយ។ គួរប្រើក្រណាត់ស្ងួត ទន់ក្នុងការពិនិត្យមើល ប៉ុន្តែហាមចតរថយន្តចោលកណ្តាលថ្ងៃ ដើម្បីឲ្យវាស្ងួតដោយខ្លួនឯងជាដាច់ខាត ព្រោះនឹងធ្វើឲ្យរបកពណ៌ ដោយសារតែតំណក់ទឹកនៅជាប់រថយន្ត ។ បើសិនជាអាកាសធាតុក្តៅខ្លាំង ការធ្វើបែបនេះជាញឹកញាប់ នឹងធ្វើឲ្យរបកជាចំណុចៗ មិនគួរឲ្យគយគន់ឡើយ ។
៥-លាបពណ៌ឲ្យរលាងបន្ទាប់ពីលាង ៖
ជារឿងសំខាន់មួយទៀត និងខ្វះមិនបានក្នុងការសម្អាតរថយន្ត ដើម្បីឲ្យពណ៌រថយន្តលោកអ្នកស្រស់ស្អាតមានស្រមោលជានិច្ច ។ វាជាការលាបពណ៌ឲ្យរលោងគ្រប់ពេលបន្ទាប់ពីលាងរួច ដើម្បីការពារអ្វីផ្សេងៗដែលនឹងមកបំផ្លាញពណ៌រថយន្តដ៏សែនស្អាត និងអាចសន្សំសំចៃថ្លៃចាយវាយលើការលាបពណ៌ ដែលត្រូវចំណាយច្រើនជាងការលាបជាក់ស្តែង ។
របៀបនៃការថែទាំពណ៌រថយន្តខាងលើនេះ សង្ឃឹមថា នឹងជាប្រយោជន៍សម្រាប់រថយន្តដ៏សែនស្រឡាញ់ ដែលអ្នកអាចអនុវត្តតាមមិនឲ្យឆកល្វែងតទៅទៀត និងនៅជាមួយយើងបានយូរ ៕
ចែករំលែកព័តមាននេះ