រាជធានីភ្នំពេញ ៖ នៅតាមដងវិថីតូចធំនានាក្នុងក្រុងភ្នំពេញដែលកកកុញដោយរថយន្តត្រៀបត្រា មិនថាស៊េរីទំនើប ស៊េរីចាស់ រថយន្ដថ្មីបកពីកេស ឬមួយទឹកនោះទេ ភាគច្រើនគឺជាប្រភេទរថយន្តដែលផលិតនៅប្រទេសជប៉ុន ។ ជាក់ស្តែងរថយន្ត១០គ្រឿងរត់នៅលើដងផ្លូវ គឺមានរថយន្តប្រភេទតូយ៉ូតាដល់ទៅ៧ឬ៨គ្រឿងទៅហើយ ។
លោក ងន សាំង អគ្គនាយកក្រុមហ៊ុន RMA Cambodia ដែលជាបុត្រសម្ព័ន្ធនៃក្រុមហ៊ុន RMA Group បានឲ្យដឹងថា ចំនួនរថយន្តសរុបឆមាសទី១ ឆ្នាំ ២០១៦ ធៀបនឹងឆមាសទី១ឆ្នាំ២០១៦ ឃើញថា ការនាំចូលទាំងថ្មី និងជជុះ មានការធ្លាក់ចុះប្រហែល៣៨% ។
លោកថា មូលហេតុមួយក្នុងចំណោមមូលហេតុជាច្រើន ដោយសារតែចំនួនស្តុករថយន្តនាំចូលលើកមុននៅមានច្រើន និងមួយទៀត វាអាចពាក់ព័ន្ធនឹងស្ថានភាពសេដ្ឋកិច្ច។ ប៉ុន្តែសម្រាប់ការនាំចូលរថយន្តថ្មីវិញ នៅមានភាពល្អប្រសើរ ដោយរក្សាបានចំនួនភាគរយល្អ អត់មានការប្រែប្រួល ឬធ្លាក់ចុះនោះទេ គឺក្នុងឆមាសទី១ឆ្នាំ២០១៧នេះ សម្រាប់ទីផ្សារក្នុងស្រុកខ្មែរ បាននាំចូលរថយន្តថ្មីប្រមាណ១៨% ។
ចំណែករថយន្ដមួយទឹកវិញ ពុំមានតួលេខច្បាស់លាស់នោះទេ ដោយលោកបានថ្លែង ថា ៖« ចំពោះរថយន្ដចាស់ ខ្ញុំអត់ដឹងថារថយន្ដអីទេ តែបើចំពោះរថយន្តថ្មី ខ្ញុំមានជាតួលេខដែលយើងឃើញរថយន្តហ្វដ(Ford)ឈានមុខគេ។ ចំពោះទីផ្សារទាំងមូលយើងប៉ាន់ស្មានទៅគឺប្រហែលជាមានចំណែកទីផ្សារខ្ទង់៣៥%ដែរ»។
លោកបានបន្ថែមថា ៖« រថយន្តមួយទឹក ខ្ញុំអត់មានតួលេខច្បាស់លាស់ទេ ប៉ុន្តែបើមើលនឹងភ្នែក យើងឃើញថា ខាងតូយ៉ូតាគឺមានច្រើន»។
លោក ងន សាំង ក៏បានឲ្យដឹងផងដែរថាប្រភេទរថយន្តដែលក្តោបទីផ្សារធំជាងគេទាំងរថយន្តថ្មី និងជជុះគឺជាប្រភេទរថយន្តខ្ពស់ SUVដែលក្តោបទីផ្សារបានដល់ទៅ២៣% និងបន្ទាប់មកគឺជាប្រភេទរថយន្តតូច ឬហៅថា(Sedan)មានចំនួន២០% និងមួយប្រភេទទៀតជារថយន្តមួយបាំងកន្លះ ឬហៅថា(Pick-up) មានចំនួន១៨% ។
លោកមានសុទិដ្ឋិនិយមថា ទីផ្សាររថយន្តថ្មីនឹងបន្តកើនឡើង និងបានអះអាងថា ការប្រើប្រាស់រថយន្តមួយទឹក មានហានិភ័យច្រើន ទាំងថ្លៃការថែទាំជួសជុល ស៊ីសាំង និងបញ្ហានៃការកាត់តរថយន្តដែលអ្នកទិញយកទៅប្រើប្រាស់ ហាក់មានហានិយភ័យដល់អាយុជីវិតផងដែរ ។
លោកបានពន្យល់ថា ៖« រថយន្តមួយទឹកមកពីស្រុកគេ បើនិយាយពីអាយុវិញសុទ្ធតែអាយុជាង១០ឆ្នាំហើយ អីចឹងបើយើងនិយាយពីគុណភាព ពីសុវត្ថិភាព ពីការចំណាយប្រាក់ថែទាំ បើធៀបនឹងរថយន្តថ្មី គឺខុសគ្នា ។ បើសិនជាកំណើនជីវភាពប្រជាជនល្អ គាត់ត្រូវការរថយន្តថ្មីហើយ ។ យើងឃើញទំនោរពីមួយឆ្នាំ ទៅមួយឆ្នាំគឺកើនឡើងនៃការប្រើប្រាស់រថយន្តថ្មីអីចឹងដែរ »។
យោងតាមរបាយការណ៍អគ្គនាយកដ្ឋានដឹក ជញ្ជូនផ្លូវគោកនៃក្រសួងសាធារណការ និងដឹកជញ្ជូន បានឲ្យដឹងថា គិតពីឆ្នាំ១៩៩០ដល់ខែមេសា ឆ្នាំ២០១៧នេះ រថយន្តដែលបានចុះ បញ្ជីនៅទូទាំងប្រទេសមានចំនួន៩១៥.៩៧៨គ្រឿង ក្នុងនោះរថយន្តធម្មតាមានចំនួន៥៦៦.១៥៧គ្រឿង និងរថយន្តធ្វើអាជីវកម្មមានចំនួន៣៤៩.៨២១គ្រឿង ។
សម្រាប់អ្នកមានជីវភាពមធ្យម គឺភាគច្រើនជ្រើសរើសរថយន្តរបស់ជប៉ុនដោយសារតែកត្តាតម្លៃ និងលទ្ធភាពក្នុងការចំណាយលើថ្លៃសាំង ក៏ដូចជាការផ្លាស់ប្តូរគ្រឿងបន្លាស់ផងដែរ ។
អ្នកនាង កែវ សុជាតិ ដែលជាអ្នកប្រើប្រាស់រថយន្ដទំនើបម៉ាកតូយ៉ូតាកាមរី ហាយប្រ៊ីត បានឲ្យដឹងថា ៖« ខ្ញុំប្រើប្រាស់រថយន្តម៉ាកនេះ ដោយសារតែវាសន្សំសំចៃសាំង តែមួយរយៈចុងក្រោយនេះ គឺខ្ញុំចង់ផ្លាស់ប្តូរវាចេញ »។
ចំណែកអ្នកស្រី ឌី លីណា អាយុ៤១ឆ្នាំ ជាអាជីវករលក់ខោអាវអនឡាញមួយរូបបានឲ្យដឹងថា សម្រាប់បងប្អូនរបស់អ្នកស្រី ក៏ដូចអ្នកស្រីផ្ទាល់ គឺជ្រើសរើសយករថយន្តជប៉ុន ម៉ាកតូយ៉ូតា ដោយសារតែកត្តាតម្លៃ និងភាពងាយស្រួលក្នុងការរកគ្រឿងបន្លាស់ពេលត្រូវការជួសជុសម្តងៗ ។
អ្នកស្រីបានពន្យល់ថា ៖« បងប្អូនខ្ញុំ៣នាក់គឺប្រើរថយន្តតូយ៉ូតារបស់ជប៉ុនទាំងអស់ ។ ខ្ញុំប្រើរថយន្តកាមរី បងប្រុសខ្ញុំបហាយឡែនឌើ និងប្អូនស្រីខ្ញុំប្រើប្រាស់រថយន្តកូរ៉ូឡា។ ខ្ញុំជឿថាចំណែកទីផ្សាររថយន្តរបស់ជប៉ុនគឺច្រើន ដូចនៅម្តុំផ្ទះខ្ញុំ អ្នកជិតខាងភាគច្រើនប្រើរថយន្តតូយ៉ូតាហាយឡែនឌើ »។
អ្នកស្រីបន្តទៀតថា ៖« កត្តាចម្បងគឺរថយន្តជប៉ុនមានច្រើនម៉ាក ហើយតម្លៃរាងធូរថ្លៃជាងម៉ាកល្បីៗរបស់អង់គ្លេស ឬអាល្លឺម៉ង់ មានន័យ ថា ខ្ញុំមានត្រឹមតែជាង១ម៉ឺនដុល្លារ ក៏អាចទិញបានរថយន្ដSUVគ្រាន់បើយកមកប្រើបានដែរ។កត្តាទីពីរគឺ មិនសូវចំណាយច្រើនលើសាំង បើធៀបនឹងម៉ាកល្បីផ្សេងៗទៀត ហើយអ្វីដែលពិសេសេ គឺភាពងាយស្រួលក្នុងការស្វែងរកគ្រឿងបន្លាស់ពេលវាខូច » ។
ងាកទៅទីផ្សារទូរស័ព្ទនៅក្នុងប្រទេសកម្ពុជាវិញ ចំនួនទូរស័ព្ទស្មាតហ្វូននៅក្នុងទីផ្សារក៏មានការប្រកួតប្រជែងគ្នាខ្លាំងក្លាណាស់ដែររយៈពេលពីរបីឆ្នាំចុងក្រោយនេះ ជាមួយនឹងម៉ាកល្បីៗអន្តរជាតិ ដូចជា iPhone របស់អាមេរិក Sasung របស់កូរ៉េ ជាពិសេសគឺវត្តមានស្មាតហ្វូន របស់ចិន ដូចជា Huawei និង Oppo កំពុងតែវាយលុកក្នុងទីផ្សារកម្ពុជា ។
ទិន្នន័យរបស់វិទ្យាស្ថានបើកទូលាយ ដែលហៅជាភាសាអង់គ្លេសថា (Open Institute) ឆ្នាំ២០១៦ បានបង្ហាញឲ្យឃើញថា ទីផ្សារទូរស័ព្ទនៅកម្ពុជាគឺមានសន្ទុះកើនឡើង ដែលចំនួនជាង៩៦%នៃប្រជាជនកម្ពុជា អះអាងថា ពួកគេមានទូរស័ព្ទផ្ទាល់ខ្លួន និងច្រើនជាង៩៩%អះអាងថា ពួកគេអាចរកមធ្យោបាយផ្សេងៗក្នុងការប្រើប្រាស់ទូរស័ព្ទបាន ។ ក្នុងនោះផងដែរ វិទ្យាស្ថានបានរកឃើញថា មានប្រមាណ៤៨%នៃប្រជាជនកម្ពុជា ត្រូវបានរកឃើញថាមានទូរស័ព្ទស្មាតហ្វូន(Smartphone) យ៉ាងហោចណាស់១គ្រឿងក្នុងដៃ កើនជាងឆ្នាំ២០១៥ ដែលរកឃើញត្រឹមតែប្រមាណ៣៩,៥%ប៉ុណ្ណោះ ។
លោក ឈឹម សាងហេង ម្ចាស់ហាងទូរស័ព្ទ ហាក់សែ សាខាគីរីរម្យ ដែលជាហាងទូរស័ព្ទដៃធំមួយនៅក្រុងភ្នំពេញ បានប្រាប់កោះសន្តិភាពនៅថ្ងៃទី២៥ កក្កដា ឆ្នាំ២០១៧ ថា ទីផ្សារទូរស័ព្ទដៃស្មាតហ្វូន គឺមានសន្ទុះកើនឡើងក្នុងរយៈប៉ុន្មានឆ្នាំចុងក្រោយនេះ ហើយស្ទើរតែ៧០%ទៅ៨០%នៃអតិថិជនរបស់លោក គឺមានស្មាតហ្វូនប្រើប្រាស់យ៉ាងហោចណាស់ពីរគ្រឿងសម្រាប់មនុស្សម្នាក់។
លោកបានបញ្ជាក់ថា ទីផ្សារទូរស័ព្ទដៃមានការជឿនលឿនទាំងផ្នែកបច្ចេកវិទ្យា ក៏ដូចជា ប្រែន(ម៉ាក)ទូរស័ព្ទថ្មីៗនាំចូលពីប្រទេសចិន តែចំណែកទីផ្សារធំនោះគឺប្រភេទស្មាតហ្វូនម៉ាកសាំសុង(Samsung)និងអាយហ្វូន (iPhone) ហាក់ពេញនិយមប្រហាក់ប្រហែលគ្នា ។
លោក ឈឹម សាងហេង បន្ថែមទៀតថា ៖«បើនិយាយពីចំនួនទូរស័ព្ទស្មាតហ្វូនម៉ាក iPhone គឺមានចំនួនតិចជាងSamsung ព្រោះស្មាតហ្វូនម៉ាកSamsung គឺមានច្រើនម៉ូដ ច្រើនស៊េរី (Model) ហើយតម្លៃវិញ គឺមានច្រើនជម្រើសពីថោកដល់ថ្លៃផងដែរ ខណៈទូរស័ព្ទ iPhone ចេញតែមួយស៊េរី ហើយថ្លៃ ។ អីចឹងពិបាកនិយាយថា ទីផ្សារទូរស័ព្ទដៃធំគឺ Samsung ឬ iPhone អ្នកក្តោបខ្លាំងណាស់ ដោយសារសន្ទុះប្រហាក់ប្រហែលគ្នា »។
កញ្ញា ខេង រដ្ឋា និសិត្សសាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច បានប្រាប់ឲ្យ ដឹងថា កញ្ញាតែងតែប្តូរស៊េរីទូរស័ព្ទម៉ាក iPhoneជានិច្ច ព្រោះមើលទៅវាកាលីប មានភាពលេចធ្លោ និងងាយស្រួលប្រើ ។
កញ្ញារដ្ឋាដែលបច្ចុប្បន្នប្រើប្រាស់iPhone 6s បានបញ្ជាក់ថា ៖« សម្រាប់ទីផ្សារទូរស័ព្ទម៉ាក iPhone និង Samsung គឺប្រហាក់ប្រហែលគ្នា។ បានជាខ្ញុំនិយាយបែបនេះ ព្រោះខ្ញុំកត់សម្គាល់ឃើញថា ក្នុងថ្នាក់រៀនរបស់ខ្ញុំដែលមានគ្នាជាង៥០នាក់ គឺមានចំនួនជាង២០នាក់ហើយដែលប្រើiPhoneស៊េរីថ្មី ហើយចំនួនប្រហែល២០នាក់ផ្សេងទៀត ក៏កំពុងប្រើប្រាស់ទូរស័ព្ទម៉ាក Samsung ទំនើបៗដែរ»។
និសិត្សសាកលវិទ្យាល័យរូបនេះបានបន្ថែមថា ៖« សម្រាប់ខ្ញុំ គឺចូលចិត្តiPhone ដោយសារវាមានចំណុចពិសេសៗច្រើន ដូចជាកម្មវិធីអត់ស្មុគស្មាញ ហើយកម្មវិធីវាមាននៅលើអេក្រង់ទាំងអស់ ចំណែករូបរាងវាគឺលេចធ្លោ និងកាលីប » ៕
ចែករំលែកព័តមាននេះ