ខេត្តមណ្ឌលគិរី ៖ មនុស្សមានគ្រប់បែបគ្រប់យ៉ាង អ្នកខ្លះមានលុយចាយមិនអស់ ខ្លះទៀតរកតែអង្ករច្រកឆ្នាំងសឹងមិនបានផង។ ជាក់ស្តែង នាព្រឹកថ្ងៃទី២៧ កក្កដា នេះ កោះសន្តិភាព បានជួបជាមួយបុរសកំសត់គ្មានប្រពន្ធកូនម្នាក់ ដោយគាត់បានប្រើពេលជាង១០ម៉ោង ដើម្បីស្ពាយទំពាំង ឬផ្លែចេកទៅលក់នៅទីប្រជុំជន ក្នុងក្រុងសែនមនោរម្យ ប្តូរជាមួយប្រាក់ត្រឹម៥,០០០រៀល ទៅ៨ ០០០រៀលប៉ុណ្ណោះ។
ជួបជាមួយអ្នកយកព័ត៌មាន គឺបុរសឈ្មោះហ្ម ប៉ូច អាយុ៤៤ឆ្នាំ ជនជាតិដើមភាគតិចព្នង បានឱ្យដឹងថា សព្វថ្ងៃគាត់រស់នៅក្នុងភូមិទួលមេម៉ង់ ឃុំមេម៉ង់ ស្រុកកែវសីមា ខេត្តមណ្ឌលគិរី ដោយគាត់បានសុំផ្ទះគេស្នាក់អាស្រ័យ ។ គាត់បន្តថា រាល់ពីរថ្ងៃម្តង លោកបានដើរស្ពាយបន្លែ ឬផ្លែឈើមួយសះ (ខ្លះហៅកាផា) ដើរពីភូមិមេម៉ង់ ទៅក្រុងសែនមនោរម្យ លើចម្ងាយផ្លូវជាង៤០គីឡូម៉ែត្រ ដូច្នេះ ទាំងទៅទាំងមកស្មើរ៩០គីឡូម៉ែត្រ ។
បុរសកំសត់បន្តថា គាត់ត្រូវងើបតាំងពីម៉ោង៣ទៀបភ្លឺ ដើររហូតដល់ម៉ោងប្រមាណ៨ព្រឹក ទើបទៅដល់ក្រុងសែនមនោរម្យ ដើម្បីលក់បន្លែបន្តិចបន្តួច ដោយថ្ងៃខ្លះលក់ដាច់អស់ បានប្រាក់៧ឬ៨ពាន់រៀល ហើយថ្ងៃណាលក់មិនដាច់បានត្រឹម២ទៅ៣ពាន់រៀលប៉ុណ្ណោះ ។ ទោះលក់ដាច់ ឬមិនដាច់ នៅពេលថ្ងៃរសៀលគាត់ត្រូវដើរត្រលប់ទៅភូមិវិញ គឺដើររហូតម៉ោងយប់០៧ ឬ០៨យប់ ទើបដល់ផ្ទះ ។
លោកពូ ប៉ូច បានបញ្ជាក់ថា សព្វថ្ងៃនេះ គាត់គ្មានគ្រួសារ ឬបងប្អូនសូម្បីម្នាក់ ព្រោះឪពុកម្តាយបានស្លាប់ចោលគាត់ជាយូរមកហើយ និងគ្មានសាច់ញាតិនោះទេ ។ គាត់បានប្រកបរបរលក់បន្លែនេះ ជាង២០ឆ្នាំមកហើយ ។ កាលពីនៅក្មេង គាត់អាចស៊ីឈ្នួលជម្រះស្មៅឱ្យគេខ្លះ ដើរលក់បន្លែខ្លះ តែបច្ចុប្បន្ន សុខភាពរបស់គាត់បានចុះថយ ព្រោះវ័យកាន់តែចាស់ និងមានជំងឺឬសដូងបាត១០ឆ្នាំថែមទៀត ។ បន្លែដែលលោកពូយកទៅលក់ទាំងនោះ សុទ្ធតែបានដាំខ្លួនឯងលើដីរបស់អ្នកភូមិ ព្រោះតែគេអាណិតគាត់ ទើបអនុញ្ញាតឲ្យដាំគ្រាន់ប្រមូលផលទុកលក់ដូចចិញ្ចឹមជីវិត ។ ពិតជាគួរឱ្យស្ងើចសរសើរគាត់ណាស់ ។
ចែករំលែកព័តមាននេះ