ខេត្តព្រះសីហនុ ៖ ទូកនេសាទមួយគ្រឿង បានលិចក្នុងលម្ហសមុទ្រភូមិសាស្ត្រក្រុងកោះរ៉ុង នៅវេលាម៉ោង៣រំលងអធ្រាត្រឈានចូលថ្ងៃ៣០ ខែមករា ឆ្នាំ២០២៣នេះ អាជ្ញាធរក្រុងកោះរ៉ុង និងក្រុមហ៊ុន GTVC របស់លោកឧកញ៉ាទៀ វិចិត្រ បានចេញស្វែងរកជនរងគ្រោះភ្លាមៗ ក្រោយពីទទួលបានដំណឹងនេះ ។
ករណីនេះលោក នួន ប៊ុនថុល អភិបាលក្រុងកោះរ៉ុង បានឲ្យដឹងថា គិតមកត្រឹមម៉ោង២រសៀលថ្ងៃទី៣០ ខែមករានេះ ប្រតិបត្តិការស្វែងរកប្រជានេសាទដែលលិចទូកនោះ កំពុងធ្វើបន្ត និងពុំទាន់ស្វែងរកឃើញជនរងគ្រោះនៅឡើយទេ ។
លោកអភិបាលក្រុងកោះរ៉ុង បានបញ្ជាក់ថា ការស្វែងរកក្នុងលម្ហសមុទ្រ ក៏ជួបការលំបាកច្រើនដែរ ដោយសារតែសមុទ្រមានខ្យល់ និងរលកខ្លាំង ។
ដោយឡែកប្រភពពីម្ចាស់ទូកឈ្មោះ ធិន យឿន លោកបានប្រាប់ថា ទូកនេសាទនេះ ជាប្រភេទទូកប្រើម៉ាស៊ីនប្រភេទគោយន្ត ហើយបានលិចនៅជិតកោះតាង ចន្លោះកោះរ៉ុងសន្លឹម និងក្រុងព្រះសីហនុ ។
ម្ចាស់ទូកបន្តថា នៅលើទូកនេសាទនោះ មានមនុស្សចំនួន០២នាក់ មានឈ្មោះ អា ស្រេម ជាអ្នកបើកទូក និងកម្មករទូកម្នាក់ទៀត (មិនស្គាល់ឈ្មោះ) ។
ករណីលិចទូកខាងលើនេះ លោកឧកញ៉ា ទៀ វិចិត្រ បានបញ្ជូនអូប័រល្បឿនលឿនរបស់ក្រុមហ៊ុន GTVC ចំនួន៤គ្រឿង សហការជាមួយអាជ្ញាធរក្រុងកោះរ៉ុង កំពុងស្វែងរកបន្ត នៅលើលម្ហសមុទ្រ ៕
ចែករំលែកព័តមាននេះ