ខេត្តបាត់ដំបង៖ សត្វសុនខយ៉ាងតិចចំនួន០៥ក្បាល ត្រូវក្រុមចោរដាក់ថ្នាំបំពុលងា.ប់ រួចធ្វើសកម្មភាពចូលលួចមេគោដែលម្ចាស់ចងនៅក្នុងក្រោលអស់ចំនួន០៣ក្បាល ដឹកចេញដោយសុវត្ថិភាព កាលពីរំលងអធ្រាត្រឈានចូលថ្ងៃទី៣០ មករា នៅចំណុចភូមិថ្មី ឃុំត្រាង ស្រុកកំរៀង។…
ខេត្តបាត់ដំបង៖ សត្វសុនខយ៉ាងតិចចំនួន០៥ក្បាល ត្រូវក្រុមចោរដាក់ថ្នាំបំពុលងា.ប់ រួចធ្វើសកម្មភាពចូលលួចមេគោដែលម្ចាស់ចងនៅក្នុងក្រោលអស់ចំនួន០៣ក្បាល ដឹកចេញដោយសុវត្ថិភាព កាលពីរំលងអធ្រាត្រឈានចូលថ្ងៃទី៣០ មករា នៅចំណុចភូមិថ្មី ឃុំត្រាង ស្រុកកំរៀង។ នេះបើតាមការផ្ដល់ព័ត៌មានពីសមត្ថកិច្ច ។
សេចក្ដីរាយការណ៍បានឲ្យដឹងថា ម្ចាស់គោឈ្មោះ សឿន នឿន ភេទស្រី អាយុ៧២ឆ្នាំ រស់នៅកន្លែងកើតហេតុ ។ ជនរងគ្រោះត្រូវក្រុមចោរដែលគេសង្ស័យអាចមានបក្សពួកយ៉ាងតិចចំនួន០២នាក់ បានធ្វើសកម្មភាពលួចយកមេគោគាត់អស់ចំនួន០៣ក្បាល ដែលគាត់ចងនៅក្នុងក្រោល។
បើតាមប្រភពព័ត៌មានបានបញ្ជាក់ថា ក្រុមចោរបានដាក់ថ្នាំបំពុលសត្វសុនខ បណ្ដាលឲ្យងា.ប់ចំនួន០៥ក្បាល មុនពេលចូលលួចដឹកមេគោទាំង០៣ក្បាលនោះចេញពីក្នុងក្រោល។ ជុំវិញករណីចោរលួចគោប្រជាពលរដ្ឋខាងលើនេះ កោះសន្តិភាពមិនអាចសុំការបញ្ជាក់បន្ថែមពីលោក វេ គឹម ចត់ អធិការស្រុកកំរៀងបានទេ នៅរសៀលថ្ងៃទី ៣០ មករា នេះ ដោយទូរស័ព្ទរបស់លោកគ្មានអ្នកទទូល។
ប៉ុន្តែបើតាមប្រភពព័ត៌មាន ដែលបានស្រង់សំដីជនរងគ្រោះបានប្រាប់ថា ម្ចាស់គោបានដឹងនៅព្រឹកថ្ងៃកើតហេតុ ក្រោយបាត់មេគោអស់ពីក្នុងក្រោល និងឃើញសត្វសុនខងា.ប់នៅក្បែរនោះ ទើបគាត់រាយការណ៏ប្ដឹងទៅសមត្ថកិច្ចតែម្ដង។
សូមរំលឹកថា ករណីចោរលួចគោ ក្របីអ្នកស្រុកដូចខាងលើនេះ ក្រុមចោរហាក់កំពុងចេញធ្វើសកម្មភាពស្ទើរគ្រប់ទីកន្លែង។ ជាពិសេស នៅតាមបណ្ដាស្រុកនានា ដែលមានប្រជាកសិករចិញ្ចឹមគោ-ក្របី។ ជាក់ស្ដែង កាលពីរំលងអធ្រាត្រឈានចូលថ្ងៃទី១៩ ធ្នូ ឆ្មាំ២០២២ កន្លងទៅនេះ ក្រុមចោរហារយក៏បានធ្វើសកម្មភាព លួចយកគោអ្នកភូមិអស់ចំនួន០៦ក្បាលដែរ ខណៈម្ចាស់ចងនៅក្នុងដីចំការមួយកន្លែង នៅភូមិភ្នំប្រាំពីរ ឃុំបួរ ស្រុកភ្នំព្រឹក។
ករណីនេះ ក្រុមចោរបានប្រើប្រាស់រថយន្តដឹកសត្វគោដែលពួកគេលួចបាន។ ហើយរហូតមកដល់ពេលនេះ សមត្ថកិច្ចពុំទាន់មានតម្រុយពីមុខសញ្ញាជនសង្ស័យណាម្នាក់ឡើយ ខណៈក្រុមចោរនៅតែដើរធ្វើសកម្មភាពលួចគោប្រជាពលរដ្ឋបានដោយសុត្ថិភាពដដែល។ ស្ថិតនៅក្នុងស្ថានភាពអសន្តិសុខនៅតាមមូលដ្ឋានបែបនេះ ប្រជាពលរដ្ឋដែលមានចិញ្ចឹមសត្វគោ ក្របី គួរតែមានការប្រុងប្រយ័ត្នឲ្យបានខ្ពស់បំផុត។
ព្រោះក្រុមចោរលួចគោក្របីនេះ ហាក់ចេញធ្វើសកម្មភាពស្ទើរគ្រប់ទីកន្លែងមិនថា នៅតាមជនបទ ឬ ទីប្រជុំជនឡើយ ខណៈវិធានការទប់ស្កាត់ ឬ ការបង្ក្រាបរបស់សមត្ថកិច្ចហាក់ទន់ដៃ ទន់ជើងអស់ទៅហើយ ៕
ចែករំលែកព័តមាននេះ