រាជធានីភ្នំពេញ ៖ ព្រឹទ្ធចារ្យផ្នែកចម្រៀងបុរាណ នៃសកលវិទ្យាល័យវិចិត្រសិល្បៈ អ្នកគ្រូ ឌួង ម៉ារ៉ី បាននិងកំពុងធ្លាក់ខ្លួនឈឺសម្រាកតែនៅលើកន្ទេលតែប៉ុណ្ណោះ បន្ទាប់ពីអ្នកគ្រូជួបជាមួយនឹងជំងឺប្រចាំកាយមួយចំនួន និងភាពចាស់ជរាផងដែរ។
ដំណឹងពីការធ្លាក់ខ្លួនឈឺពីព្រឹទ្ធាចារ្យរូបនេះ ត្រូវបានគេផ្សព្វផ្សាយ និងចែកចាយពេញបណ្តាញសង្គមហ្វេសប៊ុក ក្នុងគោលបំណងអំពាវដល់បណ្តាសប្បុរសជននានា ចូលរួមជួយឧបត្ថម្ភ និងគាំទ្រការព្យាបាលជំងឺរបស់អ្នកគ្រូតាមសិទ្ធា។
បើយោងតាមការបង្ហោះពីផេកហ្វេសប៊ុកទំព័រវប្បធម៌ ខ្មែរ បានអោយដឹងថា មួយជីវិតជាមួយចម្រៀងមហោរីខ្មែរព្រឹទ្ធាចារ្យចម្រៀង ឌួង ម៉ារ៉ី កាន់តែចាស់ទ្រុឌទ្រោម ជាមួយនឹងការពើបប្រទះនូវជំងឺប្រចាំកាយផងដែរ។
គេហទំព័រវប្បធម៌ ខ្មែរ មានសេចក្តីភ្ញាក់ផ្អើលជាអនេក ក្រោយឃើញការទ្រុឌទ្រោមជាលំដាប់នៃសុខភាពរបស់ព្រឹទ្ធាចារ្យចម្រៀង ឌួង ម៉ារ៉ី ។ គេហទំព័រវប្បធម៌ខ្មែរបានចូលរួមជាថវិការដល់ការមើលថែរក្សា និងព្យាបាលសុខភាពរបស់លោកមួយផ្នែកតូច ហើយបើសិនជាប្រិយមិត្តចង់ចូលរួម បងប្អូនអាចឧបត្ថម្ភបានគេហទំព័រ បួងសួង ឬតាមរយៈគណនី ABA 500 266 550 ប្រាក់ដុល្លារ($) 089 969 471 ប្រាក់រៀល(៛) ឈ្មោះ Sovannoudom NOP។
ព្រឹទ្ធាចារ្យ ឌួង ម៉ារ៉ី ត្រូវបានគេដឹងថា អ្នកស្រីមានជំងឺពុកឆ្អឹងយ៉ាងធ្ងន់ បាក់ឆ្អឹងខ្នង៧កង់ មិនអាចដើរបាន ពោលគឺសម្រាកតែនៅលើកន្ទេលតែប៉ុណ្ណោះ។ ទំព័រហ្វេសប៊ុក វប្បធម៌ អរិយធម៌ សិល្បៈខ្មែរ បានឲ្យដឹងដែរថា «តម្លៃព្យាបាលចាក់ស៊ីម៉ង់ត៍ឆ្អឹងមួយកង់មានតម្លៃរហូតដល់១៥០០ដុល្លារឯណោះ ខណៈពេលក្រុមគ្រួសាររបស់ព្រឹទ្ធចារ្យនៅមានកម្រិតនៅឡើយ។
ដោយឡែកបើយោងតាមបទសម្ភាសន៍ជាមួយអ្នកសារព័ត៌មានក្នុងស្រុកមួយកាលពីពេលកន្លងទៅ ក្រុមគ្រួសារព្រឹទ្ធចារ្យបានលើកឡើងថា ស្ថិតក្នុងជន្មាយុ៧៦ឆ្នាំ អ្នកគ្រូ ឌួង ម៉ារ៉ី ធ្លាប់បានឆ្លងកាត់ការវះកាត់គីសក្នុងថ្លើមម្ដង កាលពីច្រើនឆ្នាំមុន។ អ្នកគ្រូ ឌួង ម៉ារ៉ី គឺជាគ្រូចម្រៀងមហោរី និងចម្រៀងបុរាណ។ អ្នកគ្រូចូលសិល្បៈ តាំងពីសម័យសង្គមរាស្ត្រនិយម ហើយក្រោយសម័យសង្គ្រាម អ្នកគ្រូបានចូលសិល្បៈជាថ្មីចាប់ពីឆ្នាំ១៩៧៩ រហូតដល់ថ្ងៃដែលអ្នកគ្រូឈឺក្រោកមិនរួច។ បច្ចុប្បន្ន អ្នកគ្រូកំពុងស្នាក់នៅក្នុងផ្ទះជាមួយកូនចៅរបស់អ្នកគ្គ្រដែលស្ថិតនៅក្រុងតាខ្មៅ៕
ចែករំលែកព័តមាននេះ