ខេត្តក្រចេះ ៖ ជនសង្ស័យចំនួន៣នាក់ ត្រូបានចាប់ខ្លួនពីកម្លាំងសមត្ថកិច្ចចម្រុះ ពាក់ព័ន្ធនៅក្នុងករណីបទល្មើសនេសាទខុសច្បាប់ទាំងហ្វូង ដោយប្រើប្រាស់ឧបករណ៍ឆក់។ ជនសង្ស័យទាំង៣នាក់រូបនេះ ក៏ត្រូវបានកម្លាំងជំនាញរដ្ឋបាលជលផលចំណុះ អោយមន្ទីរកសិកម្មខេត្តក្រចេះ បញ្ជូនទៅកាន់តុលាការ រួមទាំងសំណុរឿង និងវត្ថុតាងកាលពីម្សិលមិញផងដែរ។
បន្ទាប់ពីបញ្ជូនទៅដល់តុលាការ ក្រោមការសាកសួរពីព្រះរាជអាជ្ញា ទៅដល់ចៅក្រមស៊ើបសួរ លោកស្រី ទេព សុធាវី ចៅក្រមស៊ើបសួរ នៃសាលាដំបូងខេត្តក្រចេះ នាថ្ងៃទី២៨ ខែមករា ឆ្នាំ២០២៣នេះ បានសម្រេចបង្គាប់អោយភ្នាក់ងារមានសមត្ថកិច្ច នៃកងកម្លាំងសាធារណៈ ធ្វើការនាំខ្លួនជនត្រូវចោទចំនួន៣នាក់ទៅដាក់ពន្ធនាគារខេត្តក្រចេះ ដើម្បីឃុំខ្លួនជាបណ្តោះអាសន្ន ស្ថិតក្នុងបទល្មើសនេសាទដោយប្រើឧបករណ៍ឆក់ ដែលជាបទល្មើសព្រហ្មទណ្ឌ។
តាមប្រភពព័ត៌មានអោយដឹងថា កម្លាំងរដ្ឋបាលជលផលមេគង្គ និងកម្លាំងផ្នែករដ្ឋបាលជលផលព្រែកប្រសព្វ បានរួមសហការជាមួយនគរបាលប្រឆាំងបទល្មើសសេដ្ឋកិច្ចខេត្តក្រចេះ កាលពីល្ងាចថ្ងៃទី២៧ ខែមករា ឆ្នាំ២០២៣ បានចុះបង្ក្រាបបទល្មើសនេសាទ នៅតាមដងព្រែកឆ្លូង ស្ថិតក្នុងភូមិប្រមា ឃុំកំពង់ដំរី ស្រុកឆ្លូង ខេត្តក្រចេះ ដោយឃាត់ខ្លួនជនសង្ស័យចំនួន៣នាក់ រួមទាំងវត្ថុតាងផងដែរ។
នាយផ្នែករដ្ឋបាលជលផលព្រែកប្រសព្វ លោក បែន ប៊ុណ្ណារ៉ាវុធ បានប្រាប់សារព័ត៌មានថា ក្នុងប្រតិបត្តិការបង្គ្រាបទល្មើសនេសាទខាងលើ កម្លាំងចម្រុះបានឃាត់ខ្លួនជនសង្ស័យចំនួន៣នាក់ ក្នុងនោះ ទី១- ឈ្មោះ ជៃ ឡី អាយុ៤២ឆ្នាំ រស់នៅភូមិស្រែសាមចាស់ ឃុំកំពាន់ ស្រុកមេមត់ ខេត្តត្បូងឃ្មុំ ទី២- ឈ្មោះ យ៉េង ផល្លា អាយុ២៨ឆ្នាំ និងទី៣- ឈ្មោះ បឿន ណាត់ អាយុ២៨ឆ្នាំ អ្នកទាំងពីររស់នៅភូមិប្រមា ឃុំកំពង់ដំរី ស្រុកឆ្លូង ខេត្តក្រចេះ។
លោកបន្តថា បន្ទាប់ការចាប់ខ្លួន កម្លាំងចម្រុះបានដកហូតឧបករណ៍នេសាទល្មើស ជាប្រភេទឧបករណ៍ឆក់រួមមាន ៖ អាគុយ១២វ៉ុល កម្លាំង៤០អំពែ ចំនួន១៣គ្រឿង, ក្បាលឆក់ចំនួន១៣គ្រឿង, កន្ត្រងដងត្រីចំនួន៣, ទ្រុងដាក់ត្រីចំនួន៦ និងកន្ទ្រកដាក់ត្រីចំនួន៥កន្ត្រកទៀត។
ទាក់ទិកករណីខាងលើនេះ លោកនាយផ្នែកជលផលព្រែកប្រសព្វ ក៏បានបញ្ជាក់ថា ស្ថិតក្នុងសកម្មភាពនោះ ក្រុមជនល្មើសប្រដាប់ឧបករណ៍ឆក់ទាំងហ្វូងតែម្ដង ប៉ុន្តែនៅពេលកម្លាំងសមត្ថកិច្ចចុះទៅដល់ ពួកគេបានបោះឧបករណ៍ឆក់ចោល រួចរត់យករួចខ្លួន ទើបកម្លាំងសមត្ថកិច្ចឃាត់ខ្លួនជនសង្ស័យបានតែចំនួន៣នាក់ប៉ុណ្ណោះ។
បច្ចុប្បន្ន ជនត្រូវចោទខាងលើ កំពុងស្ថិតក្រោមការឃុំខ្លួនក្នុងពន្ធនាគារខេត្តក្រចេះ ដោយឡែកជនសង្ស័យពាក់ព័ន្ធមួយចំនួនទៀត កម្លាំងសមត្ថកិច្ចបន្តស្រាវជ្រាវបន្ថែម៕
ចែករំលែកព័តមាននេះ