រាជធានីភ្នំពេញ ៖ កាលពីថ្ងៃទី២៣ ខែមករា ឆ្នាំ២០២៣ កន្លងទៅនេះ លោក វីរៈ វ៉ារ៉ានី អនុប្រធានក្រុមព្រះសុរិយា និងសមាជិក សមាជិកា បានជូនលោកស្រី ប៉ុន ស៊ីរ៉ាដា (អរុណ ស៊ីរ៉ាដា) ចៅស្រីសម្តេចចក្រី ពេជ្រ ប៉ុណ្ណ និងជាអតីតគ្រូបង្រៀនមួយរូប បានរៀបចំពិធីបង្សុកូល នាបរិវេណវត្តជីខលើ (អតីតមន្ទីរឃុំឃាំងខ្មែរក្រហម) ស្ថិតក្នុងឃុំជីខលើ ស្រុកស្រែអំបិល ខេត្តកោះកុង ដើម្បីឧទ្ទិសកុសលដល់វិញ្ញាណក្ខន្ធរបស់ស្វាមីលោកស្រី និងវរៈជនខ្មែរ ដែលត្រូវខ្មែរក្រហមសម្លា.ប់នៅទីនោះ ក្នុងកំឡុងឆ្នាំ១៩៧៥ ដល់ឆ្នាំ១៩៧៩។
លោក វីរៈ វ៉ារ៉ានី បានអះអាងថា លោកស្រី ប៉ុន ស៊ីរ៉ាដា តែងតែសន្សំចិត្តប៉ងទៅធ្វើបុណ្យនៅទីកន្លែងដែលខ្មែរក្រហមបានសម្លា.ប់ស្វាមី និងកូនៗ និងសាច់ញាតិរបស់លោកស្រីជាង៣០នាក់ ដែលអោយលោកស្រីមានក្តីសោកសង្រែក និងអាឡោះអាល័យយ៉ាងខ្លាំង។
លោកបន្តថា លោកស្រី ប៉ុន ស៊ីរ៉ាដា មានសេចក្តីក្តុកក្តួលជាខ្លាំងពេលទៅដល់ទីនោះជាថ្មីម្តងទៀត ដែលជាទីអនុស្សាវរីយ៍ដ៏សែនកំសត់ក្នុងឆាកជីវិតរបស់លោកស្រីដែលបានឆ្លងកាត់ជាមួយក្រុមគ្រួសារ។
លោកបញ្ជាក់ថា ទិដ្ឋភាពនៅក្នុងវត្ត ត្បិតតែប្រែប្រួលអស់ច្រើនក៏ពិតមែន តែលោកស្រីនៅចងចាំទីនោះយ៉ាងច្បាស់ គ្មានភ្លេចមួយចំណុចណាឡើយ។ ជាមួយគ្នានេះ លោកស្រី ប៉ុន ស៊ីរ៉ាដា បានថ្លែងអំណរគុណយ៉ាងជ្រាលជ្រៅចំពោះក្រុមព្រះសុរិយា ដែលបានជូនលោកស្រីមកកាន់កន្លែងនេះ សមតាមបំណងដែលលោកស្រីប៉ងប្រាថ្នាចង់មកធ្វើបុណ្យបង្សុកូលនៅកន្លែងមរណៈរបស់ស្វាមីលោកស្រី អស់រយៈពេល៤៥ឆ្នាំមកហើយនោះ។ លោកស្រី ក៏ថ្លែងអំណរគុណចំពោះលោក តុង ស្រេង រស់នៅប្រទេសកាណាដា ដែលបានឧបត្ថម្ភជាថវិការៀបចំពិធីបង្សូកូលនេះ។
សូមជម្រាបផងដែរថា លោកស្រី ប៉ុន ស៊ីរ៉ាដា បច្ចុប្បន្នមានវ័យ៦៥ឆ្នាំ រស់នៅរាជធានីភ្នំពេញ ជាកូនស្រីទី៤ របស់លោកចាងហ្វាងសាលាដំបូងខេត្តកំពត ប៉ុន អរុណ (កូនប្រុសសម្តេចចក្រី ពេជ្រ ប៉ុណ្ណ)។ មុនពេលខ្មែរក្រហមឡើងកាន់អំណាចពីរសប្តាហ៍ លោកស្រីបានរៀបមង្គលការជាមួយលោកអនុសេនីយ៍ឯក បាន ណារិន្ទ (ឯម សំអឿន)។ នៅឆ្នាំ១៩៧៧ លោកអនុសេនីយ៍ឯក បាន ណារិន្ទ ត្រូវបានខ្មែរក្រហមសម្លា.ប់ដោយវះពោះទាំងរស់ ក្រោយពីដឹងថា លោកជាទាហានរបស់រដ្ឋាភិបាលលន់នល់។
ក្នុងរបបប្រល័យពូជសាសន៍ខ្មែរក្រហម លោកស្រីបានបាត់បង់ឪពុក ម្តាយ និងបងប្អូនៗ រួមទាំងស្វាមី និងកូនប្រុស។ កន្លងទៅ ក្រុមព្រះសុរិយា បានចេញផ្សាយពីប្រវត្តិដ៏ជូរចត់របស់លោកស្រី នៅក្នុងនាទីខ្សែជីវិត ចំនួន៣វគ្គរួចមកហើយ ធ្វើអោយមហាជនអ្នកគាំទ្រក្រុមព្រះសុរិយា មានក្តីអាណិតចំពោះលោកស្រីជាពន់ពេក។
សម្តេចចក្រី កុញ្ជរាធិបតី ឧត្តមក្រុមពាហុ ពេជ ប៉ុន សេនាបតីក្រសួងយុទ្ធនាធិការ សិក្សាធិការ និងយោធាធិការ។ សម្តេចចក្រី ពេជ ប៉ុន មានវីរភាព និងស្នាដៃច្រើនណាស់ ក្នុងការចូលរួមជួយប្រទេសជាតិ តាំងពីរជ្ជកាលព្រះបាទ នរោត្តម រហូតដល់រជ្ជកាលក្រោយៗមក និងសម្តេចឧកញ៉ាចក្រី ពេជ ប៉ុន ជារាជព្រះធីតុបតី នៃព្រះករុណាព្រះបាទ នរោត្តម ផងដែរ៕
ចែករំលែកព័តមាននេះ