អាហ្វហ្គានីស្ថាន ៖ ការបំផ្ទុះរថយន្តផ្ទុកគ្រឿងផ្ទុះមួយកើតមាននាព្រឹកថ្ងៃទី២៤ កក្កដា ក្នុងសង្កាត់មួយមានពួកស៊ីអីុតភាគច្រើននៃក្រុងកាប៊ុល រដ្ឋធានីអាហ្វហ្គានីស្ថាន បណ្តាលឱ្យមនុស្សស្លាប់យ៉ាងតិច៣៥នាក់ និងរបួសច្រើនសិបនាក់ ។ តុល្យការមួយរៀបរាប់ពីមនុស្សស្លាប់២៤នាក់ និងរបួស៤២នាក់ ។
ការវាយប្រហារភេរវកម្មនេះកើតមាននៅក្បែរនិវេសនដ្ឋានរបស់មេដឹកនាំសហគមន៍ HAZARA ហើយជាសមាជិកសភា លោក MOHAMMAD MOQAQED ។ រថយន្តផ្ទុកគ្រឿងផ្ទុះបានបំបុករថយន្តបឺសមួយដែលដឹកនិយោជិតនៃក្រសួងរ៉ែ ។
ពួកតាលីបង់ប្រកាសទទួលខុសត្រូវលើការវាយប្រហារនេះតាម TWITTER ដោយអះអាងថា សំដៅរថយន្តបឺសមួយដែលដឹកបណ្តាសមាជិករបស់ NDS ជាភ្នាក់ងារស៊ើបការណ៍ ហើយបណ្តាលឱ្យពួកនេះស្លាប់៣៧នាក់ ។
ការផ្ទុះកើតមានមុនម៉ោង៧ព្រឹកម៉ោងក្នុងស្រុកបន្តិច ក្នុងសង្កាត់មួយមានពួកស៊ីអុីតភាគច្រើន ហើយមានមនុស្សកុះករនៃក្រុងកាប៊ុល ។ ក្នុងសង្កាត់នេះមានក្លិបហាត់ប្រាណ សាកលវិទ្យាល័យ និងវិទ្យាស្ថានជាច្រើន ព្រមទាំងមានទីតាំងធំៗសម្រាប់ប្រារព្ធពិធីរៀបការ ។ រថយន្តបឺសដឹកនិយោជិតក្រសួងរ៉ែ រងការកម្ទេច ហើយឆេះខ្លោចទាំងស្រុងដោយការផ្ទុះក្បែរក្រសួងនេះ ។ បណ្តាជនរងគ្រោះមានសុទ្ធតែជាជនស៊ីវិល ក្នុងនោះរួមទាំងបណ្តានិស្សិតដែលទៅកាន់សាកលវិទ្យាល័យ ដើម្បីប្រឡងដំណាច់ឆ្នាំ ព្រមទាំងមានបណ្តាឆ្មាំការពារសន្តិសុខនិវេសនដ្ឋានរបស់លោក MOHAQAQ ផង ៕
ចែករំលែកព័តមាននេះ