ចុះពិនិត្យស្ថានភាពជាក់ស្តែងសំណើរពលរដ្ឋសុំឆ្លងព្រំដែន(មានវីដេអូ)
ខេត្តបន្ទាយមានជ័យ ៖ តំណាងសហភាពសហព័ន្ធយុជនកម្ពុជាខេត្តបន្ទាយមានជ័យអមដោយអាជ្ញាធរក្រុងប៉ោយប៉ែត
ខេត្តបន្ទាយមានជ័យ ៖ តំណាងសហភាពសហព័ន្ធយុជនកម្ពុជាខេត្តបន្ទាយមានជ័យអមដោយអាជ្ញាធរក្រុងប៉ោយប៉ែត និងមេបញ្ជាការនគរបាលការពារព្រំដែនគោកលេខ៩១១នៅព្រឹក ថ្ងៃទី២៤ ខែកក្កដា ឆ្នាំ២០១៧ ចុះពិនិត្យស្ថានភាពជាក់ស្តែងសំណើរបស់ពលរដ្ឋដែលជួបបញ្ហាជីវភាពខ្វះខាតក្រោយថ្នាក់លើបញ្ជាឲ្យបិទច្រករបៀងខុសច្បាប់ទាំងអស់នៅខេត្តបន្ទាយមានជ័យ ។ ជំនួបរបស់ក្រុមការងារខាងលើបានធ្វើឡើងនៅភូមិព្រៃគប់ សង្កាត់ផ្សារកណ្តាល និងភូមិទំប់នប់ក៥ សង្កាត់ប៉ោយប៉ែត ក្រុងប៉ោយប៉ែត ជាមួយពលរដ្ឋជិត១០០នាក់ ។
អ្នកភូមិទាំង២បានរៀបរាប់ពីទុក្ខលំបាកប្រាប់ដល់ក្រុមការងារថា ពួកគាត់ជួបបញ្ហាជីវភាពលំបាកជាខ្លាំងក្រោយពីច្រករបៀងត្រូវបានបិទហើយបានស្នើសុំឲ្យក្រុមការងារជួយយ៉ាងណាដើម្បីពួកគាត់បានចេញចូលទៅដីថៃព្រឹកវិលល្ងាចដូចសព្វមួយដងដើម្បីធ្វើការឲ្យថៃយកប្រាក់ដោះស្រាយជីវភាព ។
ជួបសម្ភាសផ្ទាល់លោក អ៊ិត សំណាង ប្រាប់កោះសន្តិភាពថា ការចុះមកបន្ទាត់ព្រំដែនថ្ងៃនេះគឺតាមបញ្ជាថ្នាក់លើបន្ទាប់ពីមានព័ត៌មានចុះផ្សាយថា ពលរដ្ឋនៅបន្ទាត់ព្រំដែនកំពុងដាច់បាយជាបណ្តើៗហើយទាមទារឲ្យថ្នាក់លើបើកច្រករបៀងឡើងវិញងាយស្រួលពួកគាត់ចេញចូលទៅធ្វើការ ។ លោកបន្តថាក្រុមការងារលោកមិនមែនទៅបើកច្រករបៀងទេគឺចុះពិនិត្យមើលពីស្ថានភាពជាក់ស្តែងតាមសំណើរពលរដ្ឋសុំចេញចូលដីថៃព្រឹកវិលល្ងាចដើម្បីដាក់ជូនថ្នាក់លើពិនិត្យ និងរកវិធីសម្របសម្រួលនិងធានាឲ្យពួកគាត់បានចេញចូលទៅធ្វើការលើទឹកដីថៃ ៕
ចែករំលែកព័តមាននេះ