វិបត្តិខ្ទឹមបារាំង! តម្លៃត្រូវបានប្រដូចទៅនឹងមាស នៅប្រទេសហ្វីលីពីន
ហ្វីលីពីន ៖ តម្លៃខ្ទឹមបារាំងនៅក្នុងប្រទេសហ្វីលីពីន បានហក់ឡើងខ្ពស់យ៉ាងលឿន ដោយអ្នកខ្លះ
ហ្វីលីពីន ៖ តម្លៃខ្ទឹមបារាំងនៅក្នុងប្រទេសហ្វីលីពីន បានហក់ឡើងខ្ពស់យ៉ាងលឿន ដោយអ្នកខ្លះ
ហ្វីលីពីន ៖ តម្លៃខ្ទឹមបារាំងនៅក្នុងប្រទេសហ្វីលីពីន បានហក់ឡើងខ្ពស់យ៉ាងលឿន ដោយអ្នកខ្លះបានប្រដូចទៅនឹងមាស ខណៈដែលភោជនីយដ្ឋានជាច្រើន បានដកបន្លែខ្ទឹមបារាំងចេញពីបញ្ជីមុខម្ហូបរបស់ពួកគេ ចំពេលដែលមន្ត្រីបានធ្វើការព្រមានឈ្មួញពីការនាំចូលដោយគ្មានការអនុញ្ញាតពិសេស។ នេះបើយោងតាមប្រភពសារព័ត៌មាន The Guardian ចេញផ្សាយកាលពីថ្ងៃទី២៦ ខែមករា ឆ្នាំ២០២៣។
យោងតាមប្រព័ន្ធផ្សព្វផ្សាយក្នុងស្រុកបានបង្ហាញថា ខ្ទឹមបារាំងនាំចូលខុសច្បាប់ ដែលមានតម្លៃចន្លោះពី ៥០០-៦០០លានប៉េសូ ដែលស្មើនឹងប្រមាណ ៩-១១លានដុល្លារអាមេរិក ត្រូវបានបង្ក្រាបដោយមន្ត្រីនៅក្នុងប្រទេសហ្វីលីពីន កាលពីឆ្នាំមុន ដែលមានចំនួន ៣០% នៃផលិតផលកសិកម្មដែលរត់ពន្ធ ដោយវាយឆ្មក់បាននៅក្នុងឃ្លាំងស្តុកខុសច្បាប់ និងលាក់ក្នុងចំណោមការដឹកជញ្ជូនសម្លៀកបំពាក់។
លោកសាស្ត្រាចារ្យ Leonardo Lanzona មកពីសាកលវិទ្យាល័យ Ateneo de Manila មានប្រសាសន៍ថា ការកើនឡើងតម្លៃខ្ទឹមបារាំង គឺមិនធ្លាប់មានពីមុនមក។ ដោយតម្លៃក្នុង១គីឡូក្រាម ហក់ឡើងដល់ ៧២០ប៉េសូ ដែលស្មើនឹង ១៣ដុល្លារ នៅតំបន់រាជធានីជាតិ Metro Manila កាលពីចុងខែធ្នូ ឆ្នាំ២០២២ តម្លៃនោះគឺច្រើនជាងតម្លៃសាច់ និងប្រាក់ឈ្នួលអប្បបរមាប្រចាំថ្ងៃនៅក្នុងតំបន់ ដែលបានត្រឹមចន្លោះពី ៥៣៣-៥៧០ប៉េសូតែប៉ុណ្ណោះ។ ទោះយ៉ាងណា តម្លៃបានធ្លាក់ចុះចាប់តាំងពីពេលនោះមក ប៉ុន្តែខ្ទឹមបារាំង១គីឡូក្រាម នៅតែមានតម្លៃថ្លៃជាងសាច់មាន់១ក្បាល។
វាមិនត្រឹមតែខ្ទឹមបារាំងប៉ុណ្ណោះទេ ដែលបានឡើងថ្លៃ ប៉ុន្តែតម្លៃស៊ុតក៏ឡើងថ្លៃផងដែរ ខណៈប្រទេសហ្វីលីពីន ក៏ប្រឈមនឹងការខ្វះខាតស្ករថែមទៀតផង។ វិបត្តិនេះ បានបង្កើនសម្ពាធលើលោកប្រធានាធិបតី Marcos Jr. ដែលបានតែងតាំងខ្លួនគាត់ជាលេខាធិការកសិកម្ម នៅពេលចូលកាន់តំណែង ដោយសន្យាថា នឹងជំរុញផលិតកម្ម នៅពេលដែលតម្លៃអាហារពិភពលោកបានកើនឡើងយ៉ាងខ្លាំង។
ក្រុមអ្នកជំនាញ និងក្រុមកសិករបានស្នើអំពីហេតុផលផ្សេងៗ សម្រាប់វិបត្តិខ្ទឹមបារាំង និងកង្វះកន្លែងស្តុកទុកត្រជាក់ ដល់ការកើនឡើងតម្រូវការ ក្រោយជំងឺរាតត្បាតកូវីដ-១៩ ការរត់ពន្ធ និងផលប៉ះពាល់នៃគ្រោះមហន្តរាយធម្មជាតិ។
អ្នកផ្សេងទៀត បានចង្អុលបង្ហាញថា គ្រោះមហន្តរាយធម្មជាតិមិនមែនជារឿងចម្លែកទេ សម្រាប់ប្រទេសហ្វីលីពីន ហើយថា រដ្ឋាភិបាលគួរតែរៀបចំផែនការជាមុន និងនាំចូលការផ្គត់ផ្គង់បន្ថែមឱ្យបានច្រើន ខណៈការព្រមានអំពីការខ្វះខាត ដែលកំពុងកើតឡើង ត្រូវបានធ្វើឡើងនៅដើមខែសីហា ឆ្នាំ២០២២។
លោកសាស្ត្រាចារ្យ Lanzona សង្ស័យថា មូលហេតុនៃវិបត្តិ គឺកើតឡើងអំពីការចែកចាយជាងការផ្គត់ផ្គង់ អាជីវកម្មខ្នាតតូច និងមធ្យមជាច្រើនត្រូវបានបិទ អំឡុងពេលជំងឺកូវីដ-១៩ ដែលវាមានសក្តានុពលក្នុងការបំភ័ន្តទីផ្សារ។
ប្រធានាធិបតីហ្វីលីពីន លោក Marcos Jr. ដែលបានរិះគន់ការនាំចូលចំណីអាហារ កាលពីអតីតកាល បានអនុញ្ញាតឱ្យនាំចូលខ្ទឹមបារាំងចំនួន ២១,០៦០តោន នៅដើមខែមករានេះ ជាមួយនឹងការដឹកជញ្ជូនលើកដំបូង បានមកដល់ក្នុងសប្តាហ៍នេះ។ ប៉ុន្តែកសិករបាននិយាយថា វាមកដល់យឺតពេលពេក ហើយកសិផលនឹងមកដល់ដូច ដែលកសិករក្នុងស្រុកប្រមូលផលដំណាំរបស់ខ្លួន។
យ៉ាងណាមិញ ក្រសួងកសិកម្មបានប្រាប់ប្រព័ន្ធផ្សព្វផ្សាយក្នុងស្រុកថា នឹងមានការកំណត់លើការនាំចូល ដើម្បីកាត់បន្ថយផលប៉ះពាល់ដល់កសិករក្នុងស្រុក។ ជាក់ស្តែង នៅក្នុងបទសម្ភាសន៍ជាមួយទូរទស្សន៍ CNN Philippines លោកប្រធានធិបតី Marcos Jr. បាននិយាយថា គ្មានជម្រើសអ្វីក្រៅពីការនាំចូលនោះទេ ហើយលោកក៏នឹងផ្តោតលើការកែលម្អផលិតកម្ម និងការបង្ក្រាបការរត់ពន្ធផងដែរ៕
ចែករំលែកព័តមាននេះ