រាជធានីភ្នំពេញ ៖ ម៉ូតូម៉ាកស៊ុយហ្ស៊ុយគីស្មាស់១គ្រឿងជិះគ្នា២នាក់ បានបត់ឆ្លងផ្លូវក្នុងបំណងចូលទៅចាក់សាំងនៅស្ថានីយ៏ប្រេងឥន្ធនៈមួយកន្លែង មិនមើលមុខមើលក្រោយ បានជ្រុលទៅបុកជាមួយម៉ូតូម៉ាកយ៉ាម៉ាហាស៊ីរូស សណ្ដោងកន្ទុយរ៉ីម៉ក១គ្រឿង ដឹកចេកឆាបពេញទំហឹង ។ ក្នុងខណៈពេលកំពុងបើកបរក្នុងទិសដៅច្រាសទិសគ្នា បណ្ដាលឲ្យក្រឡាប់បះជើងចាក់ចេកឆាបចោលមកដីទាំងអស់ ហើយអ្នកបើកបរបានរងរបួសស្រាល ។ ចំណែកបុរសអ្នកជិះម៉ូតូស៊ុយហ្ស៊ុយគីស្មាស់នោះ រួមជាមួយអ្នករួមដំណើរជាមួយម្នាក់ទៀត បានរងរបួសធ្ងន់ធ្ងរ ដោយម្នាក់បាក់ជើង និងម្នាក់ទៀតបាក់ដៃ ។
បន្ទាប់មកត្រូវបានរថយន្ត ក្រុមសង្គ្រោះអង្គភាព៧១១ របស់កងពលតូចលេខ៧០ ដឹកយកទៅសង្គ្រោះបន្ទាន់ នៅក្នុងមន្ទីរពេទ្យព្រកុសុមៈ ភ្លាមៗដែរ ។ ហេតុគ្រោះថ្នាក់ចរាចរនោះ បានកើតឡើងកាលពីវេលាម៉ោង០៧ព្រឹក ថ្ងៃទី២៤ ខែកក្កដា ឆ្នាំ២០១៧ នៅលើកំណាត់ផ្លូវជាតិលេខ៣ ត្រង់ចំណុចទល់មុខរោងចក្រកាត់ដេរយីហោ《ស៊ីកូ》ស្ថិតនៅក្នុងភូមិព្រីកី សង្កាត់ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌បានឲ្យដឹងថា ម៉ូតូស៊ុយហ្ស៊ុយគីស្មាស់១គ្រឿងនោះ ស៊េរីឆ្នាំ២០០៦ ពណ៌ក្រហម ពាក់ស្លាកលេខ ១Q-៨៧៣៣ បើកបរដោយបុរសម្នាក់ឈ្មោះ សែម រ៉េត អាយុ៣០ឆ្នាំ មុខរបរជាងសំណង់រងរបួសបាក់ជើងខាងឆ្វេង មានស្រុកកំណើតនៅក្នុងស្រុកព្រះស្ដេច ខេត្តព្រៃវែង ស្នាក់នៅផ្ទះជួលនៅក្នុងសង្កាត់ពងទឹក ខណ្ឌដង្កោ ចំណែកបុរសអ្នករួមដំណើរជាមួយឈ្មោះ ជា ចិត្រ អាយុ២៥ឆ្នាំ មុខរបរជាងសំណង់រងរបួសបាក់ដៃខាងឆ្វេង មានស្រុកកំណើតនៅក្នុងភូមិតាហោង ឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង ស្នាក់នៅផ្ទះជួលជាមួយគ្នា ។
ដោយឡែកម៉ូតូម៉ាកយ៉ាម៉ាហាស៊ីរូស សណ្ដោងកន្ទុយរ៉ីម៉កដឹកចេកឆាប ពណ៌ក្រហមលាយខ្មៅ គ្មានស្លាកលេខ បើកបរដោយបុរសម្នាក់ឈ្មោះ ស្រ៊ុន សៀងហ៊ី អាយុ៣២ឆ្នាំ មុខរបរលក់ចេកឆាប រងរបួសស្រាល មានទីលំនៅក្នុងភូមិតាំងដូង ឃុំតាំងដូង ស្រុកបាទី ខេត្តតាកែវ ។
ប្រភពដដែលបានបន្តទៀតថា នៅមុនពេលកើតហេតុ គេបានឃើញ បុរសដែលជាជាងសំណង់ទាំងពីរនាក់នោះ បានជិះម៉ូតូម៉ាកស៊ុយហ្ស៊ុយគីស្មាស់១គ្រឿងខាងលើឌុបគ្នា ដោយបានបើកបរក្នុងទិសដៅពីត្បូងទៅជើង ក្នុងល្បឿនលឿនគួរសមដែរ ។ ចំណែកឯម៉ូតូម៉ាកយ៉ាម៉ាហាស៊ីរូស សណ្ដោងកន្ទុយរ៉ីម៉ក១គ្រឿង ដឹកចេកឆាបពេញកន្ទុយរ៉ឺម៉ក ចេញពីភ្នំពេញទៅលក់នៅខេត្តតាកែវ ដោយបានបើកបរធ្វើដំណើរក្នុងទិសដៅពីជើងទៅត្បូង ។ លុះពេលទៅដល់ត្រង់ចំណុចកើតហេតុខាងលើ ម៉ូតូស៊ុយហ្ស៊ុយគីស្មាស់បានបត់ឆ្វេងឆ្លងផ្លូវ ក្នុងបំណងចូលទៅចាក់សាំងនៅស្ថានីយ៍ប្រេងឥន្ធនៈមួយ ដែលមានទីតាំងស្ថិតនៅជិតនោះ ដោយមិនបានមើលមុខមើលក្រោយ ក៏បានបុកជាមួយម៉ូតូយ៉ាម៉ាហាស៊ីរូសសណ្ដោងកន្ទុយរ៉ីម៉ក១គ្រឿងដឹកចេកឆាបពេញទំហឹង បណ្ដាលឲ្យដួលបោកទៅលើថ្នល់ រងរបួសធ្ងន់ទាំងពីរនាក់ ចំណែកម៉ូតូរ៉ឺម៉កដឹកចេកឆាប បានក្រឡាប់ធ្លាក់ផ្លូវ ប៉ុន្តែអ្នកបើកបរបានរងរបួសស្រាលប៉ុណ្ណោះ ។
ប្រភពដដែលបានបន្តទៀតថា ក្រោយពេលកើតហេតុ ជនរងគ្រោះដែលរងរបួសធ្ងន់នោះ ត្រូវបានរថយន្តពេទ្យ របស់ក្រុមសង្គ្រោះអង្គភាព៧១១ របស់កងពលតូចលេខ៧០ ដឹកយកទៅសង្គ្រោះបន្ទាន់នៅមន្ទីរពេទ្យព្រះកុសុមៈ ដំណែកម៉ូតូយ៉ាម៉ាហាស៊ីរូសសណ្ដោងកន្ទុយរ៉ីម៉ក១គ្រឿងដឹកចេកឆាប និងម៉ូតូស៊ុយហ្ស៊ុយគីស្មាស់ ត្រូវបាននគរបាលនាំយកទៅរក្សាទុករង់ចាំឲ្យតំណាងទាំងសងខាង ជួបធ្វើការដោះស្រាយគ្នានៅពេលក្រោយ ៕
ចែករំលែកព័តមាននេះ