ខេត្តមណ្ឌលគិរី ៖ នាយទាហានចំនួន៧នាក់ នៃតំបន់ប្រតិបត្តិការសឹករងមណ្ឌលគិរី ត្រូវបានថ្នាក់ដឹកនាំក្រសួងការពារជាតិ សម្រេចធ្វើការតំឡើងឋានន្តរសក្តិថ្នាក់វរសេនីយ៍ទោ និងថ្នាក់វរសេនីយ៍ត្រី ក្រោមអធិបតីភាពលោកឧត្តមសេនីយ៍ត្រី ឃិន ម៉េងស្រេង មេបញ្ជាការតំបន់ប្រតិបត្តិការសឹករងមណ្ឌលគិរី កាលពីព្រឹកថ្ងៃទី២៣ ខែកក្កដា ឆ្នាំ២០១៧ នៅសាលប្រជុំតំបន់សឹក ដោយមានវត្តមានមេបញ្ជាការរង នាយការិយាល័យគ្រប់ជំនាញជាច្រើនរូប ។
យោងតាមសេចក្តីប្រកាសស្តីពីការដំឡើងឋានន្តរសក្កិ យោធិនលេខ២៣៦ ត.ឋ.ស និងអនុវត្តន៏តាមអនុក្រឹត្យលេខ៦៥ អ ន ក្រ.បក ចុះថ្ងៃទី១៤ ខែកញ្ញា ឆ្នាំ២០០០ ស្តីពីការរៀបចំ និងការប្រព្រឹត្តទៅរបស់ក្រសួងការពារជាតិ តាមសំណើររបស់នាយកដ្ឋានបុគ្គលិក សម្រេចដំឡើងឋានន្តរសក្តិនាយទាហាន នៃកងយោធពលខេមភូមិន្ទចំនួន៧នាក់ ក្នុងនោះមានថ្នាក់វរសេនីយ៍ទោចំនួន១នាក់ ថ្នាក់វរសេនីយ៏ត្រី ចំនួន៦នាក់ ។
ក្នុងនោះលោកវរសេនីយ៍ត្រី សុខ សុខន មុខងារនាយការិយាល័យអភិវឌ្ឍន៍តំបន់ប្រតិបត្តិសឹករងមណ្ឌលគិរី ដំឡើងសក្តិទៅថ្នាក់វរសេនីយ៍ទោ ។ ដោយឡែកដំឡើងឋានន្តរសក្តិថ្នាក់វរសេនីយ៏ត្រីចំនួន៦នាក់រួមមាន ១.លោកអនុសេនីយ៍ឯក លី ចិត្ត មុខងារ នាយរងការិយាល័យអភិវឌ្ឍន៍ ២.លោកអនុសេនីយ៍ឯក ខឹង ខៀង មុខងារ នាយរងការិយាល័យទី១ ៣.លោកអនុសេនីយ៍ឯក ម៉ៅ សាវឿន មុខងារ នាយរងផ្នែកហិរញ្ញវត្ថុ ៤.លោកអនុសេនីយ៍ឯក ប៉ង់ កាណួត មុខងារ នាយរងការិយាល័យយោធាតំបន់ ៥.លោកអនុសេនីយ៍ឯក ញ៉ាន ថៃ មុខងារ នាយរងការិយាល័យទី២ ៦.លោកអនុសេនីយ៍ឯក ឡុង វត្ថានៈ មុខងារ នាយរងការិយាល័យទី២ ។
លោកឧត្តមសេនីយ៍ត្រី ឃិន ម៉េងស្រេង មេបញ្ជាការតំបន់ប្រតិបត្តិការសឹករងមណ្ឌលគិរី បានថ្លែងថា ការដំឡើងឋានន្តរសក្តិនៅថ្ងៃនេះ គឺជាការឆ្លើយតបទៅនឹងសកម្មភាព ដែលនាយទាហាន បានបំពេញនាពេលកន្លងមក នឹងជាការលើកទឹកចិត្ត ដល់អ្នកដែលបានខិតខំធ្វើការបម្រើដល់ជាតិ មាតុភូមិ និងប្រជាជន ។
លោកឧត្តមសេនីយ៍ត្រីមេបញ្ជាការក៏បានផ្តាំផ្ញើដល់នាយទាហានដែលទទួលបានឋានន្តរសក្តិថ្មីថា ត្រូវយកឋានៈតួនាទីដែលថ្នាក់ដឹកនាំបានផ្តល់ជូន ទៅបំពេញការងារបម្រើជាតិឲ្យបានខ្ជាប់ខ្ជួន ព្រោះបើកាលណាមន្ត្រីដែលមានបុណ្យសក្តិ អំណាចដែលខ្លួនកំពុងមានសព្វថ្ងៃ ទៅបម្រើតែផលប្រយោជន៍ផ្ទាល់ខ្លួននោះ ប្រទេសជាតិនឹងមានភាពច្របូកច្របល់ ការអនុវត្តន៍ច្បាប់គ្មានតម្លាភាព ហើយប្រជាពលរដ្ឋនឹងគ្មានជំនឿដល់មន្ត្រីកងកម្លាំងនោះទេ ៕
ចែករំលែកព័តមាននេះ