រាជធានីភ្នំពេញ ៖ វិស័យធនាគារ និងហិរញ្ញវត្ថុកម្ពុជាមានការរីកចម្រើនគួរឲ្យកត់សម្គាល់នាទសវត្សរ៍ចុងក្រោយនេះ ដែលបានរួមចំណែកជំរុញកំណើនសេដ្ឋកិច្ចជាតិយ៉ាងខ្លាំង ។ គិតត្រឹមឆមាសទី១ឆ្នាំនេះ ប្រាក់បញ្ញើរបស់គ្រឹះស្ថានធនាគារ និងហិរញ្ញវត្ថុ កើនឡើង២៣,៤% ដល់៧០,៨ទ្រីលានរៀល ស្មើនឹង៧៦,៥%នៃផ.ស.ស ខណៈដែលឥណទានកើនឡើង២០,៤% ដល់៧៦,៥ទ្រីលានរៀល ស្មើនឹង៨៣%នៃផ.ស.ស ។ ចំណែកទ្រព្យសកម្ម បានកើនឡើង២១,៨% ដល់១២៦,៨ទ្រីលានរៀល ស្មើនឹង១១៧%នៃផ.ស.ស ។ នេះបើតាមរបាយការណ៍បូកសរុបលទ្ធផលការងារប្រចាំឆមាសទី១ របស់ធនាគារជាតិនៃកម្ពុជា ។
របាយការណ៍ដដែលបានបង្ហាញថា ការផ្ដល់ឥណទានរបស់គ្រឹះស្ថានធនាគារក្នុងឆមាសទី១ឆ្នាំនេះ បានបន្តបែងចែកទៅវិស័យចម្បងៗនៃសេដ្ឋកិច្ច ដូចជា ពាណិជ្ជកម្មលក់ដុំនិងរាយ មានចំនួន៣១%, សំណង់និងអចលនទ្រព្យ ចំនួន១៥%, គ្រួសារ ចំនួន១៦% និងកសិកម្ម ចំនួន១០% ។ ចំណែកគ្រឹះស្ថានមីក្រូហិរញ្ញវត្ថុបានបែងចែកទៅគ្រួសារមានចំនួន៣២%, កសិកម្មចំនួន២៩%, ពាណិជ្ជកម្ម ចំនួន១៨% និងសេវាកម្ម១០% ។ ទន្ទឹមនឹងនេះ របាយការណ៍ក៏បានបង្ហាញពីចំនួនអ្នកដាក់ប្រាក់បញ្ញើនៅតាមគ្រឹះស្ថានធនាគារ និងហិរញ្ញវត្ថុវិញ បានកើនដល់៤,៨លាននាក់ គិតជាភាគរយមានកំណើន១១% ខណៈចំនួនអ្នកខ្ចីប្រាក់បានថយចុះបន្តិចមក២,៦លាននាក់ គិតជាភាគរយថយចុះ០,១៦% ។
ថ្លែងក្នុងឱកាសបើកសន្និបាតបូកសរុប លទ្ធផលការងារប្រចាំឆមាសទី១ និងទិសដៅការងារឆមាសទី២ ឆ្នាំ២០១៧ របស់ធនាគារជាតិនៃកម្ពុជា លោក ជា ចាន់តូ ទេសាភិបាលធនាគារជាតិនៃកម្ពុជា លើកឡើងថា ក្នុងនាមជាអាជ្ញាធររូបិយវត្ថុ អាជ្ញាធរត្រួតពិនិត្យវិស័យធនាគារ និងគ្រប់គ្រងប្រព័ន្ធទូទាត់សងប្រាក់ ធនាគារជាតិនៃកម្ពុជា បានបន្តចូលរួមយ៉ាងសកម្មក្នុងការគាំទ្រ ជំរុញកំណើនសេដ្ឋកិច្ច និងកាត់បន្ថយភាពក្រីក្រ ពិសេសតាមរយៈការចូលរួមចំណែករក្សាស្ថិរភាពម៉ាក្រូសេដ្ឋកិច្ច ស្ថិរភាពហិរញ្ញវត្ថុ ការអភិវឌ្ឍវិស័យធនាគារ និងការធ្វើទំនើបកម្មប្រព័ន្ធទូទាត់ ។
ប្រធាននាយកប្រតិបត្តិធនាគារអេស៊ីលីដា ភីអិលស៊ី លោក អុិន ចាន់នី បានថ្លែងកាលពីថ្ងៃទី១៨ កក្កដា ថា ការផ្តល់ឥណទានរបស់អេស៊ីលីដាឆ្នាំនេះ មានកំណើនទាបជាង១% ធៀបរយៈពេលដូចគ្នាកាលពីឆ្នាំមុន ដែលទំហំទឹកប្រាក់បានកើនពី២.៧៧១ ដល់២.៧៩៣លានដុល្លារអាមេរិកប៉ុណ្ណោះ គឺស្មើនឹងកំណើន០,៧៩% ។ ទោះជាយ៉ាងណា លោកថា ប្រាក់បញ្ញើមានកំណើនល្អប្រសើរ ដោយទំហំប្រាក់បញ្ញើបានកើនពី៣.០៥១ ដល់៣.២៥៣លានដុល្លារអាមេរិក កើនឡើង២០២លានដុល្លារ ស្មើនឹងកំណើន៦,៦% បើធៀបនឹងរយៈពេលដូចគ្នាកាលពីឆ្នាំមុន ។
លោកមានប្រសាសន៍ថា ៖ « ការផ្តល់ឥណទានមិនសូវលូតលាស់ ដោយសារកសិផលរបស់ប្រជាកសិករមានបញ្ហានៅឆ្នាំនេះ ទើបពួកគេមិនសម្រេចចិត្តខ្ចីប្រាក់ ហើយអ្នកមានប្រាក់នៅសល់បានយកប្រាក់មកទុកនៅធនាគារ ដោយសារការវិនិយោគគ្មានផលចំណេញ» ។ លោករំពឹងថា ឥណទានទូទៅឆ្នាំនេះ មានទំហំប្រហាក់ប្រហែលឆ្នាំមុន បើគិតរហូតដល់ដំណាច់ឆ្នាំ ។
របាយការណ៍ធនាគារជាតិនៃកម្ពុជាបញ្ជាក់ថា ការរក្សាស្ថិរភាពហិរញ្ញវត្ថុកម្ពុជាឲ្យមានភាពរឹងមាំនេះ ដោយសារតែហានិភ័យម៉ាក្រូសេដ្ឋកិច្ច និងហានិភ័យវិស័យធនាគារស្ថិតក្នុងកម្រិតទាបអាចគ្រប់គ្រងបាន ។ ការធ្វើតេស្តលើភាពគ្រប់គ្រាន់នៃដើមទុនរបស់វិស័យធនាគារបង្ហាញថា គ្រឹះស្ថានធនាគារមានភាពធន់ខ្ពស់ទៅនឹងហានិភ័យដែលអាចកើតឡើងជាយថាហេតុ។ ធនាគារជាតិនៃកម្ពុជាបានបន្តតាមដានវឌ្ឍនភាពវិស័យធនាគារយ៉ាងប្រុងប្រយ័ត្ន ជាពិសេស ទៅលើកំណើននៃឥណទាន ឥណទានមិនដំណើរការ តាមដានវឌ្ឍនភាពក្នុងវិស័យអចលនទ្រព្យ ទំហំ និងរយៈពេលនៃលំហូរទុនបរទេសមកលើវិស័យធនាគារ និងរបាយការណ៍ស្ថិរភាពហិរញ្ញវត្ថុកំពុងត្រូវបានលើកកម្ពស់គុណភាព ដើម្បីតាមដាននូវរាល់ហានិភ័យដែលអាចបណ្តាលមកពីម៉ាក្រូសេដ្ឋកិច្ច និងវិស័យហិរញ្ញវត្ថុ ។
ជាមួយគ្នានេះ ការធ្វើកិច្ចសហប្រតិបត្តិការអន្តរជាតិត្រូវបានលើកកម្ពស់ទាំងក្នុងក្របខ័ណ្ឌពហុភាគី រួមមាន មូលនិធិរូបិយវត្ថុអន្តរជាតិ ធនាគារពិភពលោក ធនាគារអភិវឌ្ឍន៍អាស៊ី សហប្រតិបត្តិការអាស៊ាន និងសហប្រតិបត្តិការអាស៊ាន+៣ ។ល។ ទន្ទឹមនឹងនេះ ធនាគារជាតិនៃកម្ពុជា ក៏បានធ្វើកិច្ចសហប្រតិបត្តិការទ្វេភាគីជាមួយធនាគារកណ្តាលអាល្លឺម៉ង់ បារាំង លុចសំបួ ឆែក តួកគី កូរ៉េ ថៃ វៀតណាម ម៉ាឡេស៊ី ឥណ្ឌូណេស៊ី និងរដ្ឋាភិបាលឥណ្ឌា ជាដើម ។ តាមរយៈកិច្ចសហប្រតិបត្តិការអន្តរជាតិនេះ ធនាគារជាតិនៃកម្ពុជាបានទទួលការបណ្តុះបណ្តាលពង្រឹងសមត្ថភាពជំនាញ និងការផ្លាស់ប្តូរបទពិសោធន៍ ។ ទទួលជំនួយបច្ចេកទេស និងពង្រឹងសមាហរណកម្មតំបន់ និងពិភពលោក ។
យោងតាមរបាយការណ៍បង្ហាញថា គិតត្រឹមឆមាសទី១ឆ្នាំនេះ ធនាគារពាណិជ្ជមានចំនួន៣៩, ធនាគារឯកទេស១៥, គ្រឹះស្ថានមីក្រូហិរញ្ញវត្ថុ៧៣ ក្នុងនោះទទួលប្រាក់បញ្ញើ៧, ប្រតិបត្តិករឥណទានជនបទ២៦៧, ក្រុមហ៊ុនភតិសន្យា១២, អ្នកដំណើរការតតិយភាគី១៣, ក្រុមហ៊ុនក្រេឌីតប៊្យូរ៉ូ១, ការិយាល័យតំណាងធនាគារបរទេស៦ និងអាជីវករប្ដូរប្រាក់២.៤៩៦ ។ បើធៀបនឹងចុងឆ្នាំ២០១៦ ធនាគារពាណិជ្ជកើនឡើង២, គ្រឹះស្ថានមីក្រូហិរញ្ញវត្ថុកើនឡើង៣, ប្រតិបត្តិករឥណទានជនបទកើនឡើង៩៧, អ្នកដំណើរការតតិយភាគីកើនឡើង៥, ការិយាល័យតំណាងធនាគារបរទេសថយចុះ១ និងអាជីវករប្តូរប្រាក់កើនឡើង២១៣ ក្នុងនោះមានអាជ្ញាប័ណ្ណ៤៥ និងលិខិតអនុញ្ញាត១៦៨ ៕
ចែករំលែកព័តមាននេះ