ខេត្តកំពង់ស្ពឺ-កំពង់ឆ្នាំង ៖ បន្ទាប់ពីកើតទុក្ខបាយមិននឹកទឹកមិនស្រេក ដោយសារកូនស្រីជាទីស្រលាញ់ត្រូវចាប់ពង្រត់យកទៅអស់រយៈពេល៣ថ្ងៃ មិនដឹងថាមានសុខទុក្ខយ៉ាងណា ក៏ស្រាប់តែភាពសោកសៅ និងការអស់សង្ឃឹមបានរសាត់បាត់ភ្លាមៗ នៅពេល
ខេត្តកំពង់ស្ពឺ-កំពង់ឆ្នាំង ៖ បន្ទាប់ពីកើតទុក្ខបាយមិននឹកទឹកមិនស្រេក ដោយសារកូនស្រីជាទីស្រលាញ់ត្រូវចាប់ពង្រត់យកទៅអស់រយៈពេល៣ថ្ងៃ មិនដឹងថាមានសុខទុក្ខយ៉ាងណា ក៏ស្រាប់តែភាពសោកសៅ និងការអស់សង្ឃឹមបានរសាត់បាត់ភ្លាមៗ នៅពេលដឹងថាកូនស្រីរបស់ខ្លួនត្រូវបានសមត្ថកិច្ចរំដោះបានមកវិញដោយសុវត្ថិភាព ។
ជួបជាមួយអ្នកយកព័ត៌មានយើង លោក ម៉េង អោក អាយុ៣០ឆ្នាំ រស់នៅភូមិព្រៃតាមួចឃុំស្នំក្រពើ ស្រុកគងពិសី ជាឱពុកកុមារីរងគ្រោះបានសំដែងនូវភាពត្រេកអរយ៉ាងខ្លាំងរកអ្វីមកប្រៀបផ្ទឹមពុំបាន ព្រោះក្រោយពេលបាត់ខ្លួនកូនទៅ រូបលោកនិងភរិយា ព្រមទាំងជីដូនជីតាកើតទុក្ខឥតល្ហែ តែពេលនេះអ្វីៗត្រឡប់មករកភាពប្រក្រតីវិញហើយ ។
បុរសជាឪពុកក៏បានថ្លែងអំណរគុណដល់អស់លោកសមត្ថកិច្ចគ្រប់លំដាប់ថ្នាក់ជាអនេកកប្បការ ដែលបានជួយស្រោចស្រង់ជីវិតកូនរបស់លោកបានមកវិញ ដោយសុវត្ថិភាពមិនប៉ះពាល់ដល់អាយុជីវិត ។ លោកម៉េង អោក រៀបរាប់ថាតាមពិតរវាងលោកនិងបងស្រីជីដូនមួយម្នាក់នោះ (ស្ត្រីចាប់កូនស្រីលោក) មិនដែលមានរឿងអ្វីនឹងគ្នាទេ ហើយក៏មិននឹកស្មានថា បងស្រីរូបនេះមានគំនិតអាក្រក់មកលើគ្រួសារលោកបែបនេះដែរ ។ ដោយដំបូងលោកនឹកស្មានថាកូនស្រីរបស់លោកត្រូវគេចាប់យកទៅវះយកក្រលៀនដូចពាក្យចចាមអារ៉ាមដែលលេចឮតៗគ្នា តែនៅពេលដឹងរឿងពិតថា អ្នកប្រព្រឹត្តល្មើសជាបងស្រីជីដូនមួយរបស់ខ្លួនបែបនេះ លោកនិងភរិយាព្រមទាំងក្រុមគ្រួសារមានការហួសចិត្តជាខ្លាំង ។
តាមពិតបងស្រីជីដូនមួយម្នាក់នេះមានបំណងនាំយកកូនស្រីរបស់លោកតាំងពីថ្ងៃទី១៧ កក្កដា ២០១៧ មកម្ល៉េះ ខណៈដែលលោកមិននៅផ្ទះប្រពន្ធលោកក៏ទៅធ្វើការនៅរោងចក្រ តែបំណងលើកទីមួយនោះបរាជ័យ ដោយសារពេលកំពុងដឹកដៃកូនរបស់លោកទៅជិះរថយន្តត្រូវបានអ្នកភូមិឃើញហើយស្រែកសួរថា ទៅណា? ពេលនោះកូនរបស់លោកប្រាប់ថា អ៊ុំនាំទៅរកប៉ា ។ ដោយដឹងថា បំណងខ្លួនមិនបានសម្រេច បងស្រីជីដូនមួយរូបនេះក៏បាននាំកូនរបស់លោកត្រឡប់មកផ្ទះវិញ ហើយធ្វើលេសមកសួរសុខទុក្ខម្តាយក្មេករបស់លោកបានមួយសន្ទុះ ក៏លាត្រឡប់ទៅវិញបាត់ទៅ ។
រហូតដល់ថ្ងៃទី២០ កក្កដា ២០១៧ ពេលដែលកូនស្រីរបស់លោកទៅសាលាក៏បាត់ខ្លួនតែម្តង ហើយការបាត់ខ្លូននេះទៀតសោតក៏លោកមិននឹកស្មានថាបងស្រីជីដូនមួយនេះជាអ្នកប្រព្រឹត្តឡើយ ដោយគិតថាជាអ្នកដទៃធ្វើឡើងក្នុងគោលបំណងអាក្រក់ណាមួយមកលើគ្រួសាររបស់លោក ។ ក្រោយបាត់ខ្លួនកូនមួយថ្ងៃ ស្រាប់តែមានទូរស័ព្ទអនាមិកមួយតេមកលោក។ ពេលនោះលោកបានលើកនិយាយ ស្រាប់តែឮសំឡេងកូនស្រីរបស់លោកនិយាយធ្វើឱ្យលោកសប្បាយចិត្តជាខ្លាំង ដោយកូនស្រីលោកប្រាប់ថា ប៉ាផ្ញើលុយឱ្យគេ៤០០០ដុល្លារ ទើបគេលែងកូនឱ្យត្រឡប់មកផ្ទះវិញ ។ បើមិនបានលុយទេគេវះក្រលៀនខ្ញុំហើយ។ គ្រាន់តែឮពាក្យនេះរូបលោកមានការតក់ស្លុតជាខ្លាំង ព្រោះមិនដឹងថាត្រូវទៅរកលុយឯណា យកមកប្រគល់ឱ្យគេជាថ្នូរនឹងការដោះលែងកូនស្រីខ្លួនមកវិញ ទីបំផុតបងប្អូនដែលដឹងរឿង បានឱ្យខ្ចីលុយម្នាក់បន្តិចៗដើម្បីលស់យកជីវិតកូនស្រីមកវិញ ។
ពេលនោះដោយមានខាងសមត្ថកិច្ចដែលចុះមកប្រចាំការនៅផ្ទះលោកផងនោះ លោកបានសុំការអន្តរាគមន៍ ដោយបងៗសមត្ថកិចជាអ្នករៀបចំទាំងអស់តាំងពីការចរចាតាមទូរស័ព្ទលើកដំបូង ដោយបងស្រីជីដូនមួយរូបនេះទាមទារលុយ៤០០០ដុល្លារ រហូតធ្លាក់មកនៅត្រឹម៣៥០០ដុល្លារ។ ដំបូងលោករួមនិងសមត្ថកិច្ចក្នុងខេត្ត បានទៅវេរលុយចំនួន២០០០ដុល្លារនៅសល់១៥០០ដុល្លារ
ទៀត លោកបានពន្យារពេលដល់រសៀលថ្ងៃទី២២ កក្កដា ២០១៧ ។ នៅពេលដែលសមត្ថកិច្ចប្រាប់ថា បានកំណត់ទីតាំងច្បាស់ហើយ ទើបលោកវេរថែមឱ្យទៅទៀត តែបានហៅលេខកូដ ខុសមួយខ្ទង់ ដើម្បីទុកឱកាសឱ្យសមត្ថកិច្ចធ្វើការកំណត់ទីតាំងរបស់អ្នកចាប់ជំរិត។ ទីបំផុតបងស្រីជីដូន មួយរូបនេះក៏ត្រូវបានចាប់ខ្លួននៅក្រុងកំពង់ឆ្នាំង ។
ប្រជាពលរដ្ឋ និងសាច់ញាតិ ដែលទៅចោមរោមមើល និងរង់ចាំស្វាគមន៍ការមកដល់របស់កុមារីរងគ្រោះបានខ្សឹបខ្សៀវគ្នាថា ស្ត្រីសង្ស័យបានចងគំនុំជាមួយឪពុកកុមារីរងគ្រោះ ព្រោះខឹងរឿងខ្ចីលុយមិនបាន ដោយស្ត្រីរូបនោះដឹងថា ឪពុកកុមារីរងគ្រោះទើបនឹងលក់ដីកេរនៅសង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញកាលពីពេលថ្មីៗកន្លងទៅ ។ ស្ត្រីសង្ស័យគឺជាមនុស្សដែលចូលចិត្តដើរលេងសុីចាយសប្បាយហុឺហារ ហូតប្តីដែលរួមរស់ជាមួយគ្នាមានកូនដល់ទៅ៤នាក់សុំលែងលះ ចែកផ្លូវគ្នាអស់រយៈពេលច្រើនឆ្នាំមកហើយ ទើបស្ត្រីរូបនេះទៅយកប្តីក្រោយមួយទៀត ទើបមានកូនស្រីតូចម្នាក់ដែលពបំបៅតាមខ្លួន ។
លោកឧត្តមសេនីយ៍ត្រី សោម បូរ៉ា ស្នងការរងទទួលបន្ទុកយុត្តិធម៌បានថ្លែងក្រោយពេលនាំកុមារីរងគ្រោះមកប្រគល់ឱ្យឪពុកម្តាយវិញថា ប្រតិបត្តិការនេះធ្វើឡើងដោយជោគជ័យក្រោមការចង្អុលបង្ហាញពីសំណាក់លោក វុី សំណាង អភិបាលខេត្តកំពង់ស្ពឺបានបញ្ជាផ្ទាល់ពីលោកឧត្តមសេនីយ៍ត្រីសន សាមួន ស្នងការនគរបាលខេត្តកំពង់ស្ពឺ ព្រមទាំងមានការជួយសំរួលពីលោកព្រះរាជអាជ្ញាខេត្តកំពង់ស្ពឺ និងខេត្តកំពង់ឆ្នាំង ដោយមានការចូលរួមពីនាយកដ្ឋាននគរបាលព្រហ្មទណ្ឌក្រសួងមហាផ្ទៃផងដែរ។ លោកស្នងការរងបន្តថា ស្ត្រីសង្ស័យត្រូវកម្លាំងរបស់លោកឃាត់ខ្លួននៅទីតាំងវេរលុយមួយកន្លែងក្នុងក្រុងកំពង់ឆ្នាំង ដោយរកឃើញកុមារីរងគ្រោះនៅជាមួយផងដែរ។
លោកសោម បូរ៉ា ក៏បានផ្តាំផ្ញើដល់ឪពុកម្តាយកុមារីរងគ្រោះ សូមយកចិត្តទុកដាក់ដល់កូនឱ្យបានគ្រប់ពេលវេលា ។ បច្ចុប្បន្នស្ត្រីសង្ស័យត្រូវបានឃាត់ខ្លួននៅស្នងការដ្ឋាននគរបាលខេត្ត ដើម្បីកសាងសំណុំរឿងបន្ត ។បើតាមមន្ត្រីនគរបាលការិយាល័យព្រហ្មទណ្ឌបានបង្ហើបនៅព្រឹកថ្ងៃទី២៣កក្កដាថា នៅចំពោះមុខសមត្ថកិច្ចស្ត្រីសង្ស័យបានឆ្លើយសារភាពថា ខ្លួនមានបំណងនាំយកក្មួយស្រីចាប់ជំរិតយកលុយនេះតាំងពីថ្ងៃទី១៧មកម្ល៉េះត្រូវបែកការណ៍ ដោយអ្នកភូមិឃើញ រហូតដល់ថ្ងៃទី២០ កក្កដា ខ្លួនបានជួលរថយន្តជិះទៅផ្ទះប្អូនម្តងទៀត ហើយបានទៅរកក្មួយស្រីនៅសាលារៀន និងបាននាំនាងជិះរថយន្តទៅលាក់ខ្លួននៅខេត្តកំពង់ឆ្នាំង ហើយក៏ឱ្យក្មួយទូរស័ព្ទទៅឪពុករបស់គេ ដោយខ្លួនជាអ្នកខ្សឹបពីក្រោយឱ្យផ្ញើលុយមក បើមិនបានគេនឹងវះយកក្រលៀននាង ។
ជុំវិញការចាប់ខ្លួននៅក្រុងកំពង់ឆ្នាំងនៅវេលាម៉ោង១១និង៣០នាទីព្រឹកថ្ងៃទី ២២ កក្កដា សមត្ថកិច្ចនគរបាលក្រសួងមហាផ្ទៃ កំពង់ឆ្នាំង និងកំពង់ស្ពឺ បានសហការគ្នាចាប់ឃាត់ខ្លួនស្ត្រីម្នាក់ ពេលទៅដកប្រាក់ពីផ្ទះវីងវេរលុយមួយកន្លែងនៅចំណុចផ្សារលើ ក្នុងក្រុងកំពង់ឆ្នាំង ។ ការចាប់ឃាត់ខ្លួនស្ត្រីខាងលើនេះត្រូវបានសមត្ថកិច្ចឱ្យដឹងថា ជាករណីចាប់ក្មេងស្រីពីខេត្តកំពង់ស្ពឺ មកលាក់ទុកជំរិតទារប្រាក់ពីឪពុកម្តាយក្មេងស្រីរងគ្រោះនៅខេត្តកំពង់ឆ្នាំងអស់រយៈពេល៣ថ្ងៃមកហើយទើបតាមចាប់ខ្លួនបាន។
លោកឧត្តមសេនីយ៍ត្រី ប៉ុល វុទ្ធី ស្នងការរងទទួលបន្ទុកកណ្តាលយុត្តិធម៌ បានប្រាប់នូវដំណើររឿងថា កាលពីវេលាម៉ោងជាង១១ព្រឹក ថ្ងៃទី២០ កក្កដា ក្មេងស្រី ឈ្មោះ ម៉ុក ចាន់ រស្មី ហៅម៉ី អាយុ៨ឆ្នាំ បានបាត់ខ្លួនពេលចេញពីសាលាបឋមសិក្សាអង្គលំទង ។ លុះដល់យប់ឡើង ក៏ស្រាប់តែមានទូរសព្ទ័ជនអនាមឹក ចូលទៅឪពុកម្តាយក្មេងរងគ្រោះដោយគម្រាមទារប្រាក់ដល់ខ្ទង់ម៉ឺនដុល្លារ បើចង់បានកូនស្រីត្រឡប់ទៅផ្ទះវិញ ។ ក្រោយមកការចរចាគ្នាបានអូសបន្លាយដល់ព្រឹកថ្ងៃទី២២ ខែកក្កដា បានធ្លាក់មកត្រូវរ៉ូវគ្នាត្រឹមជាង៣ពាន់ដុល្លារ ទើបឪពុកម្តាយកុមារីរងគ្រោះ ព្រមផ្ញើប្រាក់តាមវីងជាដំណាក់ៗ រហូតកំណត់ទីតាំងរបស់ជនចាប់ជំរិតបាន ។ លុះដល់ម៉ោងប្រមាណជាង១១ព្រឹកថ្ងៃទី២២ ខែកក្កដា ពេលស្ត្រីរូបនោះទៅដកលុយវីងមួយកន្លែងនៅចំណុចផ្សារលើ ក៏ត្រូវសមត្ថកិច្ចចាប់ខ្លួនតែម្តង បន្ទាប់មកបានទៅរំដោះកុមារីរងគ្រោះ នៅក្នុងផ្ទះសំណាក់ហ្កាដែន ស្ថិតក្នុងភូមិម៉ុងបារាំង សង្កាត់កំពង់ឆ្នាំង ក្រុងកំពង់ឆ្នាំង ។
ស្ត្រីចាប់ក្មេងជំរិតទារប្រាក់ខាងលើ មានឈ្មោះ សេង សុខលី អាយុ៣៨ឆ្នាំ មានទីលំនៅភូមិកន្ទោក សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ ។ ក្រោយការចាប់ខ្លួនសមត្ថកិច្ចបានដកហូតគ្រឿងអលង្ការកាឡៃមួយចំនួន និងប្រាក់ដុល្លារខ្មោចចំនួន២៧០០ដុល្លារផងដែរ ដែលតាមសមត្ថកិច្ចសន្និដ្ឋាន ស្ត្រីម្នាក់នេះជាជនឆបោក មានជំនាញខាងទម្លាក់យោងតាមទីសាធារណៈផងដែរ ៕
ចែករំលែកព័តមាននេះ