រាជធានីភ្នំពេញ ៖ តារាកំប្លែងនាងម៉ក់ សុគន្ធដានិច្ច ហៅប្រិមប្រិយបានភ្ជាប់ពាក្យជាមួយអាណិកជនខ្មែររស់នៅអាមរិកកាលពីពេល ថ្មីៗកន្លងមកនេះ ។ គម្រោងចូលរោងការនៅមិនទាន់មានទេ ហើយទោះជាពេលរៀបការរួចក្តីក៏នាងមិនព្រមទៅអាមេរិកតាមប្តីដែរ ។ ហេតុអ្វីប្រិមប្រិយមិនព្រមទៅអាមេរិក ?
នាងប្រិមប្រិយដែលបានទៅសម្តែងនៅអាមេរិកជិតមួយឆ្នាំកន្លងទៅនោះមើលឃើញពីផលលំបាករបស់អ្នករស់នៅទីនោះ ។ ពួកគេត្រូវបំពេញការងារច្រើនម៉ោងស្ទើរតែមិនបានជួបមុខក្រុមគ្រួសារ។ ប្រិមប្រិយយល់ថានៅស្រុកគេធ្វើការច្រើនទើបបានប្រាក់ បើមិនអុីចឹងទេ ពិតជាខ្វះខាតមិនខាន ។ ដូច្នេះហើយនាងមិនចង់នៅទីនោះទេ ។
កាលពីពេល ថ្មីៗកន្លងមក ប្រិមប្រិយលើកឡើងថា «ដ្បិតតែគូដណ្តឹងនាងខ្ញុំរស់នៅអាមេរិកមែនហើយ បើតាមគម្រោងប្តីប្រពន្ធត្រូវរស់នៅក្រោមដំបូងតែមួយជាមួយគ្នា ។ ប៉ុន្តែនាងខ្ញុំប្រហែលជាមិនរើសជម្រើសចាកចេញពីអាជីពសិល្បៈក្នុងស្រុកចោល ទៅរស់នៅអាមេរិកទេ ព្រោះស្តាយការងារដែលយើងមានទីផ្សារ និងភាពលេចធ្លោ ។ អុីចឹងហើយទើបនាងខ្ញុំប្រហែលជាត្រូវពិភាក្សាឲ្យច្រើន សុំអនាគតស្វាមីយល់ពីបញ្ហារបស់នាងខ្ញុំ បើទៅទីនោះគ្រាន់តែទៅលេងគឺគ្រប់គ្រាន់ គ្មានបំណងទៅនៅឡើយ ។ ស្រុកខ្មែរស្រួលរស់នៅ ឲ្យតែមានមុខរបរច្បាស់លាស់គឺអាចនៅបានស្រួល ។ ដូចនាងខ្ញុំគឺមានការងារសិល្បៈអាចមានឱកាសរកនេះរកនោះបានចិញ្ចឹមខ្លួន បើប្រទេសគេមុនបានលុយច្រើន គឺហត់ហើយធ្វើការយូរម៉ោងទៀត នាងខ្ញុំឃើញច្បាស់ហើយសរសើរបងប្អូនខ្មែរយើងគាត់ខំប្រឹងណាស់មុននឹងបានប្រាក់កម្រៃ » ។
ទាក់ទងនឹងគម្រោងចូលរោងការនៅមិនទាន់បានកំណត់ថ្ងៃណាខែណាទេ ព្រោះប្រិមប្រិយថាពួកនាងកំពុងមមាញឹកខិតខំបំពេញការងារ រៀងខ្លួន ។ នាងខំរកប្រាក់ដើម្បីពេលក្លាយជាប្តីប្រពន្ធមានជីវភាពរឹងមាំ ។
គូដណ្តឹងរបស់នាងប្រិមប្រិយបានទៅប្រទេសអាមេរិកវិញ ក្រោយពេលស្នាក់នៅ ស្រុកខ្មែររាប់ខែ ។ ប្រិមប្រិយនឹករលឹកគូដណ្តឹងណាស់ ដ្បិតធ្លាប់តែនៅជិតគ្នា ។
នាងប្រិមប្រិយ ជាតារាកំប្លែង តែបានចូលរួមសម្តែងក្នុងខ្សែភាពយន្តរឿង«កូនពស់កេងកង» ។ ក្រៅពីនេះនាងសម្តែងតាមឆាកតន្ត្រីទូរទស្សន៍ជាបន្តបន្ទាប់ ៕
ចែករំលែកព័តមាននេះ