រាជធានីភ្នំពេញ៖ លទ្ធផលការងារចុះបញ្ជីដីធ្លីសម្រេចបានក្នុងឆមាសទី១ ឆ្នាំ២០១៧ បានចំនួន ១១៧.៨០១ប័ណ្ណ។ តែបើសរុបតាំងពីការអនុវត្ត រហូតដល់ខែមិថុនា ឆ្នាំ២០១៧ នេះ គឺក្រសួងដែនដី នគរូបនីយកម្ម និងសំណង់ សម្រេចចែកប័ណ្ណដល់ដៃប្រជាពលរដ្ឋបានចំនួន ៤.៥៦១.៥២០ប័ណ្ណ ស្មើនឹង ៦៥,១៦% នៃក្បាលដីប៉ាន់ស្មាន៧លានក្បាលដី។ នេះបើយោងតាមរបាយការណ៍របស់ក្រសួងដែនដី។
ការងារនៃការចុះបញ្ជីដីធ្លីគឺក្នុងនោះរួមមាន៖ ១. ការចុះបញ្ជីដីមានលក្ខណៈជាប្រព័ន្ធ ដែលជាការចុះបញ្ជីដីធ្លីក្នុងក្របខណ្ឌអនុវត្តកម្មវិធីអនុវិស័យរដ្ឋបាលដីធ្លីតាមរយៈ
– ភូមិប្រកាសកំណត់តំបន់វិនិច្ឆ័យ ចំនួន ១៤៦ភូមិ ហើយបានបិទផ្សាយជាសាធារណៈ ចំនួន ១៨៩ភូមិ ស្មើ ១៥៧.០៤៩ក្បាលដី។ – បានចុះហត្ថលេខាលើប័ណ្ណ ចំនួន ១២៨.៧៧០ប័ណ្ណ។
-បានចែកប័ណ្ណដល់ដៃប្រជាពលរដ្ឋ ចំនួន ១១២.០៤២ប័ណ្ណ (សរុបពីចាប់ផ្ដើមដល់ខែមិថុនា ឆ្នាំ ២០១៧ ចែកប័ណ្ណដល់ដៃបានចំនួន ៣.៣០៦.៨០៨ ប័ណ្ណ)។
សម្រាប់ការចុះបញ្ជីដីធ្លីក្នុងក្របខណ្ឌអនុវត្តបទបញ្ជាលេខ ០១បប គឺសម្រចបានចំនួន ៤.៤៧២ប័ណ្ណ (សរុបពីចាប់ផ្ដើមដល់ត្រឹមដំណាច់ខែមិថុនា ឆ្នាំ ២០១៧ ចែកប័ណ្ណដល់ដៃបានចំនួន ៦៤១.៦០២)។ ចំណែកការចុះបញ្ជីដីធ្លីមានលក្ខណៈដាច់ដោយដុំ គឺសម្រេចបាន សរុប ១.២៥២ប័ណ្ណ (សរុបគិតត្រឹមដំណាច់ខែមិថុនា ឆ្នាំ ២០១៧ ចែកប័ណ្ណបានចំនួន ៦១១.៧២២ប័ណ្ណ)។
របាយការណ៍របស់ក្រសួងក៏បានឲ្យដឹងដែរថា ការចុះបញ្ជីដីសហគមន៍ជនជាតិដើមភាគតិច គឺបានផ្ដល់ប័ណ្ណកម្មសិទ្ធិសមូហភាពចំនួន ០៤សហគមន៍ នៅខេត្តមណ្ឌលគីរី មាន ២២២គ្រួសារ ស្មើនឹង ៣៩ប័ណ្ណ ទំហំ ៣.៣៤៨ហិកតា (សរុបគិតត្រឹមដំណាច់ខែមិថុនា ឆ្នាំ២០១៧ ចែកប័ណ្ណបានចំនួន ១៨សហគមន៍ ចំនួន ៤៩៨ប័ណ្ណ មានទំហំ ១៥.៧០៥,៨៧ហិកតា ស្មើនឹង ១.៧៩៤គ្រួសារ)។
សម្រាប់រយៈពេលឆមាសទី១នេះ ក្រសួងក៏បានបញ្ចប់ការវាស់វែង ០៣សហគមន៍ ខេត្តរតនគិរី ស្រុកតាវែង ឃុំតាវែងក្រោម ភូមិសៀងសាយ ផ្សាង និង ទំពួនរឹង។ ចំណែកការចុះបញ្ជីដីរដ្ឋគឺសម្រេចបានចំនួន ៩០ប័ណ្ណ (សរុបគិតត្រឹមដំណាច់ខែមិថុនា ឆ្នាំ២០១៧ ចែកប័ណ្ណបានចំនួន ៨៩០ប័ណ្ណ)៕
ចែករំលែកព័តមាននេះ