រាជធានីភ្នំពេញ ៖ មន្ត្រីនគរបាលចរាចរណ៍មួយរូប ដែលបើកបរម៉ូតូឌ្រីមសង់ តាមឃាត់រថយន្ត Range Rover ០១គ្រឿង ទាំងយប់ម៉ោង២រំលងអធ្រាត្រ នៅចំណុចស្ដុបចំការមន ទទួលវិន័យកងកម្លាំង ផ្ទេរចេញពីការិយាល័យចរាចរណ៍ ទៅកាន់កងអន្តរាគមន៍ហើយ ។ បន្ថែមលើនោះ មន្ត្រីរូបនេះ ក៏ត្រូវបានស្នើសុំទៅថ្នាក់ដឹកនាំ ដើម្បីបន្ថយឋានន្តរសក្តិមួយថ្នាក់ ពីអនុសេនីយ៍ទោ មកត្រឹមអនុសេនីយ៍ត្រីផងដែរ នេះបើយោងតាមស្នងការដ្ឋាននគរបាលរាជធានីភ្នំពេញ អោយដឹងនៅព្រឹកថ្ងៃទី២៦ ខែមករា ឆ្នាំ២០២៣នេះ ។
ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានបំភ្លឺថា កាលពីវេលាម៉ោងប្រហែល០២និង០០យប់រំលងអធ្រាត្រ ឈានចូលថ្ងៃទី១៩ ខែមករា ឆ្នាំ២០២៣ លោកអនុសេនីយ៍ទោ ជឹម សាលីន អត្តលេខ៧៨៦៦៥ មន្ត្រីចំណុះការិយាល័យចរាចរណ៍ផ្លូវគោក បានធ្វើដំណើរចេញពីផ្ទះ ក្នុងគោលបំណងទៅប្រជុំជួរ នៅស្នងការដ្ឋាននគរបាលរាជធានីភ្នំពេញ ។ លុះពេល បើកបរម៉ូតូមកដល់ស្ដុបចំការមន ក៏ប្រទះឃើញរថយន្ត០១គ្រឿង ម៉ាក Range Rover ពណ៌ខ្មៅ បើកបរក្នុងល្បឿនលឿន ពេលនោះលោកអនុសេនីយ៍ទោ ជឹម សាលីន ក៏បានជិះម៉ូតូតាមដល់ស្ដុបក្រសួងមហាផ្ទៃ ក៏ជិះទៅក្បែររថយន្ត ហើយអ្នករួមដំណើរក្នុងរថយន្ត បានសួរថា តើខ្ញុំខុសអី ? ហើយលោកអនុសេនីយ៍ទោ ជឹម សាលីន តបថា បងស្រីអត់ពាក់ខ្សែក្រវ៉ាត់សុវត្ថិភាព និងកុំថតអី សម្រួលបានអត់ ? (ក្នុងន័យថា កុំឲ្យថតប៉ុណ្ណោះ) ។
ក្រុមការងារព័ត៌មាន និងប្រតិកម្មរហ័ស បានបញ្ជាក់ថា ជាក់ស្តែង ការចុះអនុវត្តនេះ មិនមានគោលការណ៍ ឬបទបញ្ជាពីប្រធានអង្គភាពនោះទេ ហើយការធ្វើនេះ ក៏មិនត្រឹមត្រូវតាមម៉ោង នៃការអនុវត្តច្បាប់ផងដែរ ។ ដូច្នេះ ស្នងការដ្ឋាននគរបាលរាជធានីភ្នំពេញ បានសម្រេចធ្វើការដាក់វិន័យ និងស្នើសុំទៅថ្នាក់ដឹកនាំ ដើម្បីសុំគោលការណ៍បន្ថយឋានន្តរសក្កិមួយថ្នាក់ និងផ្ទេរភារកិច្ច មន្ត្រីចរាចរណ៍រូបនេះ ឲ្យចេញទៅបម្រើការងារនៅកងអន្តរាគមន៍ វិញ ។
ទោះជាយ៉ាងណាក្តី ក៏សូមបងប្អូនប្រជាពលរដ្ឋដែលមានរថយន្តបើកបរនៅលើផ្លូវទាំងអស់ មេត្តាចូលរួមគោរពច្បាប់ចរាចរណ៍ ត្រូវពាក់ខ្សែក្រវ៉ាត់សុវត្ថិភាព គ្រប់ពេលវេលា នៅពេលធ្វើដំណើរតាមរថយន្ត ដើម្បីរក្សាអាយុជីវិតពេលជួបគ្រោះថ្នាក់ចរាចរណ៍ណាមួយជាយថាហេតុ ។
គួរជម្រាបដែរថា ករណីបើកបររថយន្តលើផ្លូវជាតិ និងផ្លូវសាធារណៈ មិនពាក់ខ្សែក្រវ៉ាត់សុវត្ថិភាព ត្រូវពិន័យ ៧៥,០០០រៀល ទៅ១៥ម៉ឺនរៀល តាមច្បាប់ចរាចរណ៍ផ្លូវគោក ៕
ចែករំលែកព័តមាននេះ