សហរដ្ឋអាមេរិក ៖ ប្រធានាធិបតីអាេមរិក លោកដូណាល់ ត្រាំ កាលពីថ្ងៃទី២២ កក្កដា បានចោទប្រកាន់កាសែតញូវយ៉កថែមថាជាអ្នកធ្វើឱ្យបរាជ័យការប៉ុនប៉ងរបស់សហរដ្ឋអាមេរិកសម្លាប់ប្រមុខក្រុមរដ្ឋអ៊ិស្លាម ABOU BAKR AL BAGHDADI ។
តាម TWITTER ប្រធានាធិបតីអាមេរិកចោទប្រកាន់កាសែតញូវយ៉កថែមថា បានចេញផ្សាយព័ត៌មានរសើបទាំងឡាយក្នុងឆ្នាំ២០១៥ ដែលអាចផ្តល់បណ្តាផលវិបាកដល់ប្រតិបត្តិការប៉ុនប៉ងសម្លាប់ ABOU BAKR AL BAGHDADI ជាភេរវករតាមរកបំផុត ។ លោកថា នេះជារឿងមិនល្អប៉ះពាល់ដល់សន្តិសុខជាតិ ។ លោកពុំបានផ្តល់ការពន្យល់លម្អិតជាងនេះឡើយ ។
លោកត្រាំ ហាក់ដូចជាចង់និយាយយោងដល់ពាក្យពេចន៍របស់ឧត្តមសេនីយ៍អាមេរិក លោក TONY THOMAS ដែលថ្លែងកាលពី ថ្ងៃទី២១ កក្កដា នៅទីក្រុង ASPEN រដ្ឋកូឡូរ៉ាដូ ដែលនាពេលនោះលោកអះអាងថា កងទ័ពពិសេសអាមេរិកបានរំកិលទៅកៀកបំផុតនឹងប្រមុខក្រុមរដ្ឋអ៊ិស្លាមកាលពីឆ្នាំ២០១៥ ក៏ប៉ុន្តែបានបាត់ដានជននេះវិញ ក្រោយការធ្លាយព័ត៌មាននេះក្នុងសារព័ត៌មាន។
ឧត្តមសេនីយ៍ THOMAS បន្តថា នោះជាដានដ៏ល្អបំផុត តែគួរឱ្យសោកស្តាយ ដាននេះត្រូវបាត់មួយសប្តាហ៍ក្រោយការទម្លាយរឿងសម្ងាត់របស់កាសែតជាតិធំមួយ ។ វាចាំបាច់ត្រូវប្រាប់ដល់សាធារណៈជនអាមេរិកចំពោះអ្វីដែលយើងបានធ្វើរួចវាក៏សំខាន់ផងដែរ ដែលត្រូវទទួលស្គាល់អ្វីដែលរារាំងធ្ងន់ធ្ងរដល់សមត្ថភាពរបស់យើងក្នុងការបំពេញការងារ ។
នាខែមិថុនា ឆ្នាំ២០១៥ កាសែតញូវយ៉កថែមបានចេញផ្សាយអត្ថបទមួយដែលថា កងទ័ពអាមេរិកប្រមូលបានទិន្នន័យជាច្រើន ដែលបង្ហាញពីរបៀបដែលប្រមុខក្រុមរដ្ឋអ៊ិស្លាមអាចលាក់ខ្លួន ។ អត្ថបទនេះរៀបរាប់ជាពិសេសពីការប្រើប្រាស់របស់បណ្តាប្រមុខក្រុមរដ្ឋអ៊ិស្លាមនូវប្រពន្ធពួកគេដើម្បីបញ្ជូនសារគ្នាទៅវិញទៅមក ៕
ចែករំលែកព័តមាននេះ