អ្នកប្រដាល់ថៃល្បី៣រូបចេញមុខបញ្ជាក់ពីសាវតាខ្លួន ក្រោយមានការអះអាងថា ជាប់ឈាមជ័រខ្មែរ
ថៃ ៖ កំពូលអ្នកប្រដាល់ថៃ សម្បត្តិ ប៊ូខាវ បញ្ជាមេឃ (Sombat Buakaw Banchamek) បានបញ្ជាក់តាម
ថៃ ៖ កំពូលអ្នកប្រដាល់ថៃ សម្បត្តិ ប៊ូខាវ បញ្ជាមេឃ (Sombat Buakaw Banchamek) បានបញ្ជាក់តាម
ថៃ ៖ កំពូលអ្នកប្រដាល់ថៃ សម្បត្តិ ប៊ូខាវ បានឆាមេឃ (Sombat Buakaw Banchamek) បានបញ្ជាក់តាមរយៈការបង្ហោះសំណេរលើបណ្តាញសង្គមហ្វេសប៊ុកផ្លូវការរបស់ខ្លួនយ៉ាងច្បាស់ថា រូបគេមានដើមកំណើតពីជនជាតិដើមភាគតិចកួយ ប៉ុន្តែមានសញ្ជាតិថៃ ដែលការបញ្ជាក់នេះ កើតឡើងបន្ទាប់ពីមានការអះអាងមួយចំនួនថា អ្នកប្រដាល់រូបនេះ មានដើមកំណើតខ្មែរ។ នេះបើយោងតាមប្រភពពីសារព័ត៌មានថៃ បាងកកប៉ុស្តិ៍ ចេញផ្សាយកាលពីថ្ងៃទី២៥ ខែមករា ឆ្នាំ២០២៣។
ការចេញមកអះអាងរបស់កំពូលអ្នកប្រដាល់រូបនេះ កើតឡើងស្របពេលប្រទេសថៃ និងកម្ពុជា កំពុងមានរឿងចម្រូងចម្រាសជាមួយគ្នា ពាក់ព័ន្ធនឹងដើមកំណើតស្របច្បាប់នៃក្បាច់គុនបុរាណ។ ការចាប់អារម្មណ៍ខ្លាំងបន្ថែមទៀតនោះ គឺកម្ពុជាបានសម្រេចផ្លាស់ប្តូរឈ្មោះកីឡាប្រដាល់ពី «មួយថៃ» (Muay Thai) ទៅជា «គុនខ្មែរ» (Kun Khmer) ដែលធ្វើឱ្យសហព័ន្ធប្រដាល់ Muay Thai បញ្ចេញប្រតិកម្មខ្លាំងៗ ជុំវិញការសម្រេចចិត្តនេះ និងបានបញ្ជាក់ថា ថៃនឹងមិនបញ្ជូនអត្តពលិក Muay Thai ទៅចូលរួមប្រកួតព្រឹត្តិការណ៍ស៊ីហ្គេមលើកទី៣២ ឆ្នាំ២០២៣ ដែលធ្វើឡើងចាប់ពីថ្ងៃទី០៥ រហូតដល់ថ្ងៃទី១៧ ខែឧសភា នៅរាជធានីភ្នំពេញ ប្រទេសកម្ពុជា។
លើសពីនេះទៅទៀត ថៃថែមទាំងបានព្រមានថា ប្រទេសណាដែលបញ្ជូនអត្តពលិកទៅចូលរួមការប្រកួត «គុនខ្មែរ» ក្នុងព្រឹត្តិការណ៍ស៊ីហ្គេមនេះ នឹងត្រូវហាមប្រាមពីសហព័ន្ធ Muay Thai អន្តរជាតិក្នុងព្រឹត្តិការណ៍ផ្សេងៗទៀត។
ក្រោយផ្ទុះរឿងចម្រូងចម្រាសអំពីដើមកំណើតក្បាច់គុនបុរាណ កាលពីពេលថ្មីៗកន្លងទៅនេះ បានធ្វើឱ្យអ្នកប្រដាល់អាជីពថៃ៣រូប ចេញមកបញ្ជាក់អំពីសាវតាថៃរបស់ខ្លួន បន្ទាប់ពីអ្នកគាំទ្រកម្ពុជាបានអះអាងផ្ទុយពីនេះ។ នេះបើតាមរបាយការណ៍ពីសារព័ត៌មានបាងកកប៉ុស្ត៍បានចេញផ្សាយ។
ជាក់ស្តែង កាលពីយប់ថ្ងៃទី២៤ ខែមករា កន្លងទៅ ប៊ូខាវ បានបង្ហោះសំណេរលើទំព័រហ្វេសប៊ុកផ្លូវការរបស់ខ្លួនថា «ខ្ញុំជាពលរដ្ឋថៃ មានដើមកំណើតជនជាតិកួយ មិនមែនជាពលរដ្ឋខ្មែរ ដូចដែលពលរដ្ឋមួយចំនួនអះអាងខុសនោះទេ»។
ដោយឡែក កាលពីពេលថ្មីៗនេះ អ្នកគាំទ្រក៏មានការភ្ញាក់ផ្អើលផងដែរ ជុំវិញរូបភាពអ្នកប្រដាល់២រូប ដែលថតបង្ហាញស្ទីលក្បាច់គុន ដែលគេអះអាងថា ជាក្បាច់គុនបុរាណខ្មែរ «ល្បុក្កតោ»។
ប៉ុន្តែទោះបីជាយ៉ាងណា អ្នកប្រដាល់អាជីពថៃ Panupong Tanjad ដែលជាម្ចាស់រូបភាពនោះ បានបង្ហោះនៅលើទំព័រហ្វេសប៊ុករបស់គេ កាលពីថ្ងៃទី២៤ ខែមករា ថា រូបថតនេះ ត្រូវបានផលិតឡើងដោយរូបគេ និងបងប្រុសគេផ្ទាល់ ដោយបង្ហាញពី Muay Thai នៅក្នុងខេត្តសុរិន្ទ។ Panupong បានសរសេរថា រូបគេទទួលបានការបណ្តុះបណ្តាលវិជ្ជាជីវៈនៅក្នុង Muay Thai និងជាអត្តពលិក Muay Thai របស់ជាតិ និងជាគ្រូបង្វឹក Muay Thai។
Panupong បានបញ្ជាក់យ៉ាងដូច្នេះថា «ខ្ញុំមិនដែលបានហ្វឹកហាត់ល្បុក្កតោ ឬគុនខ្មែរនោះទេ។ ប៉ុន្តែអ្នកប្រដាល់ក្នុងរូបថតនេះ គឺជាបងប្រុសខ្ញុំ និងខ្ញុំ ហើយកន្លែងថតរូប នៅឃុំក្របៅ ស្រុកថាទុំ ខេត្តសុរិន្ទ»។
ពាក់ព័ន្ធនឹងការសម្រេចមិនបញ្ជូនអត្តពលិកមកចូលរួមការប្រកួត «គុនខ្មែរ» នៅក្នុងព្រឹត្តិការណ៍ស៊ីហ្គេមលើកទី៣២ ពីសំណាក់ប្រទេសថៃ ជុំវិញបញ្ហានេះ ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ (CAMSOC) បានឱ្យដឹងថា អ្នករៀបចំស៊ីហ្គេម មិនមានការព្រួយបារម្ភចំពោះការសម្រេចចិត្តពីប្រទេសថៃ រឿងមិនបញ្ចូនអត្តពលិកមកនោះទេ ដោយនោះគឺជាសិទ្ធិគេ ហើយកម្ពុជាក៏នឹងត្រៀមរៀបចំការប្រកួត «គុនខ្មែរ» ឱ្យខាងតែបានដែរ។ រហូតមកដល់ពេលនេះ កម្ពុជាបានបញ្ជាក់ថា មានប្រទេសចំនួន ៦ ហើយបានសម្រេចចិត្តចូលរួមការប្រកួត «គុនខ្មែរ» ដោយប្រទេសទាំងនោះរួមមាន ឥណ្ឌូណេស៊ី វៀតណាម ហ្វីលីពីន ឡាវ មីយ៉ាន់ម៉ា និងម៉ាឡេស៊ី៕
ចែករំលែកព័តមាននេះ