រាជធានីភ្នំពេញ ៖ បុរសម្នាក់ជាអ្នកបើករថយន្តឲ្យក្រុមហ៊ុនចេញពីធ្វើការជិះម៉ូតូទៅជួបប្រពន្ធ ស្រាប់តែត្រូវរថយន្តកុងតឺន័របុកពីក្រោយពេញទំហឹង ហេតុការណ៍បង្កឱ្យមានការភ្ញាក់ផ្អើលកាលពីវេលាម៉ោង៩យប់ ថ្ងៃទី២១ ខែកក្កដា ឆ្នាំ២០១៧ តាមបណ្តោយផ្លូវទំនប់កប់ស្រូវ ទុលមុខខ្លោងទ្វាវត្តពោធិ៍វ័ន្ត ស្ថិតនៅភូមិ ត្រពាំងធ្ងង់ សង្កាត់ សំរោងក្រោម ខណ្ឌពោធិ៍សែនជ័យ ។
ជនរងគ្រោះឈ្មោះ នី ម៉េង ភេទប្រុស អាយុ៣៥ឆ្នាំ មុខរបរអ្នកបើករថយន្ត ស្លាប់នៅកន្លែងកើតហេតុ ស្នាក់នៅកន្លែងធ្វើការ មានស្រុកកំណើតនៅភូមិសង្កែជ្រុំ ឃុំទឹកថ្លា ស្រុកស្វាយអន្ទ ខេត្តព្រៃវែង ។ ជនរងគ្រោះជិះម៉ូតូម៉ាកវ៉េវ ពណ៌ស្លែ ពាក់ស្លាក កំពង់ចាម 1H,6600 បើកបរក្នុងទិសដៅពីជើងទៅត្បូងល្បឿនមធ្យម ។
តាមប្រភពព័ត៌មានពីកន្លែងកើតហេតុនិយាយថា មុនពេលកើតហេតុគេឃើញបុរសរងគ្រោះជិះម៉ូតូពីជើងទៅត្បូង ស្រាប់តែមានរថយន្តកុងតឺន័រមួយគ្រឿងមិនស្គាល់ម៉ាកបើកយ៉ាងលឿនស្របគ្នាមកបុកពីក្រោយពេញទំហឹង បណ្តាលឱ្យជនរងគ្រោះដួលបោកក្បាលធ្លាយខួរស្លាប់នៅតាមចិញ្ចើមផ្លូវ ចំណែករថយន្តបង្កដែលមានម៉ូតូជាប់ពីក្រោមបើករត់ជាង១០០ម៉ែត្រ ទើបម៉ូតូខ្ទាតចេញ ហើយរថយន្តនោះបើករត់បាត់ស្រមោលតែម្តង ។
ក្រោយពេលកើតហេតុសពជនរងគ្រោះត្រូវក្រុមគ្រួសារយកទៅធ្វើបុណតាមប្រពៃណីនៅស្រុកកំណើត ចំណែកម៉ូតូត្រូវជំនាញចរាចរណ៍ខណ្ឌយកទៅរក្សាទុក និងរង់ចាំប្រគល់ឱ្យក្រុមគ្រួសារសពតាមក្រោយ ៕
ចែករំលែកព័តមាននេះ