អចលនទ្រព្យនៅខេត្តកំពតកំពុងមានទីផ្សារ
រាជធានីភ្នំពេញ ៖ ក្រៅពីខេត្តព្រះសីហនុ ជាខេត្តនៅជាប់មាត់សមុទ្រសម្បូរដោយការវិនិយោគរបស់ចិនហើយនោះ ពេលនេះខេត្តកំពតក៏សម្បូរវិនិយោគិនចិនសម្រុកទៅវិនិយោគលើវិស័យអចលនទ្រព្យផងដែរ ដោយ
រាជធានីភ្នំពេញ ៖ ក្រៅពីខេត្តព្រះសីហនុ ជាខេត្តនៅជាប់មាត់សមុទ្រសម្បូរដោយការវិនិយោគរបស់ចិនហើយនោះ ពេលនេះខេត្តកំពតក៏សម្បូរវិនិយោគិនចិនសម្រុកទៅវិនិយោគលើវិស័យអចលនទ្រព្យផងដែរ ដោយមានគម្រោងអភិវឌ្ឍន៍មួយចំនួននឹងចាប់ផ្ដើមនាពេលខាងមុខនេះ ។
បើតាមអ្នកវាយតម្លៃអចលនទ្រព្យប្រចាំខេត្តកំពត បានឱ្យដឹងថា ការទិញដីធ្លីជាលក្ខណៈទ្រង់ទ្រាយធំនៅខេត្តមួយនេះកំពុងចាប់ផ្ដើមមានសកម្មភាពខ្លាំងនាពេលបច្ចុប្បន្ន ហើយភាគច្រើនជាក្រុមហ៊ុនមានភាគហ៊ុនជាមួយវិនិយោគិនមកពីប្រទេសចិន ។
លោក សុខ គែន ភ្នាក់ងារផ្ដល់ព័ត៌មានអចលនវត្ថុមួយរូបនេះបានឱ្យដឹងថា បច្ចុប្បន្នលោកមមាញឹកជាមួយនឹងអតិថិជន ដែលជាអ្នកមានគម្រោងមកវិនិយោគលើវិស័យអចលនវត្ថុនៅក្នុងខេត្តនេះ។ វិនិយោគិនភាគច្រើនដែលមកបណ្ដាក់ទុននៅក្នុងខេត្តជាជំហានដំបូង គឺកំពុងស្វែងរកដីធ្លីនៅតំបន់ណាដែលមានសក្ដានុពលនៅពេលអនាគត ។ ជាក់ស្ដែង តំបន់នៅជិត ឬក្បែរៗគម្រោងកំពង់ផែទឹកជ្រៅក្នុងខេត្ត និងតំបន់មួយចំនួនតាមបណ្ដោយឆ្នេរខេត្តកំពតជាដើម ។
លោកបន្តថា បើទោះបីជាបច្ចុប្បន្ន មិនទាន់មានគម្រោងអភិវឌ្ឍន៍អចលនវត្ថុលេចជារូបរាងក្ដី ក៏ប៉ុន្តែដីធ្លីមួយចំនួននៅក្នុងខេត្ត ជាពិសេស ដីនៅជាប់គម្រោងអភិវឌ្ឍន៍របស់រាជរដ្ឋាភិបាល ត្រូវបានវិនិយោគិនបរទេសទាំងនោះសហការជាមួយក្រុមហ៊ុនក្នុងស្រុក ទិញត្រៀមទុកជាស្រេចហើយ និងរង់ចាំមើលតែការអភិវឌ្ឍពេលខាងមុខប៉ុណ្ណោះ ។
លោកថា ៖« ដីមាត់ព្រែក និងដីនៅជិតតំបន់គម្រោងអភិវឌ្ឍន៍របស់រាជរដ្ឋាភិបាល ក្រុមវិនិយោគិនចិនទាំងអស់បានទិញរួចរាល់ខ្លះហើយ និងកំពុងស្វែងរកទិញបន្តទៀតទុកត្រៀមអភិវឌ្ឍន៍គម្រោងរបស់ខ្លួន ។ ទន្ទឹមនឹងនេះ ក៏មានក្រុមហ៊ុនមួយចំនួនបានអភិវឌ្ឍន៍ជាបុរីលំនៅឋានជាបណ្ដើរៗហើយ » ។
លោកបញ្ជាក់ថា ដីនៅតាមមាត់ព្រែកឆ្ងាយពីក្រុង មានតម្លៃប្រមាណ៥០ដុល្លារក្នុង១ម៉ែត្រការ៉េ ខណៈដីនៅប៉ែកខាងតំបន់ភ្នំ មានតម្លៃជាមធ្យម២៥ដុល្លារក្នុង១ម៉ែត្រការ៉េ ។ ក្រៅពីដីនៅតំបន់មាត់ព្រែក និងក្បែរតំបន់អភិវឌ្ឍន៍គម្រោងធំៗ ក៏មានដីជាច្រើនកន្លែងទៀតមានសក្ដានុពលសម្រាប់វិស័យកសិកម្ម ដោយមានឈ្មួញធំៗជាច្រើនបានទិញសម្រាប់អភិវឌ្ឍន៍កសិកម្មក្នុងខេត្តមួយនេះ ។
លោក ប៉ូ អ៊ាវគង់ នាយកគ្រប់គ្រងក្រុមហ៊ុន វាយតម្លៃអចលនវត្ថុ អ៊ែដវ៉ាន់ស៍ (Advance) បានឱ្យដឹងថា ដោយសារតែនៅរាជធានីភ្នំពេញ ការវិនិយោគភាគច្រើនទៅលើវិស័យសំណង់ ដូចជា អគារខុនដូ និងអាផាតមិនជាដើម ទើបចិនមួយចំនួនបានងាកទៅតាមខេត្តទេសចរណ៍របស់កម្ពុជា ដើម្បីវិនិយោគលើវិស័យសណ្ឋាគារ និងផ្នែកពាក់ព័ន្ធនឹងវិស័យទេសចរណ៍
ហើយក្រុមវិនិយោគិនទាំងនោះមើលឃើញពីសក្ដានុពលសម្រាប់អភិវឌ្ឍន៍នាពេលអនាគតផងដែរ ។
លោកបន្តថា វាជាការល្អដែលវិនិយោគិនចិនមកវិនិយោគនៅកម្ពុជា ហើយបើតាមអ្វីដែលលោកដឹង មិនមែនមានតែនៅក្នុងប្រទេសកម្ពុជាទេ ដែលមានវិនិយោគិនចិនច្រើននោះ បច្ចុប្បន្ននេះ ចិនបានវិនិយោគនៅប្រទេសជាច្រើនលើពិភពលោក ។ ដោយឡែក នៅខេត្តជាប់មាត់សមុទ្ររបស់កម្ពុជា ខេត្តព្រះសីហនុ មានជនជាតិចិនជាច្រើនបណ្ដាក់ទុនវិនិយោគ ហើយមានច្រើនជាងខេត្តកំពតទៅទៀត ។ ទាំងនេះ យើងគ្មានការព្រួយបារម្ភទេ តែផ្ទុយទៅវិញ គឺពួកគេទៅវិញទេត្រូវបារម្ភថា តើពួកគេនឹងទទួលបានផលចំណេញអ្វីខ្លះត្រឡប់ទៅប្រទេសគេវិញ ។ លោកនិយាយថា ៖«ទំនាក់ទំនងរវាងប្រទេសកម្ពុជា និងចិនមានភាពស្និទ្ធស្នាលខ្លាំង តាំងពីដើមរហូតមកដល់ពេលនេះ ។ ដូចនេះ បើតាមទស្សនៈខ្ញុំផ្ទាល់ មិនមានការព្រួយបារម្ភអ្វីទេ សម្រាប់វិនិយោគិនមកពីប្រទេសចិន » ៕
ចែករំលែកព័តមាននេះ