ប័ណ្ណកម្មសិទ្ធិ​ចេញ​ដោយ​អាជ្ញាធរ​មូលដ្ឋាន មាន​ហានិភ័យ​ខ្ពស់​សម្រាប់​អ្នក​ផ្ដល់​ឥណទាន


រាជធានី​ភ្នំពេញ ៖ ទន្ទឹម​នឹង​វិស័យ​សំណង់​កាន់តែ​រីក​ចម្រើន និង​តម្រូវការ​លំនៅ​ឋាន​ស្នាក់​នៅ​កំពុង​មាន​សន្ទុះ បាន​ជំរុញ​ឱ្យ​ក្រុមហ៊ុន​អភិវឌ្ឍន៍​ផ្នែក​អចលនទ្រព្យ​ជា​ច្រើន​បាន​សម្រុក​សាងសង់​គម្រោង​បុរី​, ផ្ទះល្វែង និង​អគារ​ស្នាក់​នៅ​រួម​សម្រាប់​ឆ្លើយ​តប​នឹង​តម្រូវការ​ទីផ្សារ ។

ផ្អែក​លើ​តម្រូវការ​កើនឡើង​នេះ បាន​ធ្វើ​ឱ្យ​ក្រុមហ៊ុន​អភិវឌ្ឍន៍​មួយ​ចំនួន​ដែល​មិន​មាន​ទុន​បង្វិល​គ្រប់គ្រាន់ បាន​យក​ប័ណ្ណកម្មសិទ្ធិ​អចលនទ្រព្យ​ទៅ​ដាក់​នៅ​ធនាគារ ឬ​នៅ​តាម​ស្ថាប័ន​ផ្សេង​ៗ ដើម្បី​ទទួល​បាន​ឥណទាន​យក​ទៅ​បញ្ចប់​គម្រោង​របស់​ខ្លួន តែ​ប័ណ្ណកម្មសិទ្ធិ​អចលនទ្រព្យ​ដែល​ចេញ​អាជ្ញាធរ​មូលដ្ឋាន គឺ​មាន​ហានិភ័យ​ខ្ពស់​សម្រាប់​អ្នក​ផ្តល់​ឥណទាន ឬ​អ្នក​ឱ្យ​ខ្ចី​លុយ ព្រោះ​ប័ណ្ណ​ប្រភេទ​នេះ​ចេញ​មាន​ចំនួន​ច្រើន​ចំពោះ​អចលនទ្រព្យ​តែ​មួយ ។

បើ​តាម​របាយការណ៍​យុទ្ធសាស្ត្រ​អភិវឌ្ឍន៍​វិស័យ​ហិរញ្ញវត្ថុ​ឆ្នាំ​២០១៦-២០២៥ របស់​រាជរដ្ឋាភិបាល​ដែល​ចេញផ្សាយ​កន្លង​មក នៅ​កម្ពុជា​ឥណទាន​ភាគច្រើន ត្រូវ​បាន​ធានា​ដោយ​អចលនទ្រព្យ ហើយ​ជា​ទូទៅ អ្នក​ឱ្យ​ខ្ចី គឺជា​អ្នករក្សា​ទុក​ឯកសារ​ប័ណ្ណកម្មសិទ្ធិ​នោះ ។ ប័ណ្ណកម្មសិទ្ធិ​អចលនទ្រព្យ និង​អចលនទ្រព្យ​មាន​ពីរ​ប្រភេទ គឺ​១-​ប័ណ្ណកម្មសិទ្ធិ​រឹង ជា​ប័ណ្ណ​ដែល​ចេញ​ដោយ​ក្រសួង​រៀបចំ​ដែនដី នគរូបនីយកម្ម និង​សំណង់ និង​២-​ប័ណ្ណកម្មសិទ្ធិ​ទន់ ជា​ប័ណ្ណ​ចេញ​ដោយ​អាជ្ញាធរ​មូលដ្ឋាន ។

ចំពោះ​ប័ណ្ណកម្មសិទ្ធិ​ទន់ ដែល​ចេញ​ដោយ​អាជ្ញាធរ​មូលដ្ឋាន គឺ​មាន​ហានិភ័យ​ខ្ពស់​ជាង​ប័ណ្ណកម្មសិទ្ធិ​រឹង ដោយសារ​ប័ណ្ណ​ប្រភេទ​នេះ​អាច​ត្រូវ​បាន​ចេញ​ចំនួន​ច្រើន​ចំពោះ​អចលនទ្រព្យ​តែ​មួយ ហើយ​អាច​យក​ទៅ​ធានា​ជាមួយ​អ្នក​ខ្ចី​ច្រើន ដោយ​អ្នក​ឱ្យ​ខ្ចី​ផ្សេង​ទៀត​មិន​បានដឹង ។

លើស​ពី​នេះ​ទៀត ឥណទាន​ដែល​ធានា​ដោយ​ប័ណ្ណកម្មសិទ្ធិ​ទន់ ត្រូវ​បាន​គិតការ​ប្រាក់​ខ្ពស់​ជាង​ឥណទាន​ដែល​មាន​វត្ថុ​ធានា​ជា​ប័ណ្ណកម្មសិទ្ធិ​រឹង ហើយ​ដំណើរការ​នៃ​ការ​ទទួល​បាន​ប័ណ្ណកម្មសិទ្ធិ​រឹង គឺ​ត្រូវ​ប្រើប្រាស់​រយៈពេល​យូរ ។ ម្យ៉ាងទៀត ការ​ចុះបញ្ជី​ចលនទ្រព្យ​ដែល​ប្រើប្រាស់​សម្រាប់​ទទួល​បាន​ឥណទាន​ពី​គ្រឹះស្ថាន​ធនាគារ និង​ហិរញ្ញវត្ថុ នៅ​មិន​ទាន់​បាន​ដំណើរការ​ពេញលេញ​នៅឡើយ ដែល​ធ្វើ​ឱ្យ​មាន​ហានិភ័យ​ចំពោះ​ការ​ផ្តល់​ឥណទាន និង​ធ្វើ​ឱ្យ​លទ្ធភាព​ប្រើប្រាស់​ជា​វត្ថុ​បញ្ចាំ​នៅ​មាន​កម្រិត ។

លោក ម៉ិ​ល សុ​គី​ម អ្នកជំនាញ​វិស័យ​ហិរញ្ញវត្ថុ​នៃ​ធនាគារពិភពលោក បាន​ថ្លែង​ក្នុង​សិក្ខាសាលា ស្ដី​ពី​ការ​គ្រប់គ្រង​ហានិភ័យ​តាម​រយៈ​ប្រព័ន្ធ​ចែករំលែក​ព័ត៌មាន​ឥណទាន កាលពី​ថ្ងៃ​ទី​២០ កក្កដា ថា ប្រទេស​កម្ពុជា​នៅ​ពឹងផ្អែក​ខ្លាំង​ទៅ​លើ​អចលនទ្រព្យ​ដូច​ជា ប្លង់​ផ្ទះ ឬ​ប្លង់​ដី ទើប​អាច​ខ្ចី​ឥណទាន​បាន ដែល​ជា​ចំណុច​មួយ​នៅ​មាន​កង្វះខាត ។ លោក​ថា ៖« នៅ​ប្រទេស​ជឿនលឿន គេ​អាច​យក​សម្ភារ​ផ្សេង​ៗ​ដូច​ជា មុខរបរ ឬ​អាជីវកម្ម​ច្បាស់លាស់ រោងចក្រ​ផលិតកម្ម​ដែល​មាន​លិខិត​បញ្ជា​ទិញ​ផលិតផល​ពី​បរទេស គឺ​ពួក​គេ​អាច​យក​របស់​ទាំងនោះ​ទៅ​ដាក់បញ្ចាំ​បាន ដោយសារ​តែ​ប្រទេស​គេ​មានច្បាប់ ប៉ុន្ដែ​នៅ​ស្រុក​ខ្មែរ​យើង​ពុំ​ទាន់​មានច្បាប់​នេះ​នៅឡើយ ។ ទោះបី​យ៉ាងណា យើង​កំពុង​តែ​ជំរុញ​ធ្វើ​យ៉ាងណា ឲ្យ​មានច្បាប់​ដើម្បី​អនុញ្ញាត​ឲ្យ​ធនាគារ​អាច​ទទួលយក​ចលនទ្រព្យ​ធ្វើ​ជា​វត្ថុ​បញ្ចាំ​បាន » ។

លោក ហុង សុខ​ឡេ​ង ប្រធាន​នាយកដ្ឋាន ពាណិជ្ជកម្ម​ខា្ន​ត​ធំ​នៃ​ធនាគារ​កា​ណា​ឌី​យ៉ា បាន​ឲ្យ​ដឹង​នៅ​ថ្ងៃ​ទី​២១ កក្កដា ថា ការ​ផ្តល់​ឥណទាន​ក្នុង​ផ្នែក​អចលនទ្រព្យ​របស់​ធនាគារ​កា​ណា​ឌី​យ៉ា​មាន​លក្ខណៈ​ធម្មតា មិន​មានការ​ថមថយ ហើយ​ក៏​មិន​រឹត​បន្ដឹង​អ្វី​ដែរ ប៉ុន្ដែ​មានការ​ត្រួតពិនិត្យ​ទៅ​លើ​អតិថិជន​មាន​ភាព​ច្បាស់លាស់​កម្រិត​ណា ។

លោក​ថា ៖« ជា​រួម យើង​ផ្តល់​ឥណទាន​ខ្នាត​ធំ​ៗ​ស្ទើរតែ​១០០%​គឺ​ត្រូវ​មានទ្រព្យ​ធានា ហើយ​ទ្រព្យ​ធានា​ទាំងនោះ ទាល់តែ​មាន​ប្លង់​រឹង ប៉ុន្តែ​សម្រាប់​ឥណទាន​ខ្នាត​តូច​ដូច​ជា​SMEs ក៏​មាន​ប្លង់​ទន់​មួយ​ចំនួន​ដែរ បើ​ទោះបី​ការ​យក​ប្លង់​ទន់​ធ្វើ​ជា​វត្ថុ​ធានា និង​ដឹង​ថា​មាន​ហានិភ័យ​ហើយ​នៅ​តែ​ធ្វើ ពីព្រោះ​នៅ​លើ​ទីផ្សារ​គេ​ធ្វើ​អីចឹង​ដែរ បើ​យើង​អត់​ធ្វើ គឺ​ដើរ​អត់​ទាន់​ទីផ្សារ និង​ពិបាក​ក្នុង​ការ​ប្រកួតប្រជែង » ។

បើ​តាម​លោក អុ​ិ​ន ចាន់​នី ប្រធាន​នាយក​ប្រតិបត្តិ​ធនាគារ​អេ​ស៊ី​លី​ដា នៅ​ដំណាច់ឆ្នាំ​២០១៦ អេ​ស៊ី​លី​ដា​បាន​ផ្តល់​ឥណទាន​ទំហំ​ទឹកប្រាក់​២១០​លាន​ដុល្លារ​ក្នុង​វិស័យ​លំនៅ​ឋាន ។ ទោះបី​យ៉ាងណា លោក​ថា ការ​ផ្ដល់​ឥណទាន​ក្នុង​វិស័យ​នេះ ត្រូវ​ពិនិត្យ​ដោយ​អនុវត្ត​ទៅ​តាម​លក្ខខណ្ឌ​នៃ​ការ​ផ្ដល់​ឥណទាន ដើម្បី​បង្ការ​ហានិភ័យ​ណាមួយ​ដែល​អាច​កើតឡើង ។

លោក សន សៀ​ប នាយក​ក្រុមហ៊ុន ឃី រៀល អីុ​ស្ទេ​ត (Key Real Estate) មាន​ប្រសាសន៍​ដែរ​ថា តាម​ការ​សង្កេត អ្នក​អភិវឌ្ឍន៍​ខ្លះ​គាត់​ប្រើប្រាស់​ទុន​ខ្លួនឯង​ក្នុង​ការ​សាងសង់ និង​អ្នកខ្លះ​ទៀត ប្រមូល​ធនធាន​ពី​មិត្តភក្តិ​បងប្អូន ពី​ដៃគូ ឬ​ពី​ធនាគារ ។ លោក​បន្ត​ថា ៖« តាម​ធម្មតា អ្នក​សាងសង់ មុន​នឹង​ចាប់ផ្តើម គាត់​ត្រូវ​ដាក់​គម្រោង និង​ធ្វើ​ជា​ប្លង់​រឹង សុំ​ទៅ​ក្រសួង​អនុញ្ញាត​ច្បាប់​ឱ្យ​សាងសង់ ហើយ​គម្រោង​ហ្នឹង មុន​ចាប់ផ្តើម ត្រូវធ្វើ​ប្លង់​រឹង បំបែក​ក្បាលដី បើសិន​បុរី ។ មួយទៀត​បើ​សាងសង់​ជា​ខុន​ដូ ក៏​ត្រូវ​បំបែក​កម្មសិទ្ធិ​ទៅ​ជា​សហកម្មសិទ្ធិ​ដែរ »​។

តាម​របាយការណ៍​អង្កេត​ដោយ​ការិយាល័យ​ឥណទាន​កម្ពុជា ហៅ​កាត់​ថា CBC ដែល​មាន​តួនាទី​ត្រួតពិនិត្យ​ទិន្នន័យ និង​ចែករំលែក​ព័ត៌មាន​ឥណទាន​ដល់​ស្ថាប័នហិរញ្ញវត្ថុ​នានា​ដែល​ជា​សមាជិក​ចំនួន​១៣៩​ស្ថាប័ន បាន​បង្ហាញ​ថា ឆ្នាំ​២០១៧​នេះ កម្ចី​អចលនទ្រព្យ​កើនឡើង​៤៧% ក្នុង​នោះ​តំបន់​ទំនាប​កណ្ដាល​កើនឡើង​ខ្លាំង​ក្នុង​ត្រីមាស​ទី​១ ឆ្នាំ​នេះ ដោយ​កើនឡើង​៨៧% បើ​ធៀប​នឹង​ត្រីមាស​ទី​៤​ឆ្នាំ​មុន មាន​កំណើន​១៩%​ប៉ុណ្ណោះ ៕

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

ព័ត៌មាន​​សេដ្ឋកិច្ច

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ