រាជធានីភ្នំពេញ ៖ បញ្ហាអ្នករត់រថយន្តតាក់ស៊ីរត់ចាប់ម៉ូយ ពាសពេញផ្លូវក្បែរគល់ស្ពានព្រះមុន្នីវង្សត្រើយខាងកើត និងការដាក់លក់ដូរបំពានចំណីផ្លូវយ៉ាងអាណាធិបតេយ្យនៅលើកំណាត់ផ្លូវជាតិលេខ១ ដែលរុំារ៉ៃ ក្នុងក្រសែភ្នែកមហាជនទូទៅ មកជាយូរហើយនោះ ពេលនេះជម្ងឺរុំារ៉ៃទាំងនេះ នឹងត្រូវបញ្ចប់ឲ្យបាន១០០ភាគរយ គិតចាប់ពីថ្ងៃទី២២ ខែកក្កដា ឆ្នាំ២០១៧ នេះតទៅ ។
ការប្រកាសជាសាធារណៈថា នឹងបញ្ចប់បញ្ហារុំារ៉ៃនេះ ថ្លែងឡើងពីសំណាក់អាជ្ញាធរខណ្ឌច្បារអំពៅ អំឡុងចុះរៀបចំសណ្តាប់ធ្នាប់ និងសម្អាតអនាម័យ តាមបណ្តោយផ្លូវជាតិលេខ១ ដែលដឹកនាំកម្លាំងដោយលោក រស់ សុភ័ក្ត្រ អភិបាលរងទទួលបន្ទុកសណ្តាប់ធ្នាប់ និងមានការសហការណ៍ចូលរួមពីកម្លាំងនគរបាលសណ្តាប់ធ្នាប់ខណ្ឌជាច្រើននាក់ផងដែរ ។
លោក រស់ សុភ័ក្ត្រ អភិបាលរងខណ្ឌច្បារអំពៅ បានបញ្ជាក់ឲ្យដឹងថា កន្លងមកអាជ្ញាធរខណ្ឌ បានចេញនូវសេចក្តីណែនាំជាច្រើនលើកច្រើនសារ ជម្រាបដល់បងប្អូនដែលជាអាជីវករប្រកបរបរលក់ដូរនៅសងខាងផ្លូវជាតិលេខ១ ស្តីពីការមិនអនុញ្ញាត្តិឲ្យបងប្អូនយកចំណីផ្លូវសាធារណៈ ជាកន្លែងប្រកបអាជីវកម្ម ប៉ុន្តែបងប្អូនមិនដែលស្តាប់ និងមិនគោរពទៅតាមការណែនាំរបស់អាជ្ញាធរឡើយ មានតែបន្តដាក់លក់ដូរលើចំណីផ្លូវសាធារណៈជាយ៉ាងអាណាធិបតេយ្យទៅវិញ ។
លោកអភិបាលរង បានមានប្រសាសន៍សង្កត់ធ្ងន់ៗថា គិតចាប់ពីថ្ងៃទី២២ ខែកក្កដា ឆ្នាំ២០១៧ នេះ អាជ្ញាធរខណ្ឌនឹងចាត់វិធានការក្តៅ លើម្ចាស់អាជីវកម្ម ឬក្រុមអាជីវករដែលនៅតែបន្តដាក់លក់ដូរបំពាននូវបំរាមហាមឃាត់របស់អាជ្ញាធរ ជាកំហិត ។ ដោយក្នុងនោះអាជ្ញាធរនឹងចាប់ដកយកសម្ភារ និងអីវ៉ាន់លក់ដូររបស់បងប្អូនមករក្សាទុកចោលរយះពេលយូរ នៅសាលាខណ្ឌ ដើម្បីជាការប្រមាន ប៉ុន្តែបើបងប្អូននៅតែផ្កើននឹងបម្រាមហាមឃាត់នោះ សាលាខណ្ឌនឹងដកហូតអីវ៉ាន់មករក្សាទុក ហើយធ្វើការពិន័យេជាប្រាក់ និងអាចឈានដល់ដំណាក់កាលចាប់យកមកទុក ហើយមិនធ្វើការប្រគល់ជូនវិញតែម្តង ប្រសិនបើបងប្អូន បន្តធ្វើផ្ទុយពីការណែនាំ ។
បន្ថែមពីនោះ លោកអភិបាលរងក៏បានសង្កត់ធ្ងន់ៗ ចំពោះបញ្ហារថយន្តតាក់ស៊ី ដែលមានការរត់ចាប់ម៉ូយយ៉ាងអាណាធិបតេយ្យពាសពេញដងផ្លូវជាតិ ពិសេសនៅចំណុចផ្លូវជាតិលេខ១ គល់ស្ពានព្រះមុន្នីវង្សត្រើយខាងកើត ដែលជាបញ្ហារុំារ៉ៃមកជាយូរ និងជាភាពអាណាធិបតេយ្យក្នុងក្រសែភ្នែកបងប្អូនអ្នកដំណើរ ដែលធ្វើដំណើរឆ្លងកាត់ទីនោះ អាជ្ញាធរខណ្ឌនឹងបញ្ចប់បញ្ហានេះឲ្យមានប្រសិទ្ធិភាព១០០ភាគរយ ។ ក្នុងនោះដែរ អាជ្ញាធរខណ្ឌបានចុះទៅណែនាំបងប្អូនជាអ្នករត់តាក់ស៊ីឲ្យបានយល់ដឹងពីបម្រាមរបស់សាលារាជធានី និងពិសេសពន្យល់ពីភាពអត់សណ្ដាប់ធ្នាប់មួយចំនួនឲ្យបងប្អូនបានយល់ ហើយស្នើសុំឲ្យបងប្អូនត្រូវបញ្ឈប់សកម្មភាពនេះតទៅមុខទៀត ។ យ៉ាងណាមិញ ប្រសិនបើបងប្អូន មិនគោរពទៅតាមការណែនាំនោះ អាជ្ញាធរនឹងចាប់ឃាត់រថយន្តបងប្អូនមករក្សាទុកនៅសាលាខណ្ឌ នឹងធ្វើការពិន័យជាប្រាក់ផងដែរ ។
ក្នុងនាមអាជ្ញាធរខណ្ឌ លោក រស់ សុភ័ក្ត្រ ក៏សុំធ្វើការស្នើដល់បងប្អូនដែលជាអ្នករត់តាក់ស៊ី និងអាជីវករទាំងអស់ ឲ្យមានការយោគយល់ និងមេត្តាចូលរួមសហការណ៍ជាមួយកម្លាំងអាជ្ញាធរគ្រប់សកម្មភាពផ្សេងៗ ក្នុងការរៀបចំសណ្តាប់ធ្នាប់ឲ្យខ្ជាប់ខ្ជួនល្អ ដើម្បីរៀបចំនូវសោភ័ណភាពដងផ្លូវសាធារណៈ ពិសេសភាពល្អប្រសើរក្នុងរាជធានីភ្នំពេញទាំងមូលផងដែរ ៕
ចែករំលែកព័តមាននេះ